– Malakali tibbiyot uchun shifokorning o‘zi yetarli emas, yonida yaxlit jamoasi ham kerak,

– dedi Prezidentimiz.

Respublika shoshilinch yordam markazida neyroxirurgiya bo‘yicha katta maktab shakllangani, uning tajribasini hududlarga yetkazish zarurligi ta’kidlandi.

Buning uchun jarroh, anesteziolog, reanimatolog, assistent va hamshiralardan iborat yaxlit jamoalar joylarga yuboriladi. Ular quyi bo‘g‘inda tibbiy xizmat sifati va aholi ishonchini oshirishga xizmat qiladi.

Bunday jamoalar har bir hududda tibbiyot xodimlarini jipslashtiradigan, bemorlarga malakali yordam ko‘rsatadigan guruhlarni tayyorlashi kerak. Ixtisoslashgan markazlarning tuman va mahallalarda ishlashi, quyi bo‘g‘in xodimlarini o‘qitishi bo‘yicha yangi tizim joriy etiladi.

Tibbiyot guruhlari markazlarga olib kelinib, 3-4 oylik stajirovkadan o‘tkaziladi. Bu talab qolgan markazlarga ham taalluqli.

Facebook|Instagram|X

Kelasi yildan 26 ta ixtisoslashgan markaz direktori bilan bir yillik kontrakt asosida ishlashga o‘tiladi. Har bir direktor sohaga yangilik kiritish, quyi bo‘g‘in xodimlari malakasini oshirish va ilmni amaliyotga joriy qilish bo‘yicha aniq majburiyat oladi.

Nufuzli xorijiy universitet klinikalaridan mutaxassislar jalb qilinib, markazlardagi kamchiliklar ko‘rsatiladi va direktorlarning vazifalari aniq belgilanadi. Direktorlar yil yakunida jamoatchilik oldida hisobot beradi. Ish natijasiga qarab kontrakt uzaytiriladi.

Prezidentimiz respublika, viloyat va tumandagi har bir shifoxona hamda poliklinika faoliyatiga aholining o‘zi baho beradigan mexanizmlarni kelasi yildan joriy etish vazifasini qo‘ydi.

Har bir shifokor va hamshiraning oyligi KPIga bog‘lanishi, bunda aholining tibbiy xizmatdan qoniqish darajasi asosiy mezon bo‘lishi qayd etildi.

Facebook|Instagram|X

Prezidentimiz kelgusi yildan kardiologiya, gepatologiya, oftalmologiya va gematologiya kabi yo‘nalishlarda o‘nta sun’iy intellekt tizimi ishga tushirilishini ma’lum qildi.

– Bemorni masofadan kuzatish, nutq orqali kasallikni aniqlash va dori-darmon xavfsizligini nazorat qilish bo‘yicha yangi yechimlar joriy etiladi,

– dedi davlatimiz rahbari.

Bu yechimlar tibbiyotda sun’iy intellektdan foydalanish ko‘lamini kengaytiradi. Shifokorlar ishida yangi texnologiyalarni qo‘llashga e’tibor kuchaytiriladi.

Har bir viloyatda “Eng yaxshi AT operatori” va “Raqamli tibbiyotning eng yaxshi shifokori” tanlovlari o‘tkaziladi. G‘oliblar 100 million so‘mdan mukofot oladi.

Facebook|Instagram|X

Mamlakatimizda tibbiyotning turli yo‘nalishlarida shifokorlarning hamjamiyatlari bor.

Prezidentimiz ayrim assotsiatsiyalarda yangilanishga intilish yetishmayotganini tanqid qildi. Ba’zilariga uzoq yillar bir kishi rahbarlik qilib, boshqalarga yo‘l ochilmayapti. A’zolarning xorijda malaka oshirishi va ilg‘or davolash usullarini joriy etishida assotsiatsiyalar faolroq bo‘lishi kerak.

Yaqinda qabul qilingan farmon bilan assotsiatsiyalarga katta vakolatlar berildi. Endi ularning rahbarlari a’zolar tomonidan ko‘pi bilan ikki-uch yilga saylanadigan tizimga o‘tiladi.

