“Jangchi shoir armoni...” — Vatanga sadoqat va mardlik timsoli

Bugun Nurobod tumanining Jom qishlog‘ida qishloq xo‘jaligi fanlari doktori, professor, Xalqaro ekologiya va inson xavfsizligi akademiyasi hamda Turon fanlar akademiyasi akademigi, O‘zbekiston Yozuvchilar uyushmasi a’zosi, “Mehnat shuhrati” ordeni sohibasi, jomlik olima va ijodkor Dilorom Yormatovaning “Jangchi shoir armoni...” kitobi taqdimoti bo‘lib o‘tdi.

Ma’naviy-ma’rifiy ruhda tashkil etilgan tadbirda taniqli ijodkorlar, olimlar, yozuvchi va shoirlar, davlat va jamoat arboblari, soha fidoyilari, Nurobod tumani hokimligi mas’ullari hamda keng jamoatchilik vakillari ishtirok etdi.

Taqdimotda O‘zbekiston Yozuvchilar uyushmasi a’zosi, O‘zbekistonda xizmat ko‘rsatgan madaniyat xodimi, O‘zbekiston xalq shoiri, “Xalq ta’limi a’lochisi” hamda “Shuhrat” medali sohibasi Xosiyat Bobomurodova, taniqli shoir, yozuvchi, jurnalist, davlat va jamoat arbobi, senator Farmon Toshev, O‘zbekiston Respublikasi Oliy Majlisi Qonunchilik palatasi deputati Zebiniso Rahmonova va boshqa taniqli mehmonlar qatnashdi.

Tadbir davomida kitobning mazmun-mohiyati, unda yoritilgan tarixiy haqiqatlar hamda yosh avlod tarbiyasidagi ahamiyati haqida fikr-mulohazalar bildirildi.

“Jangchi shoir armoni...” asari Ikkinchi jahon urushi qatnashchisi, “Qizil yulduz” ordeni sohibi, katta leytenant, jangchi shoir Burxon Tursunovning hayoti, jasorati va ijodiy merosiga bag‘ishlangan. Kitobda xalqimizning mard va jasur farzandi, Vatan tinchligi yo‘lida fidoyilik ko‘rsatgan qahramonning hayot yo‘li, vatanparvarlik tuyg‘ulari hamda insoniy fazilatlari keng yoritilgan.

Vatanini sevgan, uning tinchligi va osoyishtaligini eng oliy ne’mat deb bilgan insonlargina yurt ravnaqi va xalq farovonligi yo‘lida fidoyilik ko‘rsata oladi. Jangchi shoir Burxon Tursunov ham butun hayoti davomida Vatanga muhabbat va sadoqat tuyg‘ulari bilan yashab, “Vatan yagonadir, Vatan bittadir” degan ezgu g‘oyaga amal qilgan.

Taqdimot ishtirokchilari og‘ir jang maydonlarida haqiqiy qahramonlik namunalarini ko‘rsatgan, ona Vatan ozodligi va xalq tinchligi yo‘lida mardonavor kurashgan Jom farzandining hayot yo‘li bugungi yosh avlod uchun ibrat maktabi ekanini alohida ta’kidladilar.

Shuningdek, kitobdan jangchi shoirning she’rlari ham o‘rin olgani, ular orqali uning qalb kechinmalari, Vatanga bo‘lgan cheksiz muhabbati va insoniy armonlarini chuqurroq anglash mumkinligi qayd etildi.

Mazkur kitob nafaqat tarixiy xotirani tiklash, balki yoshlar qalbida vatanparvarlik, jasorat, fidoyilik va milliy qadriyatlarga hurmat tuyg‘ularini mustahkamlashga xizmat qilishi bilan ham ahamiyatlidir.

Tadbir davomida ijodkorlar va mehmonlar tomonidan bildirilgan fikrlar, samimiy mulohazalar hamda kitob atrofidagi suhbatlar uchrashuvning mazmunini yanada boyitdi.

Tarixni bilish — o‘tmishdan saboq olish, qahramonlarni e’zozlash esa kelajak avlod oldidagi muqaddas burchdir. Bunday ma’naviy-ma’rifiy tadbirlar xalqimizning boy tarixiy merosini asrab-avaylash, fidoyi insonlar xotirasini abadiylashtirish va yosh avlodni Vatanga sadoqat ruhida tarbiyalashda muhim ahamiyat kasb etadi.

✅@nur_press