Тез тиббий ёрдам

ИМКОНИЯТЛАР МУВАФФАҚИЯТГА ЙЎЛ ОЧМОҚДА

Тез тиббий ёрдам — инсон ҳаёти ҳамда соғлиғи учун хавфли ҳолатлар рўй берганда туну кун шифохонагача кўрсатиладиган тиббий ёрдам тури ва тизими. Қолаверса, аҳолининг тиббиётдан розилиги энг аввало, тез тиббий ёрдам йўналишидаги хизматлар сифатига қараб белгиланади.
Шунинг учун ҳам республикамизда тез тиббий ёрдам фаолияти тубдан ислоҳ қилиниб, хизмат кўрсатиш замон талабларига мослаштирилмоқда. Бу жараёнда ҳудудлардаги бўлимларга энг муносиб кадрларнинг раҳбар этиб тайинлангани ҳам ижобий натижалар самарадорлигига хизмат қилмоқда.
Жумладан, Косонсой туман тез тиббий ёрдам бўлимига йигирма йилдан буён врач Абдурасул Раҳимов мудирлик қилиб келмоқда. У 2006 йилда Андижон давлат тиббиёт институтини тугатган. Янги билимлар эгаси бўлган ёш мутахассис ўшанда қандай шижоат билан ишга киришган бўлса, бугун ҳам унинг ишга ёндашуви ўзгаргани йўқ. Аксинча, эндиликда касбий тажрибани ҳам уйғунлаштирган ҳолатда аҳоли саломатлиги йўлида бор куч-ғайратини сарф этиб келмоқда.
- Бўлимимиз 200 минг нафардан зиёд аҳолига биринчи тиббий ёрдамни кўрсатиб келади, - дейди бўлим мудири А. Раҳимов биз билан суҳбатда. – Мавжуд 16 та шохобчанинг барчасида малакали тиббиёт ходимлари фаолият юритади. 275 нафар ходимларнинг 46 нафари врач, 153 нафари ўрта тиббиёт ходими, 76 нафари эса ҳайдовчилардан иборат. Шифокорларнинг аксарияти юқори малака ва тоифага эга, ўрта тиббиёт ходимлари ва ҳайдовчилар ҳам соҳада етарлича тажриба тўплаган.
6 та замонавий тез ёрдам автомобиллари чақириқларга ўз вақтида етиб боришимизни таъминлаяпти. 5 та замонавий “ Folsfagen”, 1 та “Nissan” русумли автомобиллар тоғли ҳудудлардаги йўлларда ҳам бемалол ҳаракатланади. Махсус автомобиллар ичида беморга биринчи тиббий ёрдамни кўрсатиш учун барча имкониятлар мавжуд.

Сўнгги йилларда соҳада биз тасаввур этмаган туб бурилиш, ўзгаришлар бўлди. Атиги ўн йил олдин ҳам техник ҳолати яхши бўлмаган автомашиналарда хизмат кўрсатардик. Ёқилғи ва дори-дармон етишмовчилиги муаммосини эса гапирмаса ҳам бўларди. Бугун замонавий транспортларда чақириқларга ўз вақтида етиб бораётганимиз, 68 турдаги дори-дармонлар билан уч ойлик захира яратилган ҳолатда таъминланганимиз нафақат беморларни, балки уларга кўнгилдагидек тиббий хизмат кўрсатаётган ҳамкасбларимизни ҳам қувонтирмоқда, ишига бўлган меҳрини, иштиёқини кучайтирмоқда.
Дарҳақиқат, бўлим мудирининг эътирофларида муболаға йўқ. Тиббиётнинг мазкур йўналишида ҳам айни пайтда рақамлаштириш жараёни жадаллик билан амалга ошириляпти. “Meddata” тизими чақириқларни ўз вақтида қабул қилиб, бажарилишида қулайликлари билан ходимларнинг ўз ишларига бўлган муносабатларини тубдан ўзгартирди. Шунингдек, мазкур тизим ҳар бир ходимнинг индивидуал қанча чақириқ қабул қилганини кўриш ва сифатини аниқлаш, ҳисоботларни осон шакллантириш имконини бермоқда. Бу тизимининг жорий этилгани ортиқча қоғозбозликка ҳам чек қўйди. Тез тиббий ёрдам машиналари радиолаштирилган бўлиб, икки томонлама телефон алоқаси билан таъминланган, нафас ва наркоз бериш жиҳозлари, кислород ингаляторлар, электрокардиограф ва бошқа зарурий ускуналар билан жиҳозланган. Ҳар бир бригада JPSга уланган, бу қайта-қайта чақириқларнинг олдини олмоқда. Тез ёрдамга қўнғироқ қилган фуқаронинг телефонига унинг чақириғига биноан йўналтирилган тез тиббий ёрдам бригадаси қаерда бораётгани, қанча вақтда чақириқ манзилига етиб бориши хусусида илова орқали СМС-хабарнома юборилмоқда. Бу фуқароларнинг ҳам миннатдорлигига сабаб бўляпти.

- Бизнинг фаолиятимиз бир маромда давом этмайди, буни жамоамизнинг ҳар бир вакили жуда яхши билади, - дея таъкидлайди Абдурасул Раҳимов. – Болалар ва катталар ўртасида ўткир респиратор ва юқумли касалликлар авж олган даврларда, ёзги дам олиш мавсумида чақириқлар сони бир неча маротаба ортиб кетади. Бундай вазиятларда ҳам бир-биримизни қўллаб, чарчоқларга парво қилмай, беморларга биринчи ёрдамни кўрсатишга ҳаракат қиламиз. Фуқароларнинг хизматимиздан розилиги, миннатдорлиги – бизнинг энг катта ютуғимиз. Буларнинг барчасига, яна таъкидлашим мумкинки, ҳукуматимиз томонидан яратиб берилаётган қулай шарт-шароит ва имкониятлар сабаб бўлмоқда.
Албатта, имконият, муносиб шароит бор, меҳнати қадрланган жойда инсон чин дилдан ишлайди. Жамоада Гулчеҳра Саломова, Феруза Ғаппорова, Алишер Муллабоев, Тоҳиржон Бобоев, Зарифа Турсунова, Фахриддин Ҳошимбоев каби шифокорлар, Роҳила Жўраева, Аҳадхон Маматов, Зиёдулло Назаров, Муқаддас Абдуллаева, Шоҳиста Раҳимбердиева, Хайрулло Убайдуллаев, Достон Мирзаев, Жамолиддин Мўминов, Қаҳрамон Мукаррамов каби фельдшерлар барчага ҳар жиҳатдан ўрнак, ишга доимо масъулият билан ёндашадиган ходимлардир.
Ютуқлар ҳам ҳавас қилгулик. Олий тоифали врач Алишер Муллабоев, фельдшер Жамолдин Мўминов, ҳайдовчи Нарзулло Пўлатовлардан иборат реанимацион бригада вилоят танловида 1-ўринни эгаллади. Эндиликда улар танловнинг халқаро миқёсдаги босқичида иштирок этишади.
Тез тиббий ёрдам бўлимининг Қўқимбой шохобчаси ҳамшираси Муқаддас Абдуллаева эса “Ҳамшира” кўрик-танловининг туман босқичида, унинг қизи эса “Менинг онам - ҳамшира” танлови туман босқичида 2-ўрин ғолиби бўлди. Бўлимда тузилган футбол жамоасининг кубок соҳиби эканлиги жамоада соғлом турмуш тарзи қарор топганидан, спорт оммавийлашганидан далолат беради.
Бўлимга умумий ҳисобда бир кунда 200 га яқин чақириқ келиб тушади. Марказда 8 та тиббий бригада фаолият юритаётган бўлса, қолган яна 8 та бригада туманнинг бошқа ва ҳатто, Қирғизистон республикаси билан чегарадош ҳудудлардаги аҳолига тиббий хизмат кўрсатади.
Қирғизистон республикасига яқин ҳудудда жойлашган Ободон шаҳобчасида бўлганимизда, аҳоли тез ёрдамчилар хизматидан мамнун бўлиб, миннатдорликларини билдирдилар.
- Қайнона ва қайнотамда гипертония ҳасталиги бор, уларнинг қон босимлари ошиб туради. Шу сабабли “103” га тез-тез мурожаат қилиб турамиз, – дейди Обод МФЙ Истиқлол кўчаси 117 уйда истиқомат қилувчи Сайёра Раҳмонова. – Шифокорлар ўз вақтида етиб келиб, биринчи ёрдам кўрсатадилар. Бир неча бор оғир асоратларни олдини олдилар. Шунинг учун улар хизматидан доимо миннатдормиз. Ўзлари ҳамиша соғ ва омон бўлишсин, халқимиз хизматидан чарчамасинлар.
Дарҳақиқат, “Ободон” шохобчаси малакали шифокори Тоҳиржон Бабаевнинг хизматларини эътироф этсак арзийди. Доя Гулбаҳор Қосимова 36 йиллик иш тажрибасига эга. У фаолияти давомида кўплаб чақириқлардаги фавқулодда туғруқ жараёнларида дояликни маҳорат билан бажариб, она ва бола ҳаётини сақлаб қолганлиги таҳсинларга сазовор. Вилоят марказидан олис радиусда жойлашган бўлса-да, “Ободон”да шундай фидоий шифокор ва фельдшерлар бор. Бу халқнинг бахти, омади.
Кўриш мумкинки, бугун нафақат туманларда энг олис қишлоқ ва овулларда ҳам тез ва сифатли биринчи тиббий ёрдамни кўрсатиш учун замонавий хизмат шаклланиб улгурди. Энди беморлар соатлаб тез ёрдамни кутмайдилар. Ўз вақтида кўрсатиладиган тиббий хизмат эса фуқароларнинг ҳаётини асрабгина қолмасдан, уларнинг тиббиётдан розилигига ҳам сабаб бўлмоқда.
Манзура ЭРГАШЕВА.