“Birinchi kurs maktabi” loyihasi doirasida yangi talabalar uchun moslashuv uchrashuvi

10-sentabr kuni O‘zbekiston davlat jahon tillari universitetida yangi qabul qilingan talabalarni universitet hayoti bilan yaqindan tanishtirish maqsadida “Birinchi kurs maktabi” loyihasi doirasida navbatdagi tadbir o‘tkazildi.

“Yangi muhit — yangi imkoniyatlar” nomi ostida tashkil etilgan uchrashuvda universitet psixologi Z. Xayrullayeva hamda Roman-german filologiyasi fakulteti IPMBIB bo‘limi mutaxassisi M. Abduraxmonova ishtirok etib, birinchi bosqich talabalariga talabalik davrining muhim jihatlari haqida ma’lumot berdilar.

Uchrashuv avvalida talabalar universitetdagi yangi muhit, ta’lim jarayoni va talabalik hayotiga moslashish masalalari bo‘yicha suhbatga jalb qilindi. Yangi bosqichning dastlabki davrida yuzaga kelishi mumkin bo‘lgan hayajon, ishonchsizlik, muloqotdagi qiyinchilik va emotsional zo‘riqishlarni to‘g‘ri boshqarish bo‘yicha tavsiyalar berildi.

Shundan so‘ng birinchi bosqich talabalari universitetimizda yaratilgan zamonaviy shart-sharoitlar va imkoniyatlar bilan yaqindan tanishtirildi. Jumladan, talabalar Universitet axborot-resurs markazi faoliyati, undan foydalanish tartibi va mavjud imkoniyatlar bilan tanishdilar. Shuningdek, kulolchilik ustaxonasi hamda startap xonalari ko‘rsatilib, ushbu maskanlarda talabalar uchun yaratilgan ijodiy, innovatsion va amaliy imkoniyatlar haqida ma’lumot berildi.

“Volontyorlik — ezgulik va hamjihatlik maktabi” mavzusida mashg'ulot

Roman-german filologiyasi fakulteti Fransuz filologiyasi kafedrasi stajyor-o'qituvchisi N.Rasulova tashabbusi bilan 2603-guruh talabalari ishtirokida “Volontyorlik — ezgulik va hamjihatlik maktabi” mavzusida tarbiyaviy-ma’rifiy mashg'ulot tashkil etildi.
Darsning asosiy maqsadi — talabalarda volontyorlik faoliyatiga qiziqish uyg‘otish, insonparvarlik, mehr-oqibat, o‘zaro yordam va ijtimoiy mas’uliyat kabi fazilatlarni shakllantirish hamda yoshlarni jamiyat hayotida faol ishtirok etishga undashdan iborat bo‘ldi.

Mashg‘ulot davomida “volontyorlik” tushunchasi, uning jamiyatdagi o‘rni va ahamiyati, volontyorlarning asosiy faoliyat yo‘nalishlari haqida ma’lumot berildi. Talabalar turli ijtimoiy loyihalar, xayriya tadbirlari, ekologik aksiyalar va aholining ehtiyojmand qatlamlariga ko‘mak ko‘rsatishda volontyorlarning o‘rni haqida fikr almashdilar.

O‘zDJTUda “Dekan va yoshlar” uchrashuvi tashkil etildi

Bugun O‘zbekiston davlat jahon tillari universiteti Roman-german filologiyasi fakultetida “Dekan va yoshlar” mavzusida ochiq muloqot uchrashuvi bo‘lib o‘tdi.

Mazkur uchrashuv yoshlarning fikr va tashabbuslarini tinglash, ularning ta’lim jarayonidagi faolligi, qiziqishlari hamda kelajakdagi maqsad va rejalari bilan yaqindan tanishish maqsadida tashkil etildi. Tadbir davomida talabalar o‘zlarini qiziqtirgan savollar bilan murojaat qilib, universitet hayoti, ta’lim sifati, xorijiy tillarni o‘rganish, zamonaviy kasblar va yoshlar uchun yaratilayotgan imkoniyatlar yuzasidan fikr almashdilar.

Fakultet dekani A.Xalillayev yoshlarning bilim olishga bo‘lgan intilishi, zamonaviy dunyoqarashi va tashabbuskorligini alohida e’tirof etib, bugungi kunda talaba-yoshlar uchun yaratilayotgan imkoniyatlardan unumli foydalanish muhimligini ta’kidladi. Shuningdek, u yoshlarni doimiy izlanish, xorijiy tillarni puxta egallash, innovatsion fikrlash va kelajakda yurt taraqqiyotiga munosib hissa qo‘shadigan yetuk mutaxassis bo‘lib yetishishga chaqirdi.

Uchrashuv davomida faol va iqtidorli talabalarning takliflari tinglanib, ularni qo‘llab-quvvatlash, yangi loyihalarni amalga oshirish hamda ta’lim sifatini yanada oshirish yuzasidan fikrlar bildirildi.

Mazkur uchrashuv talaba-yoshlar uchun nafaqat rahbariyat bilan ochiq muloqot qilish, balki o‘z salohiyatini namoyon etish, tashabbuslarini ilgari surish va kelajakka ishonch bilan qadam tashlashda muhim ahamiyat kasb etdi.