Azərbaycan Respublikası Müdafiə Nazirliyi hər hansı hərbi zərurət olmadığı halda, İran İslam Respublikasının silahlı qüvvələri tərəfindən ölkəmizin ərazisində mülki infrastruktura qarşı törədilən hücumları qəti şəkildə pisləyir.

Baş vermiş hadisəyə görə məsuliyyət tam şəkildə İran İslam Respublikasının üzərinə düşür.

Azərbaycan Respublikası Müdafiə nazirliyi ölkəmizin ərazi bütövlüyünün və suverenliyinin müdafiəsi, mülki şəxslərin və mülki infrastrukturun təhlükəsizliyinin təmin olunması üçün zəruri cavab tədbirlərini hazırlayır və bu hücum aktları cavabsız qalmayacaq.

Bu addım göstərir ki, Tehran hərbi obyektləri deyil, qorunmasız mülki hədəfləri seçir. Məktəbin vurulması faktiki olaraq uşaqların həyatını riskə atmaq deməkdir və beynəlxalq humanitar hüququn kobud şəkildə pozulmasıdır.

Maraqlı məqam ondan ibarətdir ki, regionda ABŞ və Avropa İttifaqının müxtəlif hərbi missiyaları və bazaları mövcuddur və onların bir hissəsi məhz Ermənistanda yerləşir. Buna baxmayaraq, İran həmin obyektləri deyil, Azərbaycanın mülki infrastrukturunu və dinc əhalisini hədəf alır.

Bu fakt Tehran rejiminin prioritetlərini açıq göstərir. Molla rejimi real hərbi qarşıdurmadan qaçaraq diqqəti mülki obyektlərə yönəldir və bununla da özünün təhlükəli və qeyri-humanist mahiyyətini nümayiş etdirir.

Belə hücumlar İran rejiminin regionda sabitlik yaradan deyil, əksinə, dinc insanları hədəfə alan destruktiv aktor olduğunu bir daha ortaya qoyur. Məktəbin vurulması isə bu siyasətin ən faciəvi və ən qəbuledilməz təzahürlərindən biridir – bu, faktiki olaraq “uşaq qatili” yanaşmasının açıq nümayişidir.