– O‘ylaymanki, assotsiatsiyalar o‘zining qurultoyini o‘tkazib, tizimga yangi muhit, “yangi qon” olib kiradigan rahbarlarni saylab, sohada o‘zgarish qilishni boshlasa, ayni muddao bo‘ladi,

– dedi Prezidentimiz.

Facebook|Instagram|X

Davlatimiz rahbari shifokor mehnatining qadri haqida so‘z yuritib, ma’rifatparvar alloma Abdurauf Fitratning “Insonga xizmat qilgan har bir soha muqaddas, ammo inson sog‘lig‘iga xizmat qilgan soha – ulug‘roqdir” degan so‘zlarini esladi.

Tizimda kamida 15 yil ishlagan xodimlarning ipoteka kreditining bir qismini qoplash uchun 50 milliard so‘m ajratildi. Shu imkoniyat orqali kelasi yil 1 ming nafar tibbiyot xodimi yangi uyga ko‘chib o‘tadi.

Bu imkoniyat yosh kadrlar uchun ham joriy qilinadi: har yili 500 nafar yosh tibbiyot xodimining ipoteka krediti boshlang‘ich badalining 25 foizi qoplab beriladi.

Kelgusi yildan olis hududlarda ishlaydigan barcha shifokorlarning oylik qo‘shimcha ustamasi 2 million so‘mdan 4,5 million so‘mga oshiriladi. Bunday hududga ishga kirgan shifokorga 50 million so‘m bir martalik rag‘bat puli ham beriladi.

Facebook|Instagram|X

Xorijiy klinikalarda tajriba to‘plagan vatandosh shifokorlar mamlakatimiz shifoxonalariga jalb etiladi.

– Biz ularni o‘zimizdagi shifoxonalarga olib kelib, Yangi O‘zbekiston tibbiyotida o‘z maktabini yaratishiga xizmat qiladigan yangi tizimni yo‘lga qo‘yamiz,

– dedi Prezidentimiz.

Bunday mutaxassislarning oylik ish haqiga 50 million so‘mgacha ustama to‘lanadi. Ish joylari zamonaviy uskunalar bilan jihozlanadi.

Ularga atrofida kuchli jamoa shakllantirish, birga ishlaydigan shifokor, assistent va hamshiralarni mustaqil tanlash imkoniyati beriladi. Nufuzli konferensiyalarda qatnashish va xorijdagi hamkasblari bilan tajriba almashish xarajatlari qoplanadi.

Bu ishlar 26 ta ixtisoslashgan markazdan boshlanadi. Har bir markaz direktori kelasi yili 5-10 nafardan vatandosh shifokorni jalb etishga mas’ul bo‘ladi.

Facebook|Instagram|X

Prezidentimiz tibbiyotga katta orzular bilan kirib kelayotgan yoshlarga ishonch bildirdi.

– Orangizdan kelajakning buyuk shifokorlari, olimlari va kashfiyotchilari chiqishiga ishonaman! Bizning vazifamiz ana shu iqtidorlarni kashf etish, ularga ishonish va orzularini ro‘yobga chiqarish uchun imkoniyat yaratishdan iborat,

– dedi mamlakatimiz yetakchisi.

Shu maqsadda “Tibbiyot novatorlari” milliy hamjamiyati tashkil etildi. Mazkur platforma talabalar, yosh shifokorlar, olimlar, tajribali ustozlar va xorijdagi vatandoshlarni birlashtiradi.

Uchrashuvda davlatimiz rahbari so‘zni tibbiyot xodimlariga berib, ularning taklif va tashabbuslarini tingladi. Mutasaddilarga bildirilgan takliflarni birgalikda ro‘yobga chiqarishga topshiriq berdi.

– Men bir narsani so‘rayman: har bir tibbiyot xodimi o‘ziga savol bersin: “Bugun inson salomatligi uchun kechagidan ko‘ra ko‘proq nima qila oldim?”. Agar har birimiz shu savolga javob qidirib ishlasak, tibbiyotimizda ham, xalqimizning salomatligida ham katta o‘zgarishlar bo‘ladi,

– dedi Prezidentimiz uchrashuv yakunida.

Facebook|Instagram|X

#_огоҳлик

Ис гази ҳаёт учун хавфлидир!

