Axios: Сирия Сауд Арабиясына хуситтерге қарсы күресте көмектесуі мүмкін. Қазір Дамашық пен Эр-Рияд осыны талқылап жатыр.

Сирия Саудияға әскер жіберу идеясын жоққа шығарды. Алайда басқа көмек түрін талқылағанын растады.

Саудия ұшақтары хуситтердің бақылауындағы Ходейда қаласын бомбалауда.

АҚШ-тағы геосаяси сарапшы Брэндон Викерт: “АҚШ-тағы сайлау қарсаңында Израиль Иранға соққы жасайды”.

NYT: Пентагон Иранға үш күн бойы тоқтаусыз соққы жасаудың жоспарын жасады. Жоспар бойынша Иранның энергия нысандары, газ сақтау қоймалары, әскери нысандары соққыға ұшырауы тиіс. Сақшылар корпусына тиесілі ғимараттар мен Бас штаб орталығын атқылау да қарастырылған. Сарапшылар Тегерандағы үкімет кварталына да соққы жасауды ұсынуда.

Қазақстанда Ресей өтінішімен ұсталған Украина азаматы Любовь Рожанская босатылды

Бұл жөнінде оның адвокаты Алексей Прянишников “Неміс толқынына” хабарлады. Рожанская Еуроодақ елдерінің біріне ұшып кеткен.

Басылымның жазуынша, Рожанскаяны босатуға Украина билігі, атап айтқанда сыртқы істер министрлігі мен омбудсмен күш салған. Бұған дейін адвокат “Қазақстан Украинамен Рожанская бойынша конструктивті диалог жүргізіп жатқанын” хабарлаған еді.

1 қазанда Қазақстан билігі өзінің немересін Украинаға алып кетпек болған Украина азаматы Любовь Рожанскаяны ұстаған. Ресейде оны бала ұрлауға әрекеттенді деп айыптаған. Ақпаратқа қарағанда, Ресейдегі қызы мен оның екінші күйеуі “өзара келісімге сәйкес” Рожанскаяға немересін Астанаға ұшаққа отырғызып жіберуі керек болған. Немересін Ресей жағы ақыры жібермеген.

Түнде Украина Калугадағы “Яндекстің” екінші дата-орталығына шабуыл жасады. Орталықтағы бірнеше модуль тұтас жанып кеткен. Ақпаратты ресейлік тарап растауда.

Жалпы Ресейде “Яндекстің” бес негізгі дата-орталығы бар. Соның екеуіне соққы жасалды. Украина шабуыл жасауды жалғастыратынын айтуда.