Тез тиббий ёрдам хизмати

МИННАТДОР ҚАЛБЛАРДА ЯШАЙДИ УЛАР!
 
            Яхшики, инсонлар қалбида меҳр, садоқат деган туйғулар бор. Мана шу ҳислар бизни яхшиликка ундаб туради. Акс ҳолда ҳеч бир одам бировга ёрдам учун ошиқмасмиди?!..
Ҳар сафар соғлиқни сақлаш соҳаси вакиллари, шу жумладан, унинг энг муҳим йўналиши – тез тиббий ёрдам тизими ходимлари фаолиятига назар ташлар эканмиз, ана шундай ўйлар хаёлимиздан ўтади. Чиндан ҳам, бу соҳа ходимларини чақириқларга жавобан бемор ҳузурига шошилишининг боиси – бу фақатгина касб масъулияти эмас, балки унга бўлган меҳр ва садоқат ҳосиласидир.
Бу гал саҳифаларимизга Республика тез тиббий ёрдам маркази Наманган филиалига қарашли Учқўрғон бўлими жамоаси фаолиятини олиб чиқишга қарор қилдик. Дастлаб бўлажак қаҳрамонларимиз ҳақида эшитган илиқ фикрларимиз яқиндан танишув жараёнида ўз тасдиғини топди.

Мазкур туман тез тиббий ёрдам бўлимига икки йилдан буён соҳада 35 йиллик иш тажрибасига, кучли билим ва бошқарувчилик салоҳиятига эга шифокор Саида Қамбарова раҳбарлик қилиб келмоқда. Тиббиётнинг бу йўналиши унга бегона эмаслиги, яъни 2009-2024 йилларда туман тез тиббий ёрдам бўлими йўналиш врачи сифатида иш олиб боргани учун бу вазифа аввал-бошдан унга асло қийинчилик туғдирмади. Аксинча, мавжуд муаммоларга самарали ечим топишига, жамоани энг малакалилар билан тўлдиришига имкон берди. Мамлакат миқёсида амалга оширилган ислоҳотлар эса унинг эзгу мақсадлари рўёбини тезлаштирди.
Саида опада шифокор бўлиш орзуси онаси Вера опанинг шу соҳадаги узоқ йиллик фаолияти боис туғилгани, шубҳасиз. Вера опани учқўрғонликлар ўзгача ҳурмат билан эслашади. У туман марказий шифохонасининг қабулхона бўлимида ишлаган. Фидойи, ишига виждонан ёндашадиган ҳамшира бўлгани учун ҳам элнинг дуосини олган. Волидасининг обрўси баландлиги ёш Саиданинг қалбида эзгу ниятни пайдо қилди. Тиббиёт олийгоҳини тугатиб ишга келганида, унга устозлари - туман тиббиётининг дарғалари бўлган Тўлқин Ҳакимов, Тоҳир Тожибоевлар бор билим ва иш тажрибаларини ўргатди.
Бугун турмуш ўртоғи Шуҳратжон Қамбаров билан икки нафар қизни вояга етказиб, 5 нафар набиранинг бувижониси бўлган Саида опа касбини ниҳоятда яхши кўради. Изланувчан, янгиликларни амалга татбиқ этишда ташаббускор бўлган қаҳрамонимиз 2025 йилнинг май ойида Ўзбекистон тез тиббий ёрдам ходимларининг 1-Съездида қатнашди. Бу иштирок фақатгина тиббиётнинг кечаги куни таҳлили ва келажаги учун аниқ режалар тузишидагина муҳим роль ўйнамади, балки яқин орада тиббиёт ва айнан тез тиббий ёрдам йўналишида жорий этиш мумкин бўлган илғор технологиялар хусусидаги тасаввурини ҳам бойитди. Корея ва бошқа давлатлардаги ҳамкасблари томонидан ўтилган мастер-класслар эса билимлар ошишига замин яратди.

Дарвоқе, сўнгги йилларда туманда ҳам аҳолига кўрсатилаётган тез тиббий ёрдам хизматининг сифати кескин ошди.
- Шохобчамиз туманнинг 191минг 800 нафардан зиёд аҳолисига тез тиббий ёрдам кўрсатиб келмоқда, - дейди бўлим мудири Саидахон Қамбарова. – Ҳудудлардаги 11 та шохобчалар томонидан кўрсатилаётган хизмат марказдагидан асло қолишмайди. 14 та бригадаларнинг барчаси замонавий махсус автомобиллар (7 та “Дамас”, 4 та “Фольсфаген”, 2 та “Хундай” ва 1 та “Ниссан” русумли), зарур дори-дармонлар, тиббий аппаратлар, алоқа воситалари билан таъминланган. Жамоамиз 293 нафар тиббиёт ходимларидан иборат. Уларнинг 45 нафари врачлар. Координатор Илҳомжон Деҳқанов, Шавкат Жабборов, Бахтиёр Сотволдиев, Раҳматилло Йўлдошев, Ҳусниддин Сайдуллаев, Муқаддасхон Қамбарова каби йўналиш врачлари кўп йиллик билим ва тажрибага эга мутахассислар ҳисобланади. 187 нафар фельдшерларимизда жамоамизнинг бутун кучи мужассам, десам янглишмаган бўламан. Улар орасида катта фельдшер Азизбек Холматов, фельдшерлар Майрамхон Усмонова, Асилахон Болтабоева, Мунаввархон Турсуновалар гўёки шу касб учун туғилган, чин маънода фидойи инсонлар. Диспетчерлар Усмонжон Комилов, Маҳмудхон Иноятхўжаев, Хайрулло Азимовлар, механик Акбарали Охунов, 61 нафар шофёрлар, хусусан, Иқболжон Ҳакимов, Ёдгоржон Қосимов, Лутфиддин Бўлаковларнинг ҳам чақириқлар ўз вақтида қабул қилиб олиниб, беморларга биринчи тиббий ёрдам ўз вақтида кўрсатилишида ҳиссаси жуда катта бўляпти...
...Соат миллари 16:51. Мудирнинг сўзи шу заҳоти бўлинди. Навбатдаги чақириқ келиб тушди ва биз ҳам унинг ҳамроҳлигида тиббий бригада билан бирга чақириқ манзилига боришга қарор қилдик. Чақириқ Учқўрғон шаҳрининг Уйғун кўчасидан келиб тушган. 32 ёшли аёлда тана ҳарорати кўтарилган. Унинг учинчи фарзанди эндигина уч ойлик. Чақирув қабул қилиб олинганидан кейин орадан 9 дақиқа ўтиб, яъни 17:03 да тиббий бригада чақириқ жойига етиб келди. Врач Сардорбек Мамажўраев, фельдшер Маҳмудахон Шариповалар беморнинг тана ҳароратини ўлчаб, сўнгра унга биринчи тиббий ёрдамни кўрсатишга киришиб кетдилар.
- Уч нафар фарзандим бор, аввалари ҳам ё ўзим, ё болаларимдан биронтаси оғриб қолса, “тез ёрдам”ни чақирганмиз, - дейди бемор Дилнозахон Абдуқодирова. – Барака топишсин, қисқа вақт ичида етиб келишади доим, суҳбатлашиб, касаллик сабабини сўрашади, бепул дори-дармонлар бериб, тиббий муолажаларни ўтказишади. Улар келиши билан саломатлигимиз ишончли қўлларда эканига амин бўламиз.
...Беморнинг тана ҳарорати тушди. Уч ойлик қизалоқни онаси иситмалаганда озиқлантириш бўйича ҳам зарур тиббий маслаҳатлар берилди. Беморга ҳудудий оила поликлиникасига чиқиб, мутахассисга учраш тавсия қилинди.
Жараён якунланмасиданоқ навбатдаги чақириқ келиб тушди. “Саноат” маҳалласи “Байналминал” кўчасидаги озиқ-овқат дўконига чиққан 36 ёшли аёлнинг тўсатдан саломатлиги ёмонлашибди. Тиббий бригада ташвиш тугмасини чалганча ўша манзил томон йўл олди...

Дўкон бурчида ҳолсиз ўтирган беморнинг қон босими кўтарилган экан. Суҳбат асносида унинг буйраклари фаолиятида бузилиш борлиги маълум бўлди. Кўрсатилган биринчи тиббий ёрдамдан сўнг бемор туман шошилинч тез тиббий ёрдам бўлимига олиб кетилди. Бемор қабулхона врачи ва бўлим мудири Гулбаҳор Мирсаидова ихтиёрига топширилгачгина, бригаданинг барча аъзолари, жумладан, биз ҳам енгил нафас олдик...
Атиги икки чақириқ. Биз қанча ҳаяжон ва таҳликали хаёлларни бошдан ўтказдик. Биз фаолиятига гувоҳ бўлган тиббиёт ходимларининг ҳар куни навбатчиликдаги 12 соат давомидаги ҳаёти эса мудом шундай, балки бундан ҳам тиғиз ва тезлик аро ўтади.
-                Нафас ростлашга, ўз вақтида овқатланишимизга вақт бўлмаслиги мумкин, аммо беморга зудлик билан тиббий ёрдам кўрсатишимиз шарт, - дейди йўналиш врачи Сардорбек Мамажўраев. – Баъзан 12 соатдан иборат навбатчиликни дам олмасдан, овқатланмасдан ўтказамиз. Лекин беморларнинг миннатдорлиги боис буни сезмаймиз. Кўнглимиз уларнинг ҳаётини асраб қолишга қўшган ҳиссамиз боис ёруғ бўлади. Ҳар бир ҳамкасбимда шундай бўлади. Шарафли касбни танлаганимиздан барчамиз ғурурланамиз.
Бундай туйғулар жамоанинг барча вакиллари қалбида жўш ураётганини сезиш қийин эмас. Чақириққа жавобан бир қўлида планшет, бир қўлида махсус қутини кўтарганча “тез ёрдам” машинасига илдам ўтириб, бемор томон ошиқаётган тез тиббий ёрдам ходимлари ҳар қанча юксак эътирофга муносиб. Юрагингизни яхшилик тарк этмасин, нажоткорлар!
Манзура ЭРГАШЕВА,
Шаҳло ТОШБЕКОВА.

O‘zbekiston Respublikasi davlat mustaqilligining 35 yilligiga bag‘ishlangan bayram tantanasini quyidagi havolalar orqali tomosha qiling:
—
Смотрите празднование 35-й годовщины государственной независимости Республики Узбекистан по следующим ссылкам:

Telegram

Youtube

Facebook

Prezident.uz|Facebook|Instagram|YouTube|X