🟦🟦

“Ezgulik” gazetasida O‘zDJTU professori ishtirokidagi ma’rifiy uchrashuv haqida maqola e’lon qilindi

2026-yil 12-iyun kuni “Ezgulik” adabiy-badiiy, ma’naviy-ma’rifiy, ijtimoiy-siyosiy va ommabop gazetasining 22-sonida “Kitob va ilmga oshno qalblar uchrashuvi” sarlavhali maqola e’lon qilindi.

Unda Buxoro viloyati G‘ijduvon tumanidagi 20-son umumiy o‘rta ta’lim maktabida tashkil etilgan ma’rifiy uchrashuv tafsilotlari yoritilgan. Tadbirda O‘zbekiston davlat jahon tillari universiteti professori, filologiya fanlari doktori (DSc) Dilrabo Keldiyorovna Baxronova hamda O‘zbekistonda xizmat ko‘rsatgan madaniyat xodimi, taniqli shoira Zulfiya Mo‘minova ishtirok etib, kitobxonlik madaniyati, ilm-fan, xorijiy tillarni o‘rganish, zamonaviy ta’lim va yoshlarning ma’naviy kamoloti mavzularida o‘z fikr-mulohazalari bilan o‘rtoqlashdilar.

Maqolada professor Dilrabo Baxronovaning maktab kutubxonasiga 120 dan ortiq badiiy, ilmiy va ma’rifiy kitoblarni hadya qilgani, tadbir davomida o‘quvchilar bilan o‘tkazilgan samimiy muloqot hamda savol-javoblar, shuningdek, yoshlarni kitobxonlik va ilm-fanga keng jalb etishga qaratilgan tashabbuslar haqida batafsil so‘z yuritilgan.

🌐 Biz ijtimoiy tarmoqlarda:
Telegram | Instagram | Facebook | Sayt

Oʻzbekiston–Fransuz universiteti Vasiylik kengashining birinchi yigʻilishi boʻlib oʻtdi

2026-yil 18-iyun kuni Oʻzbekiston–Fransuz universiteti Vasiylik kengashining birinchi yigʻilishi boʻlib oʻtdi. Yigʻilishga Oʻzbekiston Respublikasi Oliy taʼlim, fan va innovatsiyalar vaziri hamda Vasiylik kengashi raisi Qoʻngʻirotboy Sharipov raislik qildi.

Unda Fransiyaning Oʻzbekistondagi Favqulodda va muxtor elchisi Valeed Fuque, Oʻzbekiston va Fransiyaning hamkor oliy taʼlim muassasalari vakillari, Vasiylik kengashi aʼzolari hamda Oʻzbekiston davlat jahon tillari universiteti rektori, Vasiylik kengashi aʼzosi Ilxomjon Tuxtasinov ishtirok etdi.

Yigʻilish davomida Oʻzbekiston Respublikasi Prezidentining 2025-yil 26-noyabrdagi “Oʻzbek–Fransuz universitetini tashkil etish chora-tadbirlari toʻgʻrisida”gi qarori ijrosi, universitetning strategik rivojlanish yoʻnalishlari, taʼlim jarayonini tashkil etish, xalqaro hamkorlikni kengaytirish hamda boshqaruv tizimini shakllantirish masalalari muhokama qilindi.

Kun tartibiga Vasiylik kengashi nizomini tasdiqlash, universitetning 2026-yilgi ish rejasi va byudjet smetasini koʻrib chiqish, 2026/2027-oʻquv yili uchun magistratura dasturlariga qabul tartiblarini belgilash hamda Puatye universiteti bilan taʼlim xizmatlari sohasidagi hamkorlik masalalari kiritildi.

Yigʻilishda universitet rektori vazifasini vaqtincha bajaruvchi A.A. Nasirov tomonidan Oʻzbekiston–Fransuz universitetida amalga oshirilayotgan ishlar, mavjud muammolar va ularni bartaraf etish boʻyicha taklif etilayotgan yechimlar yuzasidan hisobot taqdim etildi.

Muhokamalar davomida universitet faoliyati uchun mavjud infratuzilmani moslashtirish, qoʻshimcha akademik binolarni barpo etish, moddiy-texnik bazani yanada mustahkamlash hamda 2026/2027-oʻquv yilidan boshlab fransuz tili yoʻnalishida magistratura dasturini yoʻlga qoʻyish rejalari koʻrib chiqildi. Shuningdek, Puatye universitetining akkreditatsiyadan oʻtgan taʼlim dasturlari asosida qabul jarayonlari va akademik faoliyatni tashkil etish masalalari yuzasidan fikr almashildi.

Yigʻilish yakunida universitetning tashkiliy, huquqiy va akademik faoliyatini samarali yoʻlga qoʻyish, Oʻzbekiston va Fransiya oliy taʼlim muassasalari oʻrtasidagi hamkorlikni yanada rivojlantirish hamda xalqaro talablar asosida yuqori malakali mutaxassislar tayyorlashga qaratilgan muhim qarorlar qabul qilindi.

🌐 Biz ijtimoiy tarmoqlarda:
Telegram | Instagram | Facebook | Sayt