🟦🟦🟦🟦🟦🟦🟦

O‘zDJTUda Gyote instituti vakillari bilan uchrashuv bo‘lib o‘tdi

4-sentabr kuni O‘zbekiston davlat jahon tillari universiteti rektori I. Tuxtasinov Gyote institutining O‘zbekistondagi vakolatxonasi rahbari Barbara Anna Bernsmeier, Til bo‘limi boshlig‘i Dildora Muxammadaminova, Ta’lim sohasida hamkorlik bo‘limi xodimlari G‘ayrat Hafizov va Sayyora To‘raqulovani qabul qildi.

Uchrashuvda O‘zDJTU Xalqaro hamkorlik bo‘limi boshlig‘i X. Yuldashev, Roman-german filologiyasi fakulteti dekani A. Xalillayev hamda Nemis tili filologiyasi kafedrasi mudiri I. Ziyadullayev ishtirok etdi.

Dastlab mehmonlarga O‘zDJTU faoliyati va so‘nggi yillarda erishilgan yutuqlarga bag‘ishlangan videorolik namoyish etildi. I. Tuxtasinov universitetda nemis tilini o‘qitish holati hamda Germaniya oliy ta’lim muassasalari, Gyote instituti, DAAD va Germaniyaning O‘zbekistondagi elchixonasi bilan hamkorlik aloqalari haqida ma’lumot berdi.

Muloqot davomida Barbara Anna Bernsmeier Gyote instituti faoliyati va kelgusidagi hamkorlik istiqbollari yuzasidan takliflarini bildirdi. Jumladan, 28-sentabr kuni O‘zDJTUda “DLL – Nemis tilini o‘qitishni o‘rganish” loyihasi yakunlariga bag‘ishlangan ilmiy-amaliy konferensiya tashkil etish, nemis tili bo‘yicha testlarni o‘tkazish hamda universitetda Gyote markazini tashkil etish masalalari muhokama qilindi.

Rektor I. Tuxtasinov Gyote institutiga ko‘p yillardan buyon ko‘rsatib kelayotgan amaliy yordami uchun minnatdorchilik bildirdi hamda Gyote markazini tashkil etish taklifini qo‘llab-quvvatladi. Shuningdek, nemis tili o‘qituvchilari uchun seminar-treninglar va malaka oshirish kurslarini tashkil etish, zamonaviy darslik va o‘quv-uslubiy qo‘llanmalar bilan ta’minlash borasida hamkorlik qilish taklif etildi.

Testlarni tashkil etish masalasida O‘zDJTU qoshida ochilishi rejalashtirilayotgan Gyote markazida testlarga tayyorlov kurslarini yo‘lga qo‘yish va testlarni o‘tkazish taklifi ilgari surildi. Markazda til muhitini yaratishda KOICA tomonidan tashkil etilgan “Koreya ta’lim va madaniyat” markazi tajribasidan foydalanish mumkinligi qayd etildi.

Gyote instituti Til bo‘limi boshlig‘i Dildora Muxammadaminova O‘zDJTU nemis tili o‘qituvchilari uchun maxsus kurslar tashkil etilishi va test to‘lovlariga 50 foiz chegirma berilishini ma’lum qildi. Shuningdek, 15-oktabrga qadar Germaniya OTMlarida stajirovka va malaka oshirish bo‘yicha tanlovda ishtirok etish uchun hujjatlar topshirish mumkinligi bildirildi.

I. Tuxtasinov nemis tiliga yaqin bo‘lgan golland tilini uchinchi til sifatida o‘quv jarayoniga kiritish taklifini ilgari surdi. Barbara Anna Bernsmeier Gyote institutining Amsterdamdagi vakolatxonasi bilan bog‘lanib, golland tili bo‘yicha mutaxassislarni O‘zDJTUga jalb etish masalasini muhokama qilishga tayyor ekanini bildirdi.

Uchrashuv yakunida tomonlar hamkorlikni yanada rivojlantirishga tayyor ekanliklarini bildirdilar. Mehmonlar Roman-german filologiyasi fakultetiga kuzatib qo‘yildi.

🌐 Biz ijtimoiy tarmoqlarda:
Telegram | Instagram | Facebook | Sayt

🎬 O‘zDJTU va Kadis universiteti hamkorligida yaratilgan hujjatli film xalqaro namoyishini boshladi

O‘zbekiston davlat jahon tillari universiteti va Ispaniyaning Kadis universiteti (UCA) o‘rtasidagi akademik va madaniy hamkorlik doirasida yaratilgan O‘zbekistondagi zamonaviy urban musiqa madaniyatiga bag‘ishlangan qisqa metrajli hujjatli film xalqaro auditoriyaga taqdim etildi.

36 daqiqalik film Toshkent va Samarqand shaharlarida suratga olingan bo‘lib, O‘zbekistonda rivojlanib borayotgan urban musiqa, xususan, yoshlar orasida ommalashayotgan rep va R&B madaniyatini yoritadi.

Audiovizual loyiha Kadis universiteti o‘qituvchisi Miguel González Ríos, audiovizual ijodkor Alberto Oliva hamda O‘zDJTU Ispan tili kafedrasi o‘qituvchilari va talabalari hamkorligida amalga oshirildi.

Loyiha Markaziy Osiyodagi madaniy va tadqiqot tashabbuslarini qo‘llab-quvvatlashga qaratilgan Ruy González de Clavijo 2024 stipendiyasi doirasida amalga oshirilgan.

Filmning suratga olish va tayyorlash jarayonida O‘zDJTU Ispan tili kafedrasi tomonidan til, tarjimonlik, tashkiliy va ijodiy yo‘nalishlarda ko‘mak ko‘rsatildi. Kafedra o‘qituvchilari Odilbek Xalillayev va Iroda To‘ramurotova loyihaning akademik va tashkiliy jihatdan amalga oshirilishiga hissa qo‘shdilar.

Shuningdek, universitet talabalari Hasanxo‘ja Hamidullayev va Amaliya Karimova film ijodiy guruhida tarjimon sifatida faol ishtirok etib, xorijiy ijodkorlar va mahalliy musiqa vakillari o‘rtasidagi muloqotni ta’minlashga ko‘maklashdilar.

🌍 Film xalqaro festivallarda

Hujjatli film YouTube platformasida ispan tilidan tashqari ingliz, fransuz va rus tillaridagi subtitrlar bilan namoyish etilmoqda.

Ochiq premyerasidan avval film Londondagi Eurasian Creative Guild Film Festival hamda Rimdagi Hip-hop Cinefest xalqaro festivallarining rasmiy dasturlaridan joy oldi.

Mazkur loyiha O‘zDJTU va Kadis universiteti o‘rtasidagi samarali xalqaro hamkorlikning navbatdagi natijasi bo‘lib, O‘zbekistonning zamonaviy musiqa madaniyatini xalqaro auditoriyaga tanitish, shuningdek, talabalar va professor-o‘qituvchilarning xalqaro ijodiy loyihalardagi ishtirokini kengaytirishga xizmat qiladi.

🎥 Hujjatli filmni tomosha qilish uchun:
YouTube — Uzbek Urban Music⁠

🌐 Biz ijtimoiy tarmoqlarda:
Telegram | Instagram | Facebook | Sayt