‏♪

‏يا صاحبي حقك علينا .. تشْرَه
‏وحنا نجي لك والندم غطّانا

‏"انسف خَطا" كرمالـ عيش وعِشره
‏لا تنسف العِشره عشان أخْطانا

‏⁧#بشاير_المقبل

(حول الغروب)

في ساعة ٍميقاتها حول الغروب
فيها نشوف النور و الليل خْصما

صبّت حقوق حْكاه في سمع ٍ نهوب
وكن الخزاما في وسط قلبي نما

تبسم اللي لا تبسم لي يذوب ..
جمر الهموم اللي ورا صدرى حما

يا رحبها الدنيا ويا يسر الدروب
ما دام عينه في حياتي له وِما

ماقد سمى حي ٍ على الطيب مْحَسوب
الا واشوفه فوق هالسامي سِمى

دايم صباحه ما جرحني بالـ غروب
شمسٍ جبينه يوم الاجباه إجهما

ابشر بعزي قبل اجي عنده طلوب
وش عاد لو قلبي على يديه ارتمى؟

من لايمي في حب كسّاب القلوب؟
يوم أرفعه عن خلق ربي للسما ؟

يقطف لي ( الغيمات ) من عذق الهبوب
لامن طلبته ( قطرةٍ ) تجلى الضما🤍!

يحبني من دون شايبتن تشوب
قلب الرضيع اللي على الفطره نما

احس لامنه رضى .. تغفر ذنوب
سيل ٍ من الجنه على روحي هما

جزاه بالدنيا على ربٍ يثوب
مع من مشوا بين المخاليق رْحَما 🤍

#بشاير_المقبل

(ي سعود)


يا سعود ياللي كل شاعر يناديك
‏يشكي عليك من الظروف الاليمه

‏هو انت شيخ ؟! ونعتزي كلنا فيك ؟
‏أو لك حكايه بالسنين القديمه ؟

‏والا اخو دنيا ولك عين ترجيك ؟
‏والا حروفك بالبحر مستقيمه ؟

مع العرب يا سعود .. جيتك ابشكيك
وقتٍ شحيح ، وكفّ جوره كريمه

جيتك و في صدري هجاد ودواكيك
ودموع عيني ما تونّا هتيمه

ما بالمدى غير العِدا والتهاليك
وما في شليل الغيم للبيد ديمه

‏يا سعود رد الصوت ياسعود وشفيك؟
‏عَبّر قصايدنا يمال الغنيمه :(

#بشاير_المقبل

كثّر بهار الهروج ، وصفّي دلالها
‏وقَلّب فناجيلها يا خوف منثلمه !

‏ترا خفيفك بعين العاني .. ثقالها
‏بالذات لاصرت تجهل حربه وسِلمه

‏لاتستغلّ الأجاويد و تِجِمّالها
‏وحليم الأطباع .. لا تمتحنه بحِلمه

‏أغليت أنا ( واحدٍ ) من كلمةٍ قالها
‏وكرهت أنا ( واحدٍ غالي ) سبب كلمه!

‏⁧ #بشاير_المقبل⁩

‏♪

‏أشكي على قمرا و نوّ
‏والليل بهمومي سرح

‏تمتمت: أنا مجروح توّ
‏والصدر توّه مَ ٱنشرح

‏أحتاج في هاليوم لوّ
‏"مثقال ذرّه من فرح"

‏⁧ #بشاير_المقبل

غريبه الدنيا .. هنا بالذات
‏زحمه وقلبي بالحشى وَحدَه؟

‏متستنفذ شعوره على غايات
‏تستعجل المومن على لَحده

‏إيدينها عند النكد جَزلات
‏وان مدّت فتات الفرح .. شِحدَه !

‏ماهوب عيب الناس مليارات !
‏من حولنا .. ونحسّ بالوِحده ؟

‏⁧ #بشاير_المقبل⁩

والله يَ بي من شوق قلبي شفاقه
‏اراقب الأبواب ! من جاء ؟ ومن راح ؟

‏ابطيت ! ، عيني من بعادك رقاقه ..
‏ماطبّها كحلٍ على الخد ما ساح !

‏عطني من بيالة وصالك ذواقه 💔
‏كان التعب عذرك ترا الشوق ذبّاح

#بشاير_المقبل

أيقتلك الغياب ؟!
‏أنا يقتلني الحضور الباهت الذي لا يسمن ولا يغني من الشوق !

من كان له خوةٍ تنشد عن الغيبه
‏ تحبه بـ طبعه الزين وعذاريبه

‏يعضها في نواجذ حلمه وطيبه ..
‏ ياشيب قلبٍ يضيق وماله مْدارِي

#بشاير_المقبل
‏

( صار شاعر )

أشغلوني : “ علمينا بالحقيقه ..
تدهلين الشعر والشريان واعر !!

كيف صرتي شاعرة وجد وعميقه؟
قلبك صغيّر .. وغَرّقنا مشاعر !! “

قلت : انا تولة دهن عودٍ عتيقه
طيّبت خَدٍّ عن العذّال صاعر

وكان ( ابن جدلان ) دلّته العريقه
( وابن عون ) ابريقه اللي بالمساعر

(و أحمد الناصر ) غبوقٍ بلّ ريقه
( والزلامي ) غصنٍ يهشّ الأباعر

كل شيٍ لامس يدينه دقيقه ..
قِد غدا لحمٍ ودمّ و صار شاعر !!!

#بشاير_المقبل

لا مرني شخص ٍ شفوح .. ونظرته جوعانه
‏وعينه خَطر لاشافت النعمه تطيح بحِجْره !

‏اقول يا ربي لك الحمد الكثير ، معانه ..
‏رغم الرماد اللي بصدري والدلال الهَجْرَه

‏اكبر عطايا الله ( عيونٍ قَنْعَه و مليانه )
‏وقلب ٍ رضاه - اليا ادلهمّت فيه - يبدا فجره

‏⁧ #بشاير_المقبل⁩

✨

هلا بك من طرف رجلك الين شماغك المنثور
على كتفٍ يشيل اللي يشيل من النجوم الليل

هلا يا قطعة ٍ من روح خلك ، والحنايا سور
على قلبٍ غدا لك من تراحيبه مراكض خيل

صباح الخير ، والبسمه ، ونفحات الرضى ، والنور
وتلويح الشتا بيد النسيم ، وطيب ريح الهيل

#بشاير_المقبل

ترجم لي احساسك انا بنت القصيد
‏اكتب على سطور الثريا بـ الشهب

‏جود العطا .. لا شحّ قلبك ما يفيد !
‏يطير لا حرّك ولاء حبك مهبّ

‏البرد من حينه على الدنيا يزيد
‏وسطحية الافكار .. ما تشعل لهب

‏إجذب شعور القلب بحبال الوريد
‏بعض الكلام أغلا من عقود الذهب

#بشاير_المقبل

من قال انا لك ! شمس حبي مالها سكة غروب
قله قبل يقطع وعوده : صاحبي وفّر عناك

أجواد نسل اجواد ، مانوذي ولافينا لعوب
لكن مرور الوقت وظروفه ودوراته هلاك

مواقف الايام منها يصمد الود و يذوب
وطبع النفوس تعاف مع كثر الخطايا والعراك

تعوّذوا بالله دوم من إنتكاسات القلوب
يومٍ من الأيامُ كان إبليس مع شرّه ( ملاك )

⁧#بشاير_المقبل⁩

نادوه .. عين صويحبه سدّها فاض !
‏مسهود .. وعيون الخلايق هجوعي

‏الجور لا صار الغلا طاغي .. أمراض !
‏وصبر الجمل صبرك .. ولا انت بـ جزوعي

‏ما تنعسف روح ٍلها الكون مركاض
‏وانا جبل ! ماغير لله خضوعي

‏خلاّ مشبٍ كله جذوعٍ عراض !
‏ودنّق يشبّ ضويّته في ضلوعي !!

‏⁧ #بشاير_المقبل⁩

نظّف دنس قلبك قبل لاترجي إنسان نظيف
‏إكْمَل .. قبل تستنقص الناس وتعذرب بالخطا

‏لا تنتظر سيل و ربيع وجيّتك رمضى وصيف
‏إكْرِم قبل تشره على فلان ( وتحرّا للعطا )

‏⁧ #بشاير_المقبل⁩