ပေါင်မြို့နယ်တွင် ၂၀၂၆ ခုနှစ် ဆောင်းသီးနှံစိုက်ပျိုးရာသီအတွက် တောင်သူများကို ချေးငွေများထုတ်ချေးပေးမည်

မွန်ပြည်နယ်၊ ပေါင်မြို့နယ်မှ တောင်သူများအား ၂၀၂၆ ခုနှစ် ဆောင်းသီးနှံစိုက်ပျိုးရာသီအတွက် ချေးငွေများထုတ်ချေးပေးသွားမည်ဖြစ်ရာ မြို့နယ်ချေးငွေအကြံပေးအဖွဲ့၏ ညှိနှိုင်းအစည်းအဝေးကို နိုဝင်ဘာ ၅ ရက်ကပြုလုပ်ခဲ့ကြောင်း သိရသည်။

အစည်းအဝေးတွင် ဆောင်းသီးနှံစိုက်ပျိုးရေးအတွက် ချေးငွေထုတ်ချေးမှုလုပ်ငန်းများမှန်ကန်စနစ်တကျဖြစ်စေရေးနှင့် အမှန်တကယ်စိုက်ပျိုးလုပ်ကိုင်သည့်တောင်သူများ ချေးငွေရရှိစေရေးတို့ကို ဆွေးနွေးခဲ့ကြကြောင်း သိရသည်။

ထို့အတူ မြို့နယ်အုပ်ချုပ်ရေးမှူးကလည်း ချေးငွေထုတ်ချေးရာတွင် မှန်ကန်သည့် ပုံစံ(၇)ရှိသူများကိုသာထုတ်ချေးပေးရန်၊ ပုံစံ(၇)အတုများကို စိစစ်တွေ့ရှိပါက သက်ဆိုင်ရာဌာနများနှင့် ပေါင်းစပ်ညှိနှိုင်း၍ပယ်ဖျက်ခြင်းနှင့် အရေးယူခြင်းလုပ်ငန်းများဆောင်ရွက်ရန်ဆွေးနွေးမှာကြားခဲ့ကြောင်း သိရသည်။

ထို့ပြင် လယ်ယာမြေပေါ်တွင် နှစ်နှစ်ဆက်တိုက်စိုက်ပျိုးလုပ်ကိုင်ခြင်းမရှိသည့် လယ်မြေများကို ပြန်လည်သိမ်းယူပြီး အမှန်တကယ်စိုက်ပျိုးလုပ်ကိုင်မည့် တောင်သူများအား ပုံစံ(၇)ပြန်လည်ထုတ်ပေးရန်၊ ချေးငွေများထုတ်ချေးပေးရာတွင် သက်ဆိုင်ရာမြေယာအထောက်အထားများကို သေချာစွာစိစစ်ပြီးမှသာထုတ်ချေးပေးရန်လည်း ဆွေးနွေးမှာကြားခဲ့ကြောင်း သိရသည်။

ပေါ်တူဂီလက်ရွေးစင်အသင်းမှ ရော်နယ်ဒို အပြီးတိုင်အနားယူ

ပေါ်တူဂီအသင်း၏ ဂန္ထဝင်တိုက်စစ်မှူး ခရစ်စတီယာနို ရော်နယ်ဒို (Cristiano Ronaldo) သည် ၎င်း၏ သမိုင်းဝင် နိုင်ငံတကာ ကစားသမားဘဝကို အဆုံးသတ်ပြီး နိုင်ငံအသင်းမှ အပြီးတိုင် အနားယူပြီဖြစ်ကြောင်း ယမန်နေ့ (နိုဝင်ဘာ ၅ ရက်) က  Instagram ကနေ တရားဝင် ကြေညာချက်အရ သိရသည်။

အသက် ၄၁ နှစ်အရွယ်ရှိပြီဖြစ်သည့် ရော်နယ်ဒိုသည် ၎င်း၏ လူမှုကွန်ရက်စာမျက်နှာများတွင် ဗီဒီယိုသဝဏ်လွှာတစ်ခုကို တင်ရှိကာ နိုင်ငံအသင်း ပရိသတ်များကို နှုတ်ဆက်ခဲ့ခြင်း ဖြစ်သည်။

“အမျိုးသားအသင်းရဲ့ ဂျာစီကို ပြန်လည်ပေးအပ်ရမယ့်နေ့ ရောက်လာပါပြီ။ ကာလပတ်လုံး ကမ္ဘာတစ်ဝန်းက ကွင်းတွေထဲမှာ မိခင်နိုင်ငံရဲ့ ဂျာစီကို ဝတ်ဆင်ခွင့်၊ ကာကွယ်ခွင့်ရခဲ့တာဟာ ကျွန်တော့်အတွက် ဂုဏ်ယူစရာ အကောင်းဆုံး တာဝန်တစ်ခု ဖြစ်ခဲ့ပါတယ်။ အခုအချိန်မှာတော့ အနာဂတ်မျိုးဆက်သစ်တွေဆီ လွှဲပြောင်းပေးရမယ့် အချိန်ရောက်ပါပြီ” ဟု လည်း ရော်နယ်ဒို က ပြောကြားထားသည်။

ပေါ်တူဂီအတွက် နောက်ဆုံးပွဲစဉ်မှာ ပြီးခဲ့သည့် စက်တင်ဘာ ၂၄ ရက်က ဝေလအသင်းကို ၁-ဝ ဖြင့် နိုင်ခဲ့သည့် နေးရှင်းလိဂ်ပွဲစဉ် ဖြစ်ခဲ့သည်။

ရော်နယ်ဒိုသည် ၂၀၀၃ ခုနှစ်မှစတင်ကာ ပေါ်တူဂီလက်ရွေးစင်အသင်းအတွက် ပွဲပေါင်း ၂၃၄ ပွဲ ကစားကာ ၁၄၆ ဂိုး သွင်းယူပေးခဲ့ပြီး အမျိုးသားဘောလုံးလောကတွင် ကမ္ဘာ့ပွဲထွက်အများဆုံးနှင့် သွင်းဂိုးအများဆုံး စံချိန်ရှင်အဖြစ် သမိုင်းစိုက်ထူနိုင်ခဲ့သည်။

ပေါ်တူဂီအသင်းကို ယူရို ၂၀၁၆ ချန်ပီယံဆုနှင့် ယူအီးအက်ဖ်အေ နေးရှင်းလိဂ် ဖလားများ ရရှိအောင် အသင်းခေါင်းဆောင်အဖြစ် ဦးဆောင်ပေးခဲ့သူ ဖြစ်သည်။

နိုင်ငံတကာ ကစားသမားဘဝ (နိုင်ငံအသင်း) မှသာ အနားယူခဲ့သော်လည်း ရော်နယ်ဒိုသည် ကလပ်အသင်းအဆင့်တွင်မူ ကစားသမားဘဝ သွင်းဂိုး ၁,၀၀၀ ပြည့်မြောက်ရန်အတွက် ဆော်ဒီကလပ် အယ်လ်နာဆာ (Al-Nassr) အသင်း၌ ဆက်လက်ကစားသွားမည် ဖြစ်သည်။ ၎င်းသည် လက်ရှိတွင် ကစားသမားဘဝ သွင်းဂိုး ၉၈၅ ဂိုးအထိ သွင်းယူထားနိုင်ပြီ ဖြစ်သည်။

ရန်ကုန်တိုင်း လုံခြုံရေးနှင့် နယ်စပ်ရေးရာဝန်ကြီးအဖြစ် ဗိုလ်မှူးကြီး ကျော်ကျော်ဦးကို ခန့်အပ်

ရန်ကုန်၊ နိုဝင်ဘာ ၆

ရန်ကုန်တိုင်းဒေသကြီး လုံခြုံရေးနှင့် နယ်စပ်ရေးရာဝန်ကြီးအဖြစ် ဗိုလ်မှူးကြီး ကျော်ကျော်ဦးကို အစားထိုးခန့်အပ်ရန် ရန်ကုန်တိုင်းဒေသကြီးလွှတ်တော်က နိုဝင်ဘာ ၆ ရက်တွင် အတည်ပြုခဲ့သည်။

တတိယအကြိမ် ရန်ကုန်တိုင်းဒေသကြီးလွှတ်တော် အရေးပေါ်အစည်းအဝေး (၁/၂၀၂၆) ပထမနေ့တွင် တပ်မတော်ကာကွယ်ရေးဦးစီးချုပ်ထံမှ ပေးပို့လာသည့် ဗိုလ်မှူးကြီး ကျော်ကျော်ဦး၏ အမည်စာရင်းကို တင်သွင်းခဲ့သည်။ ကန့်ကွက်သူမရှိသဖြင့် လွှတ်တော်က အတည်ပြုခဲ့ပြီး ဗိုလ်မှူးကြီး ကျော်ကျော်ဦးက လွှတ်တော်ဥက္ကဋ္ဌရှေ့မှောက်တွင် ကတိသစ္စာပြု၍ လက်မှတ်ရေးထိုးခဲ့သည်။

ပြည်ထောင်စုရွေးကောက်ပွဲကော်မရှင် (UEC) က တိုင်းဒေသကြီးနှင့် ပြည်နယ်လွှတ်တော်များရှိ တပ်မတော်သားလွှတ်တော်ကိုယ်စားလှယ် ခုနစ်ဦးကို အစားထိုးလဲလှယ်ကြောင်း အောက်တိုဘာ ၂၁ ရက်စွဲပါ ကြေညာချက်အမှတ် (၆၅/၂၀၂၆) ဖြင့် ထုတ်ပြန်ခဲ့သည်။