#rs_ustozlari

👫 O'quvchilarim menga yordam berishdi!

"Bir necha yil oldin, aniqrog'i 2018-yilda an'anaviy maktablardan birida ikki smenada ishlar edim. O'shanda men ikkita: 3- va 4-sinflarga tahsil berardim.

Ikkala sinfda ham bir-biridan ajoyib bolalar bor edi. Ular o'qishni yaxshi ko'rishar va bir-birlari bilan ahil, inoq do'st edilar. Biz har doim bir-birimizga kerakli vaqtda yordam berardik.

Agar ular janjal qilsalar, yarashishni afzal ko'rishardi. Ular bilan ishlashdan men juda ham mamnun edim.

Kunlarning birida meni qattiq shamollash tutdi va ovozim bo'g'ilib qoldi. Faqatgina pichirlab gapira olardim, xolos...

Qanday qilib dars o'tishimni tasavvur ham qila olmasdim. Axir, o'qituvchi darsni gapirmasdan o'tkaza olmaydi...

O'quvchilarimga qanday qilib mavzuni tushuntiraman? Qanday qilib ularni doskaga chaqiraman? Bunday holatda bolalar o‘zini qanday tutishadi, birdan shovqin-suron qilishsa-chi...?!

O‘sha ikki kun hamon esimda... Har ikki sinfimdagi bolalar darslarim davomida menga o'xshab pichirlab gapirishni boshlashdi. Doskaga kimni chaqirayotganimni bir-birlariga pichirlab aytishar, doskada ham pichirlab gaplashishar, hatto tanaffusda ham ovozlarini ko'tarmay, pichirlab muloqot qilishar edi. 🥰

Umuman olganda, bu kunlarda sinflarimda sukunat hukm surdi. O'quvchilarim meni qo'llab-quvvatlashdi va meni urintirishmadi. Ovozim bilan zo‘riqishimga yo‘l qo‘yishmadi va har doimgidan ham ko‘proq yordam berishdi.

Mana oradan 6 yil ham o'tdi, hanuzgacha o'sha kunlarni, sevimli farzandlarimni iliq xotiralar va shukronalik bilan eslayman..."

Sizlar bilan ustozlarimiz hikoyalarini ulashishni davom etamiz.

🟢Yuqorida maroq bilan o'qiganingizni bizga Rahimov School'ning "1-B" sinf rahbari Zulfiya Shamilevna hikoya qilib berdilar

Maktabimizda o'quvchilarni yuqoridagiday mehribon qilib tarbiyalaydigan ustozlar dars berishadi. 😊

Zulfiya Shamilevna haqida qo'shimcha ma'lumotlar bilan tanishtiramiz:

👩‍🏫 Rahimov School'ning "1-B" sinf rahbari

• 1-toifaga ega o’qituvchi va metodist;
• O’quvchilari rus tili fanidan tuman olimpiadasida 2-o’rin, maktablar o’rtasida o’tkazilgan matematika olimpiadasida esa 1- , 2- , 3- o’rinlarni egallagan;
• 2 nafar o'quvchisi Al-Xorazmiy maktabiga qabul qilingan;

Zulfiya Shamilevna 19 yillik pedagogik tajribaga ega, rus tilida boshlang'ich sinflarga ta'lim beruvchi metodist ham hisoblanadilar.

@rahimovschool

#rs_ustozlari

😑 O'jar o'quvchi

"2023-yil. Dekabr oylari.

O'shanda 1-sinflarga dars berardim.
Sinfimga Dinora ismli yangi qiz olib kelishdi. Ammo, u na o'qishni, na yozishni bilarkan. Hatto sabr bilan daftariga bir qator ham yozolmas, asabiy, o'jar va injiq qiz edi.

Shunday bo'lishiga qaramasdan, uni ilk ko'rganimdayoq "Shu qizda natija qila olaman" degan ishonch bor edi menda.

Uni sinfimizga qabul qildik.

Rahimov School'da fanlar chuqurlashtirib o'tilganligi sabab o'quvchilarim bilan 1.5 oyda alifboni tugatgan, Dinora kelganida biz an'anaviy dasturdan ancha ilgarilab ketgan edik.

Bu holat uning kayfiyatini yanada tushirib yubordi. Atrofidagi hamma o'rtoqlari a'lochi, yaxshi o'qiydigan, misol va masalalarni bir zumda yecha oladigan bolalar bo'lgani sabab Dinoraning o'jarligi yanada ortdi. Hatto daftarlarini yirtib tashlar, ruchkalarini otib yuborib, "Yozmayman" deb injiqlik qilardi.

Men esa uning "O'rtoqlarimga hech qachon yeta olmayman" degan o'yda o'zini bunday tutayotganini yaxshi anglab turardim.

Ichimda "Bu qiz baribir yaxshi o'qib ketadi" degan ishonch borligi uchun ham, Dinoraga ancha vaqt ko'proq e'tibor, yaxshi va xos muomala qildim.

Bosiqlik va sabr bilan mavzularni maydalab tushuntirar hamda unga ko'proq mehr berishga harakat qilardim.

Kichik ijobiy o'zgarishlar bo'ldi-yu, ammo yuqoridagi o'jarliklari kamaymadi.

Shunda uni bir muddat o'z holiga qo'yishga qaror qildim. Unga oldingiday alohida mehr bilan muomala qilishni to'xtatib turdim. Unga ham qolgan hamma qatori dars o'ta boshladim.

Bunday qila boshlaganimdan keyin ajib voqea ro'y berdi.

Bir kun hech kim yo'q paytni poylab, yuzlarini qo'li bilan yopgancha yonimga keldi. Tizzamga o'tirib, "Ustoz, meni kechiring, bugundan keyin yaxshi o'qiyman" dedi. Sevindim. U meni yaxshi ko'rib qolgan, lekin g'ururi sabab buni bildirolmayotgan edi.

"Sendan umuman xafa emasman, qizim. Albatta, yaxshi o'qiysan. Tushunmaganingni so'ragin, men senga qo'limdan kelgan barcha yordamni beraman", dedim.

Dinora sinfimizga dekabr oyida qo'shilganiga qaramay, shu voqealardan so'ng, 2 oy ichida eng a'lochilar safiga qo'shilib oldi".

Ustozlarimiz haqidagi navbatdagi hikoya sizlarga manzur keldi deb o'ylaymiz.

🟢Ushbu hikoyani bizga Rahimov School'ning 2-"A" sinf rahbari Surayyo Yo'ldosheva so'zlab berdilar.

Ustozimiz haqida qo'shimcha ma'lumotlar:

• Oliy toifali boshlang‘ich sinf o‘qituvchisi
• 15 yillik ish tajribasi
• 100 dan ortiq o‘quvchilar
• "Yil o‘qituvchisi" ko‘rik-tanlovi g‘olibasi
• Toshkent davlat pedagogika universiteti boshlang‘ich ta’lim fakulteti bitiruvchisi

Ustozimiz maktabimiz tashabbuskorligida tashkil qilingan "Ta'lim podkasti"ning 1-sonida ham ishtirok etganlar. Ushbu podkast orqali ustoz bilan yanada yaqindan tanishishingiz mumkin:

📹 Ta'lim podkasti |1-son

*Maxfiylik qoidalariga amal qilgan holda o’quvchining ismini o’zgartirdik

@rahimovschool