မိုးယွန်းကြီးအင်းသို့ ဆောင်းခိုငှက် ၁၂ မျိုး စတင်ဝင်ရောက်ကျက်စား

ပဲခူး၊ နိုဝင်ဘာ ၆

ပဲခူးတိုင်းဒေသကြီးရှိ မိုးယွန်းကြီးအင်း တောရိုင်းတိရစ္ဆာန်ဘေးမဲ့တောသို့ ယခုဆောင်းဦးရာသီတွင် ဆောင်းခိုငှက် ၁၂ မျိုး စတင်ဝင်ရောက်ကျက်စားနေကြောင်း သိရသည်။ ပြီးခဲ့သည့် ဆောင်းရာသီက အဆိုပါအင်းတွင် ဆောင်းခိုငှက်ကောင်ရေ ၃၀,၀၀၀ ကျော် လာရောက်ကျက်စားခဲ့သည်။

ယခုရာသီတွင် ဝင်ရောက်လာသည့် ငှက်များမှာ ခရုစုတ်ခေါင်းမည်း၊ ငှက်ကြီးဝန်ပို၊ ဂေါ့တွေ့၊ မြစ်တွေး၊ ငှက်ကျား၊ ဥပန်း၊ စာဘုန်းကြီး၊ ကြိုးကြာ၊ လင်းယုန်၊ ချည်ခင်စွပ်၊ ဘဲနီစပ်နှင့် နှုတ်သီးဂေါက်ကြီးတို့ဖြစ်သည်။

အယ်လ်နီညိုဖြစ်စဉ်ကြောင့် ယခုဆောင်းရာသီတွင် ဆောင်းခိုငှက်များ ဝင်ရောက်ကျက်စားပုံ ပြောင်းလဲနိုင်ခြေကို စောင့်ကြည့်လျက်ရှိသည်။ လက်ရှိတွင် မိုးယွန်းကြီးအင်းနှင့် ဆက်စပ်ရေဝပ်ဒေသများသို့လည်း ဆောင်းခိုငှက်များ စတင်ဝင်ရောက်လာကြောင်း သိရသည်။

မိုးယွန်းကြီးအင်းအပြင် လန်ပိအဏ္ဏဝါအမျိုးသားဥယျာဉ်၊ အင်းလေးကန်၊ အင်းတော်ကြီးကန်၊ မိန်းမလှကျွန်းနှင့် စလင်းဝက်သည်းကန်တို့တွင်လည်း ဆောင်းခိုငှက်များ နှစ်စဉ်လာရောက်ကျက်စားလေ့ရှိသည်။

ဖွဲ့စည်းပုံအခြေခံဥပဒေ ၄၃ ချက် ပြင်ဆင်ရေး လေ့လာမည့် ပူးပေါင်းကော်မတီဖွဲ့ရန် လွှတ်တော် အတည်ပြု

နေပြည်တော်၊ နိုဝင်ဘာ ၅

၂၀၀၈ ခုနှစ် ဖွဲ့စည်းပုံအခြေခံဥပဒေတွင် ပြင်ဆင်ဖြည့်စွက်သင့်သည့် အချက် ၄၃ ချက်ကို လေ့လာသုံးသပ်ပြီး ဥပဒေကြမ်းပြုစုရန် ပူးပေါင်းကော်မတီတစ်ရပ် ဖွဲ့စည်းရေးကို ပြည်ထောင်စုလွှတ်တော်က နိုဝင်ဘာ ၅ ရက်တွင် အတည်ပြုခဲ့သည်။

တတိယအကြိမ် ပြည်ထောင်စုလွှတ်တော် တတိယပုံမှန်အစည်းအဝေး နဝမနေ့တွင် ပဲခူးတိုင်းဒေသကြီး အမျိုးသားလွှတ်တော် မဲဆန္ဒနယ်အမှတ် (၇) မှ ဦးဇင်မင်းထက်က အဆိုတင်သွင်းခဲ့ခြင်းဖြစ်သည်။ အဆိုတွင် ဖွဲ့စည်းပုံအခြေခံဥပဒေပါ အချက် ၄၃ ချက်အပြင် ပြည်ထောင်စုသဘောတူစာချုပ် (Union Accord) အစိတ်အပိုင်း (၁)၊ (၂) နှင့် (၃) ပါ အချက်များကိုပါ လေ့လာသုံးသပ်ရန် ထည့်သွင်းထားသည်။

ထာဝရငြိမ်းချမ်းရေးနှင့် အမျိုးသားပြန်လည်သင့်မြတ်ရေး လုပ်ငန်းစဉ်များတွင် အပြန်အလှန်ယုံကြည်မှု တည်ဆောက်နိုင်ရန် လိုအပ်သည့် ပြင်ဆင်မှုများ ဆောင်ရွက်သင့်ကြောင်း ဦးဇင်မင်းထက်က အဆိုတင်သွင်းစဉ် ပြောကြားခဲ့သည်။

