Financial Times: Франциядағы наразылықтардан келген шығын 1,2 млрд еуро болуы мүмкін. Наразылық барысында бұзақылар Louis Vuitton, Hermеs, Apple және басқа брендтердің дүкендерін тонаған. Кемі 3 мыңнан астам дүкен, мейрамхана шығынға ұшыраған.  

Трамп сайлау қарсаңында Республикалық партияны жарнамалау, насихаттау үшін кемі 400 млн доллар бөлетінін айтты. Бұл қаржы кездесулер өткізу, жақтастар форумын ұйымдастыру, жарнама беру үшін қолданылады дейді.

Energy Intelligence және Kplerдің ақпараты бойынша, Баб әл-Мандеб бұғазы арқылы мұнай тасымалдау көлемі рекордтық деңгейде азайып кеткен. Әсіресе қазан айында тасымал көлемі күрт түскен. Бұл Йемендегі қақтығыспен және хуситтердің әрекетімен тікелей байланысты.
 
Қазан айында бұғаз арқылы орта есеппен 500 мың баррель мұнай тасымалданған. Қыркүйек айында бұл көрсеткіш 3,2 млн баррель, ал маусымда 6,8 млн баррель болған. Яғни, төрт айдың ішінде 13 есеге азайған.

Украина 2028 жылға дейін шекара қорғанысын күшейту жоспарын бекітті. Жаппай ор қазу, айдаһар тістерін қою, миналы алқаптар салу жалғаса бермек. Бұл қорғаныс кешендерін Украина Ресей және Беларусьпен шекаралас аймақтарға, оккупациялық аймақтардың маңына салмақ. Киев Ресеймен қандай келісім жасалса да, Мәскеуге сенім арту қателік дейді.

Al Jazeera: Пәкістан Иранмен шекарадағы бекеттерді жабуда. Қазір Иран үшін маңызды саналатын Тафтан және Габд-Римдан шекаралық бекеттері арқылы сауда жасау тоқтатылды. Бұл маңда 2 мыңға жуық жүк көлігі кезек күтіп, қаңтарылып тұр. Билік шекара бекеттерін жабу себебін түсіндірген жоқ. Бұл лаңкестікпен күрес, қауіпсіздікті күшейту немесе Иранмен келіспеушілік болуы ықтимал.

Fox News: АҚШ Таяу Шығысқа үшінші ұшақтасушысын жіберді. USS Theodore Roosevelt ұшақтасушысы бастаған флот қарашаның соңында Таяу Шығысқа жетуі тиіс. Флот құрамында 10 мың сарбаз бар. Бұл ұшақтасушы аймақтағы USS George H.W. Bush пен USS George Washington ұшақтасушыларының қатарына қосылмақ. АҚШ кемелер аймаққа топтасқан сәтте, Иран мен Йемендегі хуситтерге қарсы операцияны бастауы мүмкін.

Зеленский Норвегияда АҚШ делегациясымен келіссөздер өткізді. Тараптар келіссөздердің жағымды форматта өрбігенін атап өтті. Зеленский АҚШ тарапы 48 сағаттың ішінде Starlink жүйесін толық қалпына келтіретінін, барлау ақпаратын тұтас беретінін айтты. Сонымен бірге, соғыс аяқталған соң, Украинаға НАТО-ның бесінші жарғысына ұқсас кепілдіктер берілетінін мәлімдеді. Тараптар арасындағы келіссөздер әлі жалғаспақ.

Түркия билігі Сирия мен Ирактан әскерін шығарудан бас тартты. "Шекараға төнетін қауіп толық жойылған сәтте ғана әскерімізді әкетеміз" дейді Анкара.

Трамп Киевке апаратын жол туралы өзінің сүйікті әңгімесін тағы да қайталады:

“Ресей әскерінің тасжолмен жүйткіп келе жатқан мыңнан астам танкісі болды.

Егер олар танктің ең жоғары жылдамдығымен, яғни сағатына 48 мильмен (шамамен 77 км/сағ) жүре бергенде, небәрі төрт сағатта елдің ішіне кіріп үлгерер еді. Оларды ешкім де, ештеңе де тоқтата алмас еді. Соғыс бір күннің ішінде-ақ аяқталар еді.

Бірақ әлгі бір ақымақ генерал…оның кім екенін де білмеймін. Оның әлі тірі екеніне де күмәнім бар. Бәлкім, бұл дүниеде жоқ та шығар.

Сол генерал тасжолмен тура жүре берудің орнына, оңға бұрылып, егістік алқаптарға кірген. Содан кейін солға бұрылып, Киевке қарай бет алған. Тасжолмен жүйткіп келе жатқанда, Ресей әскері айтарлықтай сәтті келе жатты.

Бар болғаны үш жарым-төрт сағат! Сонда бүкіл соғыс аяқталар еді!

Ал ақырында не болды? Танктер балшыққа батып, тұралап қалды. Міне, солай болды”, - дейді.

Бір қызығы осы оқиғаны Трамптан басқа ешкім айтқан емес. Үнемі Трамп айтады.

Әкелеріміз бас қосса, “баяғыда армияда болғанда” деп бастайтын, мың рет қайталайтын әңгімелері бар. Мынау да сол жанрға ұқсас сияқты…

Трамп: “Соғыс басталардан бір күн бұрын Украинада бұрын-соңды болмаған нөсер жауды. Жер лай болды. Батпаққа айналды. Сол себепті танктер балшыққа батты да қалды. Мен бұл жайлы айтып па едім?!”, - дейді.