Nasiba Abdullayevaning "Ko‘z yoshimiz" qo‘shig‘i.
Birinchi marta so‘zlariga jiddiy eʼtibor berib eshitdim, shekilli.
Ha, odam toki o‘sha holatni boshidan o‘tkazmaguncha his qilmas ekan...
Ishda, kundalik tashvishlarda band bo‘lish qanday yaxshi. Umring o‘tib ketayotgani haqida o‘ylashga imkon bo‘lmasa yaxshi. O‘ylash esa odamni shu qadar qayg‘uga soladiki...
Alloh umrimizni xayrli va barakali qilsin...

@psixolingvist

Biz hayotni mantiqqa bo‘ysunadi deb o‘ylaymiz. Ammo insonlararo munosabatlarda mantiq ko‘p ham ishlayvermaydi.

Mantiqan kim boshqa odam haqida ko‘proq qayg‘ursa, u haqida ham boshqa odam shunday qayg‘urishi, juda bo‘lmaganda o‘sha qayg‘urgan odamning munosabatini qadrlashi kutiladi.
Lekin hayotda, odatda, o‘sha qayg‘urgan odamdan boshqa qayg‘urmagan, tushunmagan insonlardan ko‘ra ko‘proq xafa bo‘lishadi. Nimaga bunaqa bo‘ladi, deb o‘yladim. Balki, aynan qayg‘urgan odamga sizning xafa bo‘lish-bo‘lmasligingiz baribir emas. U siz xafa bo‘lmasligingizni istaydi. Qaysidir maʼnoda uning siz haqingizda qayg‘urganini ojizlik o‘laroq ko‘rasiz, o‘zingizdan past ko‘rasiz yaʼni... Aynan o‘zingizdan past ko‘rish xafa bo‘lish ko‘rinishida bu munosabatni qadrlamaslik o‘laroq yuzaga chiqadi.
O‘zingizni seving, o‘zingizga eng ko‘p qayg‘uring deyayotgan psixologu nopsixologlar haq bo‘lsa kerak...

@psixolingvist

Eron bilan o‘yin yaxshi bo‘ldi a?
Shomurodov krasavchik, ikkita gol ham o‘ziga munosib bo‘ldi. Hammasidan qo‘shimcha daqiqalarda urilgan golga xursand bo‘ldim.
Bo‘larkanu e, Eronni yutsak ham. Men muxlislik qilgan paytlar nuqul yutqizardik. Nahotki, shu kunlarni ko‘rdik, devordim.
Yaxshi o‘ynashdi. Barakalla!

@psixolingvist

Qadrli o‘quvchilarim, ustoz va murabbiylar kuni muborak bo‘lsin!
Ustoz-shogirdlik munosabatlaringiz doim samimiyat, odamgarchilik asosiga qurilsin.
O‘rganganlaringiz va o‘rgatganlaringiz doim yaxshilikka xizmat qilsin.
Ham kasbingizda, ham oilangizda baxtli bo‘ling.

@psixolingvist

“O‘sha kunlarga afsuslanaman” – Surxondaryo hokimi bilan tortishgan maktab direktori Umida Tursunova bilan suhbat

2023-yilning 26-iyulida Surxondaryo viloyati Sariosiyo tumanida viloyat hokimi Ulug‘bek Qosimov va shu tumandagi 28-maktab direktori Umida Tursunova o‘rtasida tortishuv bo‘lgan edi. Shundan keyin direktor 15 sutkaga qamaldi, mahalladoshi tomonidan esa kaltaklandi.

Bu mojarolar ta’lim tizimi haqida gap ketganda haligacha tilga olinadi. Viloyat hokimiga qarshi chiqqan o‘qituvchining hozirgi taqdiri ko‘pchilikka qiziq edi. Gazeta muxbiri Sariosiyodagi 28-maktabda bo‘lib, uning direktori Umida Tursunova bilan suhbatlashdi.

“Aytadigan gapim balki kimgadir yoqmas, lekin hech qaysi ayolga bunchalik kurashib, sog‘ligini yo‘qotishni maslahat bermasdim. O‘zlariga qulay bo‘lgan joyda, yo‘l beradigan odamlar ichida ishlashlari tarafdoriman. O‘sha xotiralarimni hozir ham esalasam, xafa bo‘lib ketaman. Avvalroq shu ishdan voz kechib ketishim kerak ekan-da. Baribir yolg‘iz o‘zim hech narsa qilolmas ekanman”, – deydi Umida Tursunova.

