Boysundagi falokatga jiddiy e’tibor qaratilmayotgandek

Surxondaryodagi «Mustaqillikning 25-yilligi» koniga qarashli quduqda 1-sentyabr kuni avariya bo‘lib, atrofga oltingugurt gazi tarqalishi boshlangan edi. Bugun KunUz hamda GazetaUz nashrlarida ushbu voqeaga oid yaxshi reportajlar e’lon qilindi.

Reportajlardan ayrim parchalar:

• Boysundagi gaz konida sodir bo‘lgan texnogen falokat to‘g‘risida to‘qqiz kundirki, tayinli rasmiy ma’lumot berilmadi. Konga yaqin hududdagi qishloqlar aholisi nima qilarini bilmayapti. Kondan chiqayotgan zaharli gaz shamolning yo‘nalishiga qarab atrofdagi hududlarga tarqalishda davom etmoqda.

• Ko‘pchilik yashab turgan joyini tark etgani uchun Kofrun qishlog‘ida maktab va bog‘chalar ishlamayapti. Do‘konlar ham yopiq.

• Qishloqda odamlar jon saqlash uchun mol-holini tashlab chiqqani uchun o‘g‘irliklar ham ko‘paygan.

“Milliy gvardiya xodimlari dam-badam paydo bo‘ladi. Ular ham odam, buning sassig‘iga ular ham dosh bera olmaydi-da”, – deydi suhbatdoshlardan biri.

• O‘sha yerda yashovchi onaxonlardan biri tovuqlarimiz nobud bo‘ldi, mollarimiz ham sekin-asta yemishdan qolmoqda, dedi.

“Sinfdoshlar pul yig‘ib, kollej va maktablarning sport zallariga ko‘chirilgan qishloqdoshlarimizga oziq-ovqat bozor-o‘char qilib tashlab kelyapmiz.

Hech kim yordam bergani yo‘q bu borada ham.

Odamlarda pul yo‘q axir”, — deydi yigit.

• «Kofirun qishlog‘ida yashaydiganlar evakuatsiya qilindi», degan xabarlar chiqdi, lekin ularga boshpana berilmagan. Uyidan chiqarib yuborilgan aholi qarindoshlarining uyida, u eshikdan bu eshikka borib jon saqlayapti. Joy topolmaganlari juda ayanchli ahvolda, ko‘chama-ko‘cha yurishga majbur bo‘lyapti.

• Boysun shahriga hech kim e’tibor bermayapti. Bolalar tamoman so‘lib boryapti. Ishlaydigan ota-onalar iloji yo‘qligidan bolasini bog‘chaga, maktabga jo‘natyapti.

• Ayniqsa, «obed» vaqti bog‘chaning uxlash xonasiga ham, o‘yin o‘ynash xonasiga ham kirib bo‘lmaydi. Derazalar yopiladi, ventilyatorlar yoqiladi, bolalar qusa boshlaydi.

• Onamning mazalari yo‘q, bosh og‘rig‘i bilan qusib yotibdilar. Maktablarda o‘quvchilar ham nafas olishga qiynalyapti. Bugun ham bir necha o‘quvchining mazasi qochdi, uydagilari kelib olib ketdi. Davlatimizdan hech bo‘lmasa bolalar va homiladorlar uchun alohida choralar ko‘rilishini so‘ragan bo‘lardim.

• Hamkasblarim ko‘rib qolgan ekan — kecha «Toza hudud» korxonasining bir avtobus ayollarini zambillarga solib, shifoxonaga olib borishibdi. Ular ertalab Kofirun qishlog‘ini tozalashga olib borilgan ekan, kun davomida gazdan zaharlanib, yiqilib qolgan. Hamma vrachlar o‘sha yerda, Termizdan ham shifokorlar kelgan.

• Vaziyat og‘ir. Gaz yomon ta’sir qilyapti. Ayniqsa, yosh bolalar va keksalarga. Hidi kuchli, holsizlik, bosh og‘rig‘i va o‘pkaga ta’siri juda bilinyapti.

• Vaziyat kundan kunga yomonlashayotgani bizga yaqqol sezilyapti. Gaz bora-bora organizmni yengmoqda.

• To‘g‘ri, gazni yopishga harakat ham qilishayotganini aytishdi, lekin sezilarli natija ko‘rmadik. Davlatimizdan gazni tezroq yopib, muammoni bartaraf qilishlarini so‘rardik.

• Shunday jannatmakon Boysunimiz bor edi. Havosidan maza qilib nafas olardik, suvidan hech kim to‘ymasdi. Qani ular? Esiz, Boysunimiz! Esiz, Boysunim-a?!

Reportajlarni o‘qish uchun:

KunUz: https://kun.uz/kr/48027196

GazetaUz: https://gazeta.uz/uz/2024/09/10/boysun/


👉 @xushnudbek 👈

Do’stlarimiz dasturlash bo’yicha bilimlaringizni mustahkamlashning ajoyib yo’lini topishibdi.

Tandir ilovasi orqali siz:
⚡️ do’stlar va boshqa Tandirchilar bilan o’rgangan bilimlaringiz bo’yicha bellashing
⚡️ yuqori o’rinlarni zabt eting
⚡️ pishing va toblaning!

Feel the “Tandir” 😉

iOS: Ko’chirish

Android: Ko’chirish

@khumoyun_codes