Ҳурматли фуқаролар, хоналарни иситиш учун фақат сертификатланган иситиш мосламаларидан фойдаланинг.

@piskenthayoti

#_мурожаат

ТУМАН ПРОКУРОРИ Х. МАҚСУДОВНИНГ ЖИНОЯТЧИЛИКНИНГ ОЛДИНИ ОЛИШ ВА ҲУҚУҚБУЗАРЛИКЛАРГА ҚАРШИ КУРАШИШ БОРАСИДАГИ
 М У Р О Ж А А Т И

Ассалом алайкум, ҳурматли туманимиз аҳолиси!
  
Бугунги кунда юртимизда тинчлик ва осойишталикни асраш, фуқаролар хавфсизлигини таъминлаш энг муҳим вазифаларимиздан биридир. Бироқ, жамиятимизда содир бўлаётган айрим жиноят ва ҳуқуқбузарликлар барчамиздан ҳушёрлик ва масъулиятни талаб этади.
2026 йилнинг 9 ойи давомида амалга оширилган профилактик ишлар натижасида тумандаги 23 та маҳалланинг 7 тасида жиноят содир этилишига йўл қўйилмади.
Ижтимоий профилактика самарадорлигини ошириш мақсадида ҳуқуқбузарлик содир этиш ёки ундан жабрланиш хавфи юқори бўлган шахслар бўйича 3848 та хулоса расмийлаштирилиб, шундан 3313 таси бўйича маиший ва ижтимоий муаммоларни ҳал этиш чоралари кўрилди.
Жиноят содир этиш хавфи юқори бўлган шахслар, жумладан, ишсизлар, муқаддам судланганлар, пробация ва маъмурий назоратдаги фуқаролар, меҳнат миграциясидан қайтганлар ҳамда оғир ижтимоий аҳволдаги оилалар билан манзилли ишлаш йўлга қўйилди. Шунингдек, муқаддам судланган ва маъмурий назоратда турувчи 151 нафар шахс билан индивидуал суҳбатлар ўтказилди.
Қадрли тумандошлар!
 
Бугунги кунда интернет ва ижтимоий тармоқлар орқали содир этилаётган киберфирибгарлик ҳолатлари ҳаммамизни жиддий хавотирга солмоқда. Фирибгарлар фуқароларнинг ишончига кириш, сохта ҳаволалар ва зарарли иловаларни юбориш орқали уларнинг пул маблағларини қўлга киритишга уринмоқда.
Шу сабабли сизлардан интернет тармоғида тарқатилаётган шубҳали ҳаволаларга кирмасликни, номаълум иловаларни ўрнатмасликни, банк карталари маълумотлари ва СМС кодларни бегоналарга бермасликни сўраймиз.
Осон даромад ваъда қилувчи шубҳали таклифларга ишонманг. Агар фирибгарлик ҳолатига дуч келсангиз, дарҳол  банкингизга ёки Ички ишлар органларига мурожаат қилинг.
Туманда хавфсиз муҳитни шакллантириш мақсадида 350 та видеокузатув камераси, 56 та домофон комплекси ва 116 та ташвиш тугмаси ўрнатилиб, 116 та объект техник қўриқловга олинган.
 
Азиз юртдошлар!
 
Жиноятчиликка қарши курашиш фақат ҳуқуқни муҳофаза қилувчи органларнинг вазифаси бўлмай, бу - бутун жамият, ҳар бир фуқаронинг масъулиятидир. Оилада фарзандлар тарбиясига эътиборли бўлиш, ёшларни фойдали машғулотларга жалб этиш, маҳаллада ўзаро ҳамжиҳатликни мустаҳкамлаш ва шубҳали ҳолатларга бефарқ бўлмаслик жиноятларнинг олдини олишда ғоят муҳим аҳамиятга эга эканлигини унутманг.
Барчангизни қонунларга риоя этишга, ҳушёр ва огоҳ бўлишга, маҳаллаларимизда тинчлик ва осойишталикни таъминлашда фаол иштирок этишга чақираман.
Унутманг, жиноятнинг олдини олиш — унинг оқибатларига қарши курашишдан кўра самаралироқдир.
 
Х.Мақсудов,
туман прокурори.

@piskenthayoti