🇺🇿🥊✅Расман. Руслан Абдуллаев Golden Boy промоутерлик компанияси билан шартнома имзолади

Фаолиятини профессионал боксда давом эттираётган ўзбекистонлик жаҳон чемпиони Руслан Абдуллаев афсонавий Оскар Де Ла Хойя бошчилигидаги Golden Boy промоутерлик компанияси аъзосига айланди. Бу ҳақда компания матбуот хизмати хабар берди.

22 ёшли Руслан проф фаолияти давомида ҳозирча битта жанг ўтказиб, ғалабага эришган. У 7 март куни Индио шаҳрида бўлиб ўтган бокс оқшоми доирасида Хосе Валенсуэла Альварадони нокаутга учратган эди.

🤝Golden Boy компанияси билан Абдуллаевдан ташқари яна бир ўзбекистонлик боксчи — Бектемир Мелиқўзиев ҳам ҳамкорлик қилади.

Обуна бўлинг 👉 Телеграм

🇯🇵🇺🇸🥊Расман: Наоя Иноуэ 4 йиллик танаффусдан кейин АҚШда жанг ўтказади

Иккинчи энг енгил вазнда мутлақ жаҳон чемпиони, япониялик Наоя Иноуэ (29-0, 26 КО) ҳамда америкалик Рамон Карденас (26-1, 14 КО) ўртасидаги жанг расман эълон қилинди.

🇺🇸Чемпионлик жанги 4 май куни АҚШнинг Лас-Вегас шаҳридаги T-Mobile Arena мажмуасида бўлиб ўтади. Бу Иноуэнинг 2021 йилдан бери АҚШдаги илк жанги бўлади.

Наоя ушбу жангда ғалаба қозонган тақдирда сентябрь ойида Японияда WBA Interim чемпиони, ўзбекистонлик Муроджон Аҳмадалиев билан тўқнаш келади.

Обуна бўлинг 👉 Телеграм

🇺🇦🇳🇿🥊WBO Александр Усикка расмий даъвогар берди

Бутунжаҳон бокс ташкилоти Александр Усикка WBO камарини ҳимоя қилиши учун расмий ва мажбурий рақиб тайинлади.

Украиналик жаҳон чемпиони ўз камарини Янги Зеландия вакили Жозеф Паркердан ҳимоя қилади. Боксчилар ва уларнинг жамоалари ихтиёрида келишиб олиш учун 30 кун муҳлат бор. Агар белгиланган муддатда томонлар келишувга эришмаса, WBO промоутерлар учун очиқ савдо эълон қилади.

Айни пайтда Александр Усикнинг асосий мақсади яна мутлақ жаҳон чемпиони бўлиш. Бунинг учун у IBF чемпионлик камарини қайтариб олиши керак бўлади. Ҳозирда ушбу камар Даниэль Дюбуага тегишли бўлиб турибди. Усикнинг менежери Александр Красюкнинг айтишича, ҳозирда Дюбуанинг жамоаси билан музокара давом этмоқда.

Обуна бўлинг 👉 Телеграм

🇲🇽🇨🇺🥊Сауль Альварес - Уильям Скалл оқшомининг тўлиқ карди тасдиқланди

🇸🇦3 май куни Саудия Арабистони пойтахти Ар-Риёд шаҳрида Riyadh Season промоушени томонидан навбатдаги катта проф бокс оқшоми ўтказилади.

Ташкилотчилар ушбу турнирнинг тўлиқ кардини тасдиқлашди. Асосий жанг тўрта вазн тоифасида жаҳон чемпиони Сауль Альварес (62-2-2, 39 KO) иштирокида бўлиб ўтади. Мексикалик афсона иккинчи ўрта вазн (76,2 кг) тоифасида мутлақ жаҳон чемпионлиги учун кубалик Уильям Скалл (23-0, 9 KO)га қарши рингга кўтарилади. Сауль "Канело" Riyadh Season билан тўртта жанг учун шартнома имзолаган.

Оқшомнинг co main-event жангида мексикалик яна бир таниқли боксчи Хайме Мунгиа франциялик Бруно Сурасга қарши реванш жангини ўтказади. Мунгиа ўтган йилнинг декабрь ойида ўзи туғилиб ўсган Тихуана шаҳрида ўтган илк жангда Сурасга кутилмаганда ютқазиб қўйганди. Француз боксчиси номдор рақибини ҳамюртлари кўз ўнгида олтинчи раундда нокаутга учратган эди.

Яна бир қизиқарли жанг супероғир вазнда Мартин Баколе ва Эфе Аджагба ўртасида кечади. Февраль ойида Баколе жароҳат сабаб сафдан чиққан Дэниэль Дюбуанинг ўрнига Жозеф Паркерга қарши жанг ўтказишга розилик берганди. Икки кун қолганда жангни қабул қилиб олган Мартин иккинчи раунддаёқ нокаутга учраган эди.

Биринчи оғир вазнда янги WBC чемпиони Баду Жек канадалик мажбурий даъвогар Райан Розицкидан ўз камарини ҳимоя қилади. Шунингдек, 3 май кунги турнирда мексикалик 23 ёшли Марко Верде профессионал боксдаги дебют жангини ватандоши Мичел Галван Полина (4-5-3, 2 КО)га қарши ўтказади. Марко ўтган йили Париж-2024 Олимпиадасида кумуш медални қўлга киритганди.

🇸🇦Riyadh Season турнирининг тўлиқ карди:

Сауль Альварес (Мексика) — Уильямс Скалл (Куба)

Хайме Мунгия (Мексика) – Бруно Сурас (Франция)

Мартин Баколе (Конго Демократик Республикаси) – Эфе Аджагба (Нигерия)

Баду Жек (Швеция) – Райан Розицки (Канада)

Брайан Леон (Куба) – Аарон Герреро (Мексика)

Марко Верде (Мексика) – Мишель Полина (Мексика)

Обуна бўлинг 👉 Телеграм

🇺🇿🇰🇿🥊Расман. Отабек Холматовнинг Қозоғистонда жанг қилиши тасдиқланди

Ярименгил вазн тоифасида WBA камари учун собиқ даъвогар, ўзбекистонлик профессионал боксчи Отабек Холматовнинг навбатдаги жанги тасдиқланди.

Аввал маълум қилганимиздек, Холматов 5 апрель куни Қозоғистоннинг Астана шаҳрида Top Rank промоутерлик компанияси томонидан ташкил этиладиган бокс оқшоми доирасида филиппинлик боксчи Жейсон Канойга қарши рингга кўтарилади.

Ушбу жанг ташкилотчилар томонидан расман тасдиқланди. Ҳамюртимиз ҳозирда мазкур жангига АҚШнинг Калифорния штати, Индио шаҳрида Бектемир Мелиқўзиев, Муроджон Аҳмадалиев каби ўзбекистонлик чарм қўлқоп усталари билан бирга тайёргарлик кўрмоқда.

Маълумот учун, Отабек Холматов фаолияти давомида 13 та жанг ўтказиб, 12 ғалаба ва 1 мағлубият қайд этган. У сўнгги жангини ўтган йилнинг март ойида вакант бўлиб турган WBA камари учун Раймонд Фордга қарши ўтказиб, 12-раунд якунланишига бир неча сониягина қолган бир паллада аламли тарзда имкониятни бой берганди.

Таққослаш учун, Каной ҳисобида 30 ғалаба, 12 мағлубият ва 2 та дуранг бор.

Обуна бўлинг 👉 Телеграм

🌸🌺💐Наврўзи айём муборак!

Бугун, 21 март - миллий ва қадимий байрамимиз Наврўз нишонланадиган кун!

