Рақамли ижтимоий ҳимоя платформасидан фойдаланиш бўйича амалий семинар ўтказилди

Қува тумани ҳокимлигида аҳолига ижтимоий хизматлар кўрсатиш сифатини ошириш, эҳтиёжманд оилаларни қўллаб-қувватлаш ва уларни камбағалликдан чиқаришга қаратилган чора-тадбирларни самарали ташкил этиш мақсадида маҳалла бешлиги вакиллари учун Рақамли ижтимоий ҳимоя платформаси билан ишлаш бўйича амалий семинар ўтказилди.

Семинарда янги рақамли платформа имкониятлари, ундан фойдаланиш тартиби ҳамда аҳолига ижтимоий хизматларни манзилли ва самарали кўрсатишда платформанинг аҳамияти ҳақида босқичма-босқич маълумот берилди.

Амалий машғулотлар давомида маҳалла бешлиги вакилларига камбағал ва эҳтиёжманд оилаларнинг ижтимоий ҳолатини ўрганиш, уларнинг мавжуд муаммоларини аниқлаш, зарур ижтимоий ёрдам турларини белгилаш ҳамда амалга оширилган ишлар натижасида камбағалликдан чиқариш бўйича амалий кўникмалар берилди.

Шунингдек, оила аъзоларининг бандлигини таъминлаш, уларни мавжуд бўш иш ўринларига йўналтириш, касб-ҳунарга ўқитиш ва тадбиркорлик фаолиятига жалб этиш орқали оила даромадларини ошириш масалаларига алоҳида эътибор қаратилди.

Семинар якунида иштирокчиларнинг платформа билан ишлаш жараёнида юзага келиши мумкин бўлган амалий масалалари муҳокама қилиниб, уларга тегишли тушунтириш ва тавсиялар берилди.

Мазкур тизимнинг амалиётга кенг жорий этилиши ижтимоий ёрдамларнинг манзиллилигини таъминлаш, эҳтиёжманд оилалар билан индивидуал ишлашни кучайтириш, уларнинг бандлигини таъминлаш ва камбағалликдан чиқариш бўйича ишларни рақамли асосда самарали ташкил этишга хизмат қилади.

🔔Bizni ijtimoiy tarmoqlarda kuzating:
Telegram| Facebook | Instagram | Youtube | X

Қува тумани ҳокимлиги Ахборот ҳизмати раҳбари видеороликлар танловида совриндор бўлди

Ўзбекистон Республикаси Мустақиллигининг 35 йиллиги муносабати билан Ўзбекистон Журналистлар уюшмаси Фарғона вилояти бўлими томонидан “Ёнимиздаги қаҳрамонлар” ҳамда “Шарафли йўл” шиорлари остида видеороликлар танлови ўтказилди.

Мазкур танловда Қува тумани ҳокимлиги Ахборот хизмати раҳбари Равшанбек Ўринбоев ҳам фаол иштирок этиб, ўзининг ижодий ва касбий маҳоратини намоён қилди ҳамда совриндорлар қаторидан ўрин эгаллади.

Танлов ғолиб ва совриндорларини тақдирлаш маросимида Равшанбек Ўринбоев Ўзбекистон Журналистлар уюшмасининг дипломи ҳамда эсдалик совғалари билан тақдирланди.

Қува тумани ҳокимлиги жамоаси номидан Равшанбек Ўринбоевни ушбу муносиб ютуқ билан самимий муборакбод этиб, келгусидаги ижодий ва касбий фаолиятида янада улкан муваффақиятлар тилаймиз!

🔔Bizni ijtimoiy tarmoqlarda kuzating:
Telegram| Facebook | Instagram | Youtube | X

Аҳоли мурожаатлари — эътибор ва амалий ечим

Қува туманида аҳоли мурожаатларини жойларда ўрганиш, мавжуд муаммоларни аниқлаш ва уларни ижобий ҳал этишга қаратилган ишлар изчил давом эттирилмоқда.

Шу мақсадда бугун туман ҳокимининг қурилиш, тўсиқларсиз муҳит яратиш, коммуникациялар ва коммунал хўжалик, экология ҳамда кўкаламзорлаштириш масалалари бўйича ўринбосари Муслимжон Акбаров томонидан навбатдаги сайёр қабул ўтказилди.

Қабул давомида фуқароларнинг уй-жой, қурилиш, коммунал хизматлар, ободонлаштириш, муҳандислик-коммуникация тармоқлари ҳамда экологик масалаларга оид мурожаат ва таклифлари тингланди.

Ҳар бир мурожаатни атрофлича ўрганиш, фуқароларга ҳуқуқий ва амалий тушунтиришлар бериш, ҳал этиш имкони мавжуд бўлган масалаларни жойида бартараф этиш, қўшимча ўрганиш талаб этиладиган мурожаатлар бўйича масъулларга аниқ вазифалар белгилаш чоралари кўрилди.

🔔Bizni ijtimoiy tarmoqlarda kuzating:
Telegram| Facebook | Instagram | Youtube | X