#Press_tur
TЕZKOR VA MALAKALI TIBBIY XIZMAT KO‘RSATISH
TAKOMILLASHMOQDA

⚡️Tibbiyotning muhim tarmoqlaridan biri tez tibbiy xizmat ko‘rsatish tizimidir. Uning qanchalar samarali va sifatli faoliyat yuritishi inson salomatligini saqlash natijadorligini oshirish imkonini beradi. Prezidentimizning 2022 yil 16 iyunda qabul qilingan “Aholiga tez tibbiy yordam ko‘rsatish tizimini takomillashtirish to‘g‘risida”gi PQ-283-sonli qarorida belgilangan vazifalarning hayotga tatbiq etilishi barobarida soha ishini yangi bosqichga ko‘tarish choralari ko‘rilmoqda.
Viloyat ommaviy axborot vositalari vakillari va blogerlar uchun tashkillangan navbatdagi press-turda Namanganda mazkur yo‘nalishda olib borilayotgan ishlar bilan tanishtirildi. Ijodkorlar dastlab Respublika tez tibbiy yordam markazi Namangan filialida bo‘lib, uzluksiz ishlaydgan xizmat ko‘rsatish infratuzilmasini ko‘zdan kechirdilar. Call-markaz, Namangan shahar tez tibbiy yordam markazi va inshootlari, avtomobil parki haqida tasavvurga ega bo‘ldilar.
RSHTYOIM Namangan filiali majlislar zalida kechgan anjumanda RTTYOM Namangan filali mas’ullari jurnalist va blogerlarga viloyatda tez tibbiy xizmat ko‘rsatish tizimining faoliyati xususida ma’lumot berdilar. Filial rahbari Adhamjon Irisboyevning ta’kidlashicha, soha yanada rivojlantirish diqqat markazida. Jumladan, 1 ta tez tibbiy yordam stansiyasi 15 ta shahobcha va 129 ta postlar tashkillangan. Ayni paytda 234 ta tez tibbiy yordam brigadasi kechasiyu kunduzi el xizmatida.
Avtomobil parkini jahon andozalaridagi transport vositalari bilan to‘ldirish ustida izchil ish olib borilmoqda. Ilgarigi DAMASlar o‘rnini birin-ketin eng zamonaviy xorijiy avtomashinalar egallamoqda. Pirovardida chaqiruvlar bo‘yicha tezkor tibbiy xizmat ko‘rsatish darajasi o‘smoqda.
Anjuman davomida istiqboldagi rejalar yuzasidan ham ma’lumot berildi. Qayd qilinganidek, tez tibbiy yordam brigadalari ishini tubdan yaxshilash borasida izlanilmoqda. Viloyat kardiologiya markazi bilan masofaviy diagnostikani yo‘lga qo‘yish rejalashtirilgan. XXRning Citis kompaniyasi bilan hamkorlikda Call-markazi barpo etish ko‘zda tutilmoqda.
Tadbir qatnashchilari o‘zlarni qiziqtirgan savollar yuzasidan batafsil javoblar olishdi. Tibbiy xizmat ko‘rsatish sifatini yaxshilash, kadrlar malakasini oshirish, faoliyat doirasini kengaytirish, 112 xizmati bilan integratsiyalashuv, muammoli vaziyatlarni bartaraf etish kabilar shular jumlasidandir.