Наврўз, энг аввало, эзгулик элчиси! Байрам кунлари етти ёшдан етмиш ёшгача барча бир-бирига меҳр-мурувват кўрсатиши, деҳқонларимиз яхши ният билан ерга уруғ қадаши, отахонларимиз набиралари, фарзандлари билан кўчат экиши, маҳаллаларда боғ яратиш, ободонлаштириш ишлари авж олиши ҳам эзгуликка қаратилган.

Халқимизда яхши бир гап бор: Тинч, озод ва обод юртга байрамлар ярашади. Ўзбекистон профессионал бокс федерацияси халқимизни байрам билан муборакбод этади. Наврўз айёминингиз муборак бўлсин, азиз юртдошлар!

✍️Ўзбекистон профессионал бокс федерацияси матбуот хизмати

Обуна бўлинг 👉 Телеграм

🇺🇿🥊Жалолов ва Холматов рингга чиқадиган Астана турнирининг ҳозиргача тасдиқланган жанглари

🇰🇿Хабарингиз бор, 5 апрель куни Қозоғистоннинг Астана шаҳрида Top Rank промоутерлик компанияси томонидан профессионал бокс оқшоми ўтказилади.

Турнир доирасида супероғир вазн тоифасидаги чарм қўлқоп устамиз Баҳодир Жалолов украиналик Игорь Шевадзуцкий, ярименгил вазндаги Отабек Холматов эса филиппинлик Жейсон Канойга қарши рингга кўтарилади.

✅Карднинг тасдиқланган жанглари:

Жанибек Алимханули - Анауэль Нгамиссенге

Султан Заурбек - Азинга Фузиле

Батир Жукембаев - Кейн Гардне

Балауса Муздиман - Розалинда Родригес

Махмуд Сабирхан - Жей Фрэнсис Бурай.

Обуна бўлинг 👉 Телеграм

🇺🇸🥊Бокс афсонаси Жорж Форман 76 ёшида вафот этди

Бокс тарихидаги энг катта номлардан бири, Олимпиада-1968 чемпиони, проф бокс рекордчиси Жорж Форман ҳаётдан кўз юмди.

Афсонанинг ўлими сабаблари маълум эмас. Унинг оила аъзолари қаричилик дейишяпти.

"Қалбимиз чирпарчин бўлди. Чуқур қайғу билан шуни маълум қиламизки, энди орамизда катта Жорж Эдвард Форман йўқ. У 2025 йилнинг 21 март куни бу дунёни ўз яқинлари ёнида тарк этди. Жорж севимли умр йўлдош, ота, бобо, оддийликни яхши кўрадиган шунчаки катта номдаги инсон эди", дейилади Форманлар оиласи баёнотида.

— Жорж Форман 1968 йил Мехикода ўтган Олимпиада чемпиони

— 1973 йилда профессионал бокснинг супероғир вазн тоифасида жаҳон чемпиони бўлган. Ўшанда у яна бир афсона Жо Фрэйзерни иккинчи раундда нокаутга учртганди

— 1974 йил Зоир (ҳозирги Конго Демократик Республикаси) давлатида ўтказилган ва Rumble in the Jungle жанги сифатида тарихга муҳрланган аср жангида афсонавий Муҳаммад Алига имконияти бой бериб, бокс билан хайрлашганди

— Ўзида ирода топиб, 1987 йил, 38 ёшида яна катта боксга қайтган. 1994 йил 45 ёшида Майкл Мурерни мағлубиятга учратиб, рекорд соҳибига айланган (бу рекорд ҳалигача янгилангани йўқ).

— Жорж Форман 1997 йилда 76-5 (68 KO) рекорди билан профессионал боксдаги фаолиятини якунлаган

— Боксдан кейинги ҳаёти тадбиркорлик билан ўтди. У George Foreman Grill брендига асос солди.

— Беш маротаба уйланган, 12 нафар фарзанднинг отаси (5 ўғил, 7 қиз).

Обуна бўлинг 👉 Телеграм

🇺🇸🥊Мадримовнинг вазнидаги Фундора қайтмоқда, у эртанги жанги олдидан тарозига чиқди

Бизнинг вақт билан эртага тонг саҳарда АҚШнинг Невада штати Лас-Вегас шаҳрида навбатдаги профессионал бокс турнири ўтказилади.

Оқшомнинг асосий жангида биринчи ўрта вазн тоифасида WBC ва WBO йўналишлари чемпиони Себастьян Фундора даъвогар Чордейл Букерга қарши рингга кўтарилади. Эртанги жанг олдидан боксчилар тарозидан ўтиш маросимида ҳозир бўлишди.

Ҳар икки боксчи ҳам тарозида белгиланган вазн меъёрини бажаришди. Фундора — 69,3 кг; Букер — 69,2 кг вазн қайд этди.

Маълумот учун, Фундора ўзининг сўнгги жангини 2024 йилнниг март ойида эндиликда биринчи ўрта вазнда собиқ жаҳон чемпиони Тимофей Цзюга қарши ўтказиб, ғалаба қозонганди. Букер эса ўтган йилнинг июнида Демьен Чавесни учинчи раундда техник нокаутга учратан эди.

Обуна бўлинг 👉 Телеграм

🇯🇲Тарихий жанглар рукни. 1973 йил, "Миллий" стадион, Кингстон, Ямайка:

Бокс афсоналари Жорж Форман ва Жо Фрейзер ўртасида кечган тарихий жанг. Ушбу жанг "The Sunshine Showdown" номи билан ҳам машҳурликка эришган.

Жанггача супероғир вазнда жаҳон чемпиони бўлган Фрейзер ажойиб натижа (29-0, 25 KO) қайд этиб турганди. У 1968 йил NYSAC, 1970 йилда Жимми Эллисни мағлуб этиб, WBA ва WBC чемпионлик камарларини қўлга киритган эди. Унинг энг катта ғалабаси шубҳасиз, 1971 йилда Муҳаммад Алини мағлуб этгани бўлдганди. Ўша тарихий тўқнашув "Аср жанги" (Fight of the Century) деб ном олган эди.

Форман 1968 йил 24 ёшида Олимпиада чемпионлигига эришганди. У 37 та жангидан 34 тасида рақибларини нокаутга учратганди. Форман жанг давомида Фрейзерни 6 маротаба (3 бор биринчи ва яна 3 бор иккинчи раундда) нокдаун ҳолатига тушириб, иккинчи раундда техник нокаут эвазига ғалаба қозонганди.

Ушбу жанг The Ring журнали томонидан 1973 йилнинг энг яхши жанги деб топилган эди...

Обуна бўлинг 👉 Телеграм

🇺🇿🥊Янгиланган WBO рейтингидан 4 боксчимиз жой олди

Бутунжаҳон бокс ташкилоти (WBO) янгиланган рейтингни эълон қилди.

✅Ундан тўрт нафар ўзбекистонлик боксчи ўрин олди:

Олимжон Назаров (ўта енгил вазн тоифаси - 50,8 кг) 3-ўриндан жой олди;

Шаҳрам Ғиёсов (яримўрта вазн тоифаси - 66,6 кг) 7-ўринни эгаллаб турибди;

Исроил Мадримов (суперўрта вазн тоифаси -69,9 кг) 9-ўринга жойлаштирилди;

Бектемир Мелиқўзиев (суперўрта вазн - 76,2 кг) 10-ўринга жойлашди.

Обуна бўлинг 👉 Телеграм

😥Айбсиз боксчи 47 йиллик қамоқ учун $1,48 миллион доллар компенсация пули олди

У қатл жазосини энг узоқ муддат кутган инсон бўлди.

🇯🇵Япониялик Ивао Хакамада 1966 йилда қамоққа олинган. Ўша вақтда у боксчилик фаолиятини якунлаб, мисо (японча идиш) ишлаб чиқариш фабрикасида ишлаётган эди. Бир куни у ўз бошлиғининг уйида ёнғинни ўчиришга ёрдам бераркан, бошлиқ, хотини ва икки фарзанди пичоқлаб ўлдирилганини кўриб қолади.

Полиция уни асосий гумондор сифатида кўрган. Хакамада ҳатто жиноятни тан олган, аммо кейинчалик аниқланишича, у қийноқлардан сўнг айбни тан олган. 1968 йилда суд уни айбдор деб топиб, қатл этишга – осиб ўлдириш жазосига ҳукм қилди.

Бироқ ҳукм ижроси мунтазам равишда кечиктириб келинди. 1992 йилда у қамоқда ёзган "Худойим, бу қанча давом этади?" китобини нашр қилди. 2011 йилда эса "Гиннесс рекордлари" китобига энг узоқ муддат қатлни кутган маҳбус сифатида киритилди. Унинг учун ҳар куни охиргиси бўлиши мумкин эди.

2014 йилда суд ишни қайта кўриб чиқиб, Хакамадани озод қилди – у деярли 48 йил қамоқда ўтириб чиққанди. Озод бўлганидан сўнг, у WBC томонидан фахрий чемпионлик камари билан тақдирланди.

Тергов давомида аниқланишича, полиция далилларни сохталаштирган, ҳамда воқеа жойида топилган ДНК намунаси Хакамаданики эмас эди. Аммо, унинг оқланиши учун яна 10 йил керак бўлди – фақат 2024 йилда, ҳибсга олинганидан 58 йил ўтибгина...

Ҳозирда 89 ёшдаги собиқ боксчи ҳар бир ноқонуний қамоқ куни учун 83 доллар миқдорида компенсация олади. Жами сумма - 1,48 миллион доллар. Бу тарихдаги энг катта товон пулидир.

Шу йиллар давомида адолат учун курашган Хакамаданинг синглиси эса "бу пуллар у ўтказган азобларни оқламайди" дейди...

Обуна бўлинг👉 Olamsportcom

🇺🇿🥊Тўрт боксчимиз қатнашадиган WBC Гран-присининг бошланиш санаси эълон қилинди

Бутунжаҳон бокс кенгаши (WBC) ташкил этадиган Гран-при 17 апрель куни бошланади.

Бу ҳақда ташкилот президенти Маурисио Сулейман ўзнинг X (Twitter)даги саҳифасида хабар берди.

"Riyadh Season билан ҳамкорликдаги Гран-прига тайёр бўлинг. Бокс оламидаги янги авлод чемпионларини аниқлаш учун 128 нафар чарм қўлқоп устаси рингда бирлашади. Турнир 17-20 апрель кунлари BlvdCity'да бўлиб ўтади", деб ёзди Сулейман.

Маълумот учун, ушбу мусобақада ёши 26 га етмаган ҳамда проф боксда 16 та жанг ўтказиб улгурмаган иқтидорли боксчилар иштирок этади.

Аввалроқ ушбу турнирда Мужибилло Турсунов, Лазизбек Мулложонов, Камронбек Эшматов ва Суҳроб Қаюмов қатнашиши ҳақида хабар бергандик.

Обуна бўлинг 👉 Телеграм

🤲🌜Ийд Рамазон муборак!

Ўзбекистон профессионал бокс федерацияси ҳамюртларимизни муқаддас Ийд Рамазон байрами билан муборакбод этади.

Яратган юртимиз тинчлиги, осмонимиз мусаффолигини бардавом қилсин. Қалбингизда неки пок тилаклар бўлса, барчаси ижобат топсин. Хонадонгизга тинчлик, дастурхонингизга тўкинлик, қут-барака тилаймиз!

Обуна бўлинг 👉 Телеграм