The Hill: Республикалықтар президент Трамп Ресейге қатысты ұстанымын қатаңдатпаса, Пентагонға бөлінетін 350 млрд долларды бұғаттайтынын айтып, сес көрсетуде.

Әңгіме қорғаныс саласына арналған 350 млрд доллар туралы болып отыр. Пентагон бұл қаражатты шілде айында сұратқан еді.

Бұл туралы республикалық конгрессмендер Брайан Фицпатрик пен Дон Бейкон ашық мәлімдеді. Бейкон одан да қатаң пікір білдіріп, Трамп өз ұстанымын өзгертпейінше, Конгрестің қазіргі сессиясының соңғы кезеңінде оның ешбір заң жобасы қабылданбайтынын айтты.

The Hill басылымының мәліметінше, Трампқа наразы республикалықтардың қатары күн санап артып келеді. Олардың жабық кездесулерде айтатын пікірлері тіпті қатаңдай түскен. Әсіресе, Ресеймен жасалған дизель отынына қатысты келісімге наразылық күшейген.

Трамптың партияластары оның сыртқы саясатына наразы. Бірқатар республикалық “тарихқа Путин деген агрессор һәм қанішерді қолдаушы ретінде кіруді қаламаймыз” деген өткір пікір айтуда.

Алтыншы күн қатарынан Албания елінде де наразылық акциялары жалғасуда. Жалпы Албаниядағы наразылықтар мен митингтерге 140 күн болыпты.

Ресейдегі МемДума депутаты Анжелика Глазкова Петерборды Ленинград, Волгоградты Сталинград деп өзгертуге қатысты заң жобасын ұсынды. Осылайша тарихи әділеттілікті қайта қалпына келтіреміз дейді.

Трамп Зеленскийді сынай сөйледі. Қысқаша:

- Зеленский мәселені шешуге онша көмектесіп отырған жоқ. Менің ойымша, ол соғыстың аяқталғанын қаламайтын сияқты.

- Зеленский бұл соғысты әлдеқашан реттеуі керек еді. Егер ол менің сөзімді тыңдағанда, әлдеқашан әлдеқайда тиімді келісімге қол жеткізер еді. Қазір майдан шебі жылжыған жоқ.

- Украина атынан келіссөз жүргізетін басқа біреудің уақыты келген сияқты. Зеленский келіссөздерді өзге біреуге тапсырса дұрыс болар еді.

- Біз Украинаға үлкен көмек көрсеттік. Ал Украина бізге не берді? Ештеңе.

WP: Трамп әкімшілігі Украинаға Patriot зымырандарын беруді әлі мақұлдаған жоқ.

Patriot әуе қорғанысы жүйелеріне арналған зымырандардың бір бөлігі Украинаға қолдау көрсететін елдерден келуге тиіс. Алайда бұл қару-жарақты беру үшін АҚШ Қорғаныс министрі Пит Хегсеттің мақұлдауы қажет.

Хегсет бұл жеткізілімдерге ресми түрде тыйым салмағанымен, оларды мақұлдау үшін қажетті рәсімдерді әлі аяқтамаған. Бұл Еуропа елдерінен зымырандарды Киевке жеткізуде басты кедергі болып тұр.

Axios: Зеленский Украинаға көрсетілетін көмекті қайта жандандыру үшін сенаторларды Трампқа қысым жасауға шақырды.

Украина президенті Владимир Зеленский екі партияның сенаторлар тобына үндеу жасап, олардан Трамп әкімшілігіне қысым көрсетуді және барлау ақпараттарымен алмасу мен қару-жарақ жеткізуге қойылған шектеулерді алып тастауды сұрады.

Басылымның мәліметінше, республикашыл сенатор Том Тиллис пен демократ сенатор Ричард Блументаль бастаған топпен онлайн сөйлесу барысында Зеленский Украина тап болған қиындықтар туралы айтқан. Атап айтқанда, Ақ үйдің мәлімдемелеріне қарамастан, Starlink және Starshield спутниктік жүйелері әлі де белгілі бір шектеулермен жұмыс істеп тұрғанын жеткізген.

Сондай-ақ Зеленский өткен аптада АҚШ Украинаға Ресейдің баллистикалық зымырандармен жасаған шабуылдары туралы үш рет ескерту жібермегенін атап өткен. Оның пайымдауынша, бұл барлау ақпараттарымен алмасуға шектеулер қойылғанын көрсетуі мүмкін.

Бұдан бөлек, Зеленскийдің айтуынша, АҚШ Қорғаныс министрі Пит Хегсет НАТО елдері ақысын төлеп қойғанына қарамастан, Patriot әуе қорғанысы жүйелеріне арналған зымырандарды және NASAMS әуе қорғанысы жүйесіне арналған AIM-9X зымырандарын жеткізуге рұқсат бермей отыр.

Зеленскийдің сөзінше, ол АҚШ президентінің арнайы өкілдеріне Ресейдің мұнай өңдеу зауыттарына жасалатын шабуылдарды 30 күнге тоқтатуды ұсынған. Оның орнына АҚШ Украинаға Patriot жүйелеріне арналған зымырандарды беруі керек болған.

Ресей түнде Киев аймағындағы қоймаларға соққы жасады. Үш адам қаза тапқан.

БАҚ: Иран Ормуз бұғазындағы суасты интернет кабельдерін істен шығаруы мүмкін. Бұл туралы Иран Ислам революциясы сақшылар корпусының өкілі Хусейн Мохабби айтты.

“Ормуз бұғазының астымен әлемдегі интернет пен саудаға қатысты деректерді жіберіп отырған жеті ірі кабель өтеді. Біз жауымызға осыны ескерткіміз келеді”, - дейді ол.

Әзербайжан «Ертұғырылдың қайта өрлеуі» сериалының актеріне халықаралық іздеу жариялады.

Әзербайжан Бас прокуратурасы халықаралық іздеуге жариялаған адамдардың арасында түрік актері Абдуррахман Тумер де бар.

Ол Түркияда тұратын, іздеуге жарияланған жеті адамның қатарына енген. Оларға Әзербайжанның конституциялық құрылысын күшпен өзгертуге шақырды және діни радикализм негізінде зорлық-зомбылыққа үндеді деген айыптар тағылып отыр.

Абдуррахман Тумер ақын, жазушы, сценарист және телекомментатор ретінде танымал.

Жалпы Әзербайжан Түркияның жеті танымал азаматына іздеу жариялады. Оларға іс ашылуда. Себебі “олар Әзербайжандағы хиджаб дауына араласып, мемлекеттік билікті төңкеруге үндеді” дейді.

Ресейлік тарап оккупацияда қалған аймақтың логистикасына украин дрондарының шабуылы азайғанын айтты. Бұл құбылысты олар Starlink жылдамдығының шектелуімен байланыстыруда.

Украин тарапы Доброполье бағытындағы “Өлім жолын” көрсетіп, жол бойында қырылып жатқан ресейлік сарбаздардың әуеден түсірілген видеосын таратты.