Rean Computer 101

កុំឱ្យភាសាខ្មែរ ក្លាយជា "ភាសាបន្ទាប់បន្សំ" ក្នុងយុគសម័យ AI សម័យ GenZ ហួសពីអត្តសញ្ញាណខ្លួនឯង
តើមានពេលខ្លះទេ ដែលយើងមានអារម្មណ៍ថា ភាសាកំណើតរបស់យើងកំពុងចាប់ផ្តើម "ទន់ជ្រាយ" បន្តិចម្តងៗ?
ក្នុងនាមជាអ្នកដែលតែងតែចំណាយពេលជាមួយបច្ចេកវិទ្យា និងពិភពឌីជីថល ខ្ញុំបានឃើញរូបភាពពីរដែលផ្ទុយគ្នា៖
ម្ខាង គឺការរីកចម្រើនយ៉ាងលឿននៃ AI ដែលអាចនិយាយបានគ្រប់ភាសា... តែម្ខាងទៀត គឺការប្រើប្រាស់ភាសាខ្មែរលាយឡំជាមួយភាសាបរទេស រហូតដល់យើងស្ទើរតែភ្លេចពាក្យខ្មែរដែលពិរោះៗ និងត្រឹមត្រូវ។
ខ្ញុំមិនចង់និយាយច្រើន ឬរិះគន់អ្វីទេ ព្រោះខ្ញុំដឹងថាពិភពលោកកំពុងផ្លាស់ប្តូរ។ ប៉ុន្តែអ្វីដែលខ្ញុំអាចធ្វើបាន គឺ "ធ្វើឱ្យភាសាខ្មែរមានដង្ហើម មានរូបរាង ក្នុងពិភពឌីជីថល"។
ប៉ុន្មានខែកន្លងមក ខ្ញុំបានរួមចំណែកក្នុងកិច្ចការងារឌីជីថលសម្រាប់ភាសាខ្មែរជាច្រើន មិនមែនដើម្បីអួតអាងនោះទេ ប៉ុន្តែគឺដើម្បីកុំឱ្យកូនខ្មែរជំនាន់ក្រោយ បាត់បង់អត្តសញ្ញាណភាសាជាតិខ្លួនឯងនៅលើឌីជីថល។ យើងចង់ឱ្យ AI យល់ពីយើង ចង់ឱ្យបច្ចេកវិទ្យានិយាយភាសាខ្មែរបានច្បាស់ មិនមែននិយាយខ្មែរក្នុងសម្លេង "ការលាយឡំគ្នា ភាសាខ្មែរ និងភាសាផ្សេងទៀត" នោះទេ។
ប៉ុន្មានថ្ងៃមុន ខ្ញុំពិតជាមានមោទនភាពដែលបានរួមចំណែកវគ្គបណ្តុះបណ្តាល Mozilla Common Voice មកដល់សហគមន៍យើង។ នេះមិនមែនគ្រាន់តែជាវគ្គបង្រៀន AI ធម្មតានោះទេ ប៉ុន្តែវាគឺជា៖
- ការរួមគ្នា "ការរក្សាតម្លៃ" ភាសាខ្មែរក្នុងសម័យឌីជីថល។
- ការដាក់បញ្ចូល "ភាសាខ្មែរ" ទៅក្នុងកូដឌីជីថល និងទិន្នន័យភាសាខ្មែរ។
- ការបង្ហាញថា ខ្មែរក៏អាចដាក់បញ្ចូលឲ្យទូលំទូលាយ ក្នុងឌីជីថល។
សូមអរគុណបងប្អូនទាំងបានមកចូលរួមជាមួយខ្ញុំ អរគុណ Mozilla Cambodian Living Arts (CLA) Digital Divide Data-Cambodia អ្នកនៅពីក្រោយសាច់រឿងនេះ ដែលអោយសហគមន៍នឹងរៀនពីរបៀបសម្គាល់ទិន្នន័យ (Data Annotation) ឱ្យបានត្រឹមត្រូវបំផុត ដើម្បីឱ្យបច្ចេកវិទ្យានៅថ្ងៃអនាគត ស្គាល់ភាសាខ្មែរយើងបានច្បាស់ ដូចដែលយើងស្គាល់ខ្លួនឯង។
"ភាសាខ្មែរ គឺលើសពីពាក្យសម្តី គឺវាជាដង្ហើមនៃអរិយធម៌"។ មកចូលរួមជាមួយខ្ញុំ ដើម្បីឱ្យដង្ហើមនេះបន្តរស់រវើកក្នុងពិភព AI ទាំងអស់គ្នា! 🇰🇭✨

❤4👍4

3.2K views03:53