အဆိုကို အမရပူရမဲဆန္ဒနယ်မှ ဦးသိန်းထွန်းဦးက ထောက်ခံဆွေးနွေးခဲ့ပြီး ပြည်ထောင်စုလွှတ်တော်နာယကက လွှတ်တော်၏ သဘောထားရယူရာ သင့်လျော်သည့် ပြည်ထောင်စုလွှတ်တော်ကိုယ်စားလှယ်များဖြင့် ပူးပေါင်းကော်မတီဖွဲ့စည်းရန် သဘောတူအတည်ပြုခဲ့သည်။

ဗန်ကောက်မြို့ မြန်မာသံရုံးက ပတ်စ်ပို့သက်တမ်းပြတ် ဒ-ဏ်ကြေးကောက်ခံမှုပြောင်းလဲသတ်မှတ်၊

(၂) နှစ်မှ (၅) နှစ်အထိ သက်တမ်းပြတ်တောက်နေသူများ ဒ-ဏ်ကြေး ထိုင်းဘတ် ၅၅၀ ပေးဆောင်ရမည်

ဗန်ကောက်၊ နိုဝင်ဘာ ၆

ထိုင်းနိုင်ငံရောက် မြန်မာနိုင်ငံသားများ သာမန်မြန်မာနိုင်ငံကူးလက်မှတ် (Passport) သက်တမ်းတိုး လျှောက်ထားရာတွင် သက်တမ်းပြတ်ဒဏ်ကြေး ကောက်ခံမှုများနှင့် လုပ်ထုံးလုပ်နည်းများကို ပြောင်းလဲသတ်မှတ်လိုက်ကြောင်း ဗန်ကောက်မြို့ရှိ ပြည်ထောင်စုသမ္မတမြန်မာနိုင်ငံတော်သံရုံးက နိုဝင်ဘာလ ၅ ရက်နေ့တွင် အသိပေး ကြေညာထားသည်။

အဆိုပါ သတ်မှတ်ချက်အသစ်ကို ၂၀၂၆ ခုနှစ်၊ နိုဝင်ဘာလ ၆ ရက်နေ့မှ စတင်၍ ပြောင်းလဲ သတ်မှတ်မည်ဖြစ်ကြောင်း သိရသည်။

နိုင်ငံကူးလက်မှတ်သက်တမ်း (၂) နှစ်မှ (၅) နှစ်အတွင်း ပြတ်တောက်နေသူများ အနေဖြင့် သက်တမ်းပြတ်ဒဏ်ကြေးအဖြစ် ထိုင်းဘတ်ငွေ ၅၅၀ဘတ် အား ပေးဆောင်ရမည် ဖြစ်ကြောင်း အသိပေးထားသည်။

ထိုပြင် နိုင်ငံကူးလက်မှတ်သက်တမ်း (၅) နှစ်နှင့်အထက် ပြတ်တောက်နေသူများ အနေဖြင့် နိုင်ငံကူးလက်မှတ် သက်တမ်းတိုးခြင်းကို  မြန်မာနိုင်ငံသို့ ပြန်လည်၍ ဆောင်ရွက်နိုင်ရန်အတွက် တစ်ကြိမ်တစ်ခါသုံး မည်သူမည်ဝါဖြစ်ကြောင်း သက်သေခံလက်မှတ် (C of I) ကိုသာ လျှောက်ထားရမည် ဖြစ်ကြောင်း သိရသည်

ဒီဇင်ဘာလူထုအားကစား စာပေနှင့် ဓာတ်ပုံပြိုင်ပွဲ ပထမဆု ကျပ် ၁၀ သိန်းစီ ချီးမြှင့်မည်

နေပြည်တော်၊ နိုဝင်ဘာ ၆

၂၀၂၆ ခုနှစ် ဒီဇင်ဘာလူထုအားကစားလှုပ်ရှားမှု အထိမ်းအမှတ် ဝတ္ထုတို၊ ဆောင်းပါး၊ ကဗျာနှင့် ဓာတ်ပုံပြိုင်ပွဲများ ကျင်းပမည်ဖြစ်ပြီး ပြိုင်ပွဲဝင်လက်ရာများကို ၂၀၂၇ ခုနှစ် ဇန်နဝါရီ ၁၉ ရက် နောက်ဆုံးထား ပေးပို့နိုင်ကြောင်း ပြိုင်ပွဲဖိတ်ခေါ်ချက်အရ သိရသည်။ ပြိုင်ပွဲတစ်မျိုးစီအတွက် ပထမဆု ကျပ် ၁၀ သိန်း၊ ဒုတိယဆု ကျပ် ၈ သိန်း၊ တတိယဆု ကျပ် ၆ သိန်းနှင့် နှစ်သိမ့်ဆု ကျပ် ၅ သိန်း ချီးမြှင့်မည်ဖြစ်သည်။

စာပေပြိုင်ပွဲဝင်များသည် လူထုအားကစားတွင် ပြည်သူများ ပိုမိုပါဝင်လာရေး၊ အားကစားနှင့် ကျန်းမာရေး၊ လူငယ်ဖွံ့ဖြိုးရေး၊ ရပ်ရွာအခြေပြု အားကစားဖွံ့ဖြိုးရေးနှင့် နိုင်ငံတကာပြိုင်ပွဲများတွင် အောင်မြင်မှုရရှိရေးတို့အတွက် အကြံပြုချက်များကို မိမိနှစ်သက်ရာ ခေါင်းစဉ်ဖြင့် ရေးသားရမည်။ စာမူများကို Microsoft Word တွင် Unicode Pyidaungsu စာလုံးအရွယ် ၁၃ ဖြင့် ရေးသားရမည်ဖြစ်ပြီး A4 စာမျက်နှာအရေအတွက်ကို ဝတ္ထုတို ၁၁ မှ ၁၂ မျက်နှာ၊ ဆောင်းပါး ၉ မှ ၁၀ မျက်နှာနှင့် ကဗျာ ၅ မှ ၆ မျက်နှာ သတ်မှတ်ထားသည်။

ဓာတ်ပုံပြိုင်ပွဲတွင် ၂၀၂၆ ခုနှစ် ဒီဇင်ဘာလ လူထုအားကစားလှုပ်ရှားမှုများနှင့် ၂၀၂၇ ခုနှစ် (၇၉) နှစ်မြောက် လွတ်လပ်ရေးနေ့အထိမ်းအမှတ် အားကစားပြိုင်ပွဲများ၏ မှတ်တမ်းဓာတ်ပုံများကို တင်သွင်းနိုင်သည်။ ရောင်စုံဓာတ်ပုံများကို ၁၀ လက်မ × ၁၄ လက်မ အရွယ်ဖြင့် ခေါင်းစဉ်တပ်၍ ပေးပို့ရမည်။ ယခင်နှစ်များက ဆုရရှိခဲ့သည့် ဓာတ်ပုံကို ထပ်မံတင်သွင်းကြောင်း စိစစ်တွေ့ရှိပါက အဆိုပါပြိုင်ပွဲဝင်၏ အခြားဓာတ်ပုံများကိုပါ ပယ်ဖျက်မည်ဖြစ်သည်။ စာမူနှင့် ဓာတ်ပုံများကို အရေအတွက်ကန့်သတ်ချက်မရှိ တင်သွင်းနိုင်သည်။

ပြိုင်ပွဲဝင်လက်ရာများကို Soft Copy တစ်ချပ်၊ Hard Copy တစ်စုံဖြင့် ညွှန်ကြားရေးမှူး၊ လူထုအားကစားနှင့် ပညာပေးဌာနခွဲ၊ အားကစားနှင့် ကာယပညာဦးစီးဌာန၊ နေပြည်တော် အားကစားလေ့ကျင့်ရေးစခန်း (Cluster 5-1) သို့ ပေးပို့ရမည်။ ပြိုင်ပွဲဝင်သူ၏ လိုင်စင်ဓာတ်ပုံ ၂ ပုံ၊ နိုင်ငံသားစိစစ်ရေးကတ်ပြား မိတ္တူမှန်တစ်စောင်နှင့် လက်ရာကို ကိုယ်တိုင်ရေးသားထားကြောင်း သို့မဟုတ် ကိုယ်တိုင်ရိုက်ကူးထားကြောင်း ဝန်ခံချက်တို့ကို ပူးတွဲတင်ပြရမည်။

သတ်မှတ်ရက်ကျော်လွန်၍ ပေးပို့သည့် လက်ရာများနှင့် အထောက်အထား မပြည့်စုံသည့် လက်ရာများကို ထည့်သွင်းစဉ်းစားမည်မဟုတ်ပေ။ ဆုရစာမူများကို နေ့စဉ်ထုတ်သတင်းစာများ၊ ဌာန၏ လစဉ်သတင်းလွှာနှင့် အားကစားဂျာနယ်များတွင် ဖော်ပြမည်ဖြစ်ပြီး ပြိုင်ပွဲအသေးစိတ်ကို ၀၉ ၂၅၅၈၃၂၄၉၉၊ ၀၉ ၄၂၀၁၃၄၂၈၀ နှင့် ၀၉ ၄၂၈၇၁၀၇၀၀ တို့သို့ ဆက်သွယ်မေးမြန်းနိုင်သည်။သိရသည်။