Matn: https://www.gazeta.uz/uz/2026/10/01/28-maktab/

Video: https://youtu.be/rQvGzdUZNFI

Otabek Turdiyev

@gazetauzmaxsus

Uzoq kutilgan, bizga bog‘liq bo‘lmagan ayrim sabablarga ko‘ra biroz kechikkan kitoblarimiz nihoyat bugundan sotuvga chiqdi.

“Asl intellekt” turkumidagi ilk ikki kitob – Anthony Weston’ning “Argument: asoslash va bahs mahorati” va Sergey Povarninning “Kitobni qanday o‘qish kerak” kitoblarini quyidagi do‘konlardan xarid qilishingiz mumkin:

🔹Asaxiy kitob do‘konlari va internet do‘konida

🔹Qamar do‘konlarida va online buyurtma

Do‘konlar ro‘yxati yangilab boriladi. Kitoblarning chakana savdodagi narxlarini har bir do‘kon o‘zi belgilagani uchun narxlar bir-biridan biroz farq qilishi mumkin.

Qoyil! Sa’dullo akaga chindan havasdaman (#)

#til

"Bejog‘im!" deb ko‘p tanbeh eshitganmiz bolalikda, xuligan degani.

So‘z ildizini rosa qidirdim, aslida juda oson ekan: "beyoqim"ning qipchoq lahjasidagi talaffuzi.

Lekin "bejog‘im"da erkalash ham bor, "beyoqim"day beyoqim emas😂

Avvalgi post Farrux Jabborbekdan.

Men uni o‘qib "bejo" so‘zini esladim. Fikrimcha bejo- beyoq, yaʼni bir yoqlik emas, tinch turmaydi maʼnosini beradi.
Menda shunday taassurot bo‘ldiki, bejog‘im so‘zi ham, agarki, bolaga nisbatan ishlatilgan bo‘lsa, be+yoq+im yaʼni, tinch turmaydigan bolam maʼnosi bo‘lsa kerak.

Men bu "bejog‘im" so‘zini birinchi marta ko‘rib turibman. Aynan nima maʼnoda qo‘llanganini nutqiy vaziyatlarni tahlil qilish orqali aniqroq belgilash mumkin.

Biladiganlar, kontekst beringlar, iltimos.

@psixolingvist

Xulosalasak, yozilgan izohlarga qaraganda, bejog‘im so‘zi beyoqim, yaʼni yoqimsiz so‘zining sheva varianti bo‘lish ehtimoli yuqoriroq ekan. Bolalarga nisbatan ishlatilganda erkalash ohangida aytilsa kerak, salbiy maʼnoni yumshatish uchun.

Kontekst beringlar, deganimda shu so‘z qo‘llangan gapga misol so‘ragan edim.

Mening taxminim xato bo‘lsa kerak. Sababi men avval bu so‘zni mutlaqo eshitmaganim uchun miyamda fonemalar tarkibi, yaʼni shaklan yaqin bo‘lgan "bejo" so‘zi faollashdi va men o‘z gipotezamni uning ustiga qurdim. Maʼnoni aniqlash uchun esa shakl emas, vaziyat muhim.

@psixolingvist

Munavvarani bakalavr vaqtida O‘zMUning o‘sha tarixga aylangan ikki qator piyodalar (yoki talabalar) yo‘lagida onasi yetaklab kelayotganini ko‘rganimni eslayman. Keyinchalik bir kafedrada, bir jamoada ishladik. Hamqadam, hamnafas bo‘ldik. Onasi Muhayyo opa ilmiy jamoamizning aʼzosiday bo‘lib qolganlar.
Muslimat uz saytining ko‘rsatuviga intervyusini ko‘rib xursand bo‘ldim.
Munavvara masʼuliyatli, shijoatli, mehnatkash, isteʼdodli olima. Bu ko‘rsatuvda uning inson sifatida hayotga munosabati ochilibdi. Tavsiya qilaman.

@psixolingvist

#vaziyat
#olmosh

Eshik jiringladi. To‘g‘rirog‘i domofon. Trubkani ko‘tarib, kimligini so‘radim. "Opa, keldim" degan javob berildi. Hech kimni chaqirmaganman, hech kimni kutmayapman. Kvartira raqamiga adashgandir deb qaysi kvartiraga keldingiz desam, biznikini aytdi. Lekin men hech kimni chaqirmaganman, dedim. U yana "Menman, opa" deb ikki marta qaytardi. Eshikni ochmasdan trubkani qo‘ydim.

- Kimsiz?
- Menman.

Nima uchun bu savolga bu javobning informatsion mavqeyi 0ga teng? Chunki "men" bu olmosh, u boshqa maʼno ifodalaydigan so‘zga ishora qiladi. O‘zi yolg‘iz hech qanday maʼno tashimaydi.

Ayni vaziyatda qarshi tomonda kognitiv jarayonning tormozlanishini ham ko‘rishimiz mumkin. Miya ishni bajarish uchun algoritmini tuzar ekan, unda hammasi biridan biriga shartsiz o‘tuvchi bloklardan iborat bo‘lgan, yaʼni adashsam-chi degan ehtimol hisobga olinmagan.
Avvallari kompyuter dasturlari ishlamay to‘xtab qolsa, "dastur qotib qoldi","dastur osilib qoldi" deyilardi. Hozir ham shunaqa deyiladimi, bilmayman. Lekin chaqirilmagan mehmonimning "menman" deb qayta-qayta aytishi aynan shunga misol bo‘ladi. Miya ro‘y bergan kutilmagan muammoni hal qilish uchun vaqt sarflaydi, bu vaqt davomida esa eski qadamni takrorlab turadi. Ha, miyamiz birvarakayiga parallel ravishda juda ko‘p darajada ishlaydi.

@psixolingvist

#esiz
Alisher Navoiy nomidagi Adabiyot muzeyi, avvalo, mening bolalik xotiralarim bilan bog'liq.
Alisher Navoiy nomidagi Respublika Nafis san'at litseyiing adabiyot sinfida o'qiganman va har yili bir necha marta bu yerga kelar edik.

Bizga aynan navoiyshunoslar dars berishar, Hazratning tavalludiga atalgan har tadbirimizga tashrif buyurishar edi. Anvar Hojiahmerdov, Yoqubjon Is'hoqov, Alibek Rustamiy kabi ustozlar Navoiy haqida shu qadar mehr-muhabbat bilan gapirishar ediki, bu ehtirom bizga ham ulardan yuqqan deya olaman.

Har yili 9-fevralda adabiyot sinfining barcha o'quvchilari va ustozlar muzey oldidagi haykal atrofiga yig'ilib, Navoiyni xotirlash uchun kelgan olimlarning ma'ruzalarini eshitar edik, tadbir so'ngida biz-o'quvchilar yoddan g'azal aytardik sovuqdan va hayajondan tirab.

Qanaqadir sharaf tuyardim men olimlar bilan bir safda turib eng buyuk shoirimizni yodga olayotganimizdan..

Esimda, xonalarning birida "Xamsa" dostonlariga atab devorga ishlangan suratlarni ko'rsatib, gid ayol:
-Kim topadi, nima xato ketgan shu yerda?- degan va biz astoydil har biriga tikilib, joylashuvdagi ketma-ketlik buzilganini aniqlagan edik.

Chingiz Ahmarov degan rassomni ham aynan shu muzeyda kashf qilgan edim o'zim uchun.

Eksponatlarning aksariyati shundoq ko'zim oldida turadi: qo'lyozmalar, gilamga ishlangan Sharq go'zali portreti, vazalardagi Navoiy suratlari, ilmiy ishlar va risolalar, turli davlatlardan yuborilgan sovg'alar..

Qavatdan qavatga ko'tarilib, turli davrlarda ijod qilgan shoir va yozuvchilarning hayoti va ijodi bilan tanishish mumkin edi.

Keyinchalik, o'zim ham o'quvchilarimni bir necha marta olib keldim bu dargohga..

Professor Aziz Qayumov rahmatli binoning qarovsiz va e'tibordan chetda qolayotgani, ayrim xonalarini tadbirkorlarga berib yuborilgani haqida kuyunib yozgan maqolasini o'qib qattiq achingan edim.

Mana endi Navoiy ko'chasi, Navoiy metro bekati bor-u, muzey yo'q.

Millatning tarixi edi u. Adabiyotning tarixi!
Shuncha asr o'tib, bironta Navoiy chiqmadi boshqa, jilla qursa, U zotga aloqador tarixni saqlab qolishga yarasak edi..
@suvaydo