يا ربِّ، آيُ القرآنِ آيةً آية
اجمعها لي في قلبي
حَفّظني القرآن يا رب أنا مشتاقة شديد🥀!!

لم تنته الأيام والليالي المباركة بمرور ليلة 27.
بل ما يزال الخير والبركة وفضلُ الله فيما بقي من الشهر المبارك
فاصطبر لعبادة الله واجتهد
******
فهذه أيام العمل الصالح، الصيام والقرآن والنوافل وإحياء الليل بالصلاة والقنوت لله والدعاء والاستغفار والتوبة.
وواللهِ إن عبدا يعلم ما في هذه الأيام من فضل الله وبركاته وثوابه ومغفرته ثم يُضيعها في تلفزيون أو نت أو نوم أو كافيهات أو الجدال والحكاوي لهُو مغبونٌ ومحرومٌ. وما ظلمه اللهُ ولكنه ظلم نفسه فهو الظالمُ والمظلوم!

#وخيرُ الناس لأهله وولده ذلك الذي يُعظّم تلك الأيام في نفوسهم بالقول والعمل، ويُعينهم على الازدياد من العمل الصالح في تلك الأيام ويُعرّضهم لرحمة الله وفضله ومغفرته بما يؤدونه من العمل الصالح
#وشرُّ الناس لأهله وولده من يفتح عليهم أبوابا تستنزف تلك الأيام والليالي سواء في التلفزيون أو الخروجات والعزومات والسهرات
#واعلمْ أن أهلك وولدك يرون رمضان، والعشر الأواخر بعينك
وعلى ما يعتادون معك ويرون من تصرفك فيه
-فإن رأوا تقديرك لها ومحافظتك على وقتك فيها والتقلُّل من الدنيا والمبادرةَ إلى الخيرات والصالحات=فإنها تعظُم في أعينهم وينالون منها ما يُسّّر لهم.
-وإن رأوك تُفرط فيها وتقضيها في التسالي والملاهي والأكل والشرب والسهرات والنوم =فهم معك (إلا أن يشاء الله)
فانظرْ أي الرجلين أنت لأهلك وولدك.

"دع السَّواد الذِي يغشى ضمائِرهم
وعِش نقيًا فداك القال والقِيلُ."

إيّاك أن تُفلِت يدك..

أن تتراخى قواك نهاية الطّريق، قطعتَ شوطًا لا بأس به، استمر، مِن طَبع النَّفس أنّها تألف الرّاحة، تَميل لمنطقة السّكون، إيّاك أن يكون! اثبت أُحُد.

#تمكين

من بداية رمضان ولغاية نصّو كده كنا راقدين في المستشفى مع أبوي،
أول رمضان يمُر علينا وهو غريب وملانين فيو خوف وقلق، النهار من الليل ما بتقدر تفرّق بيناتهم ولا حول ولا قوة إلا بالله!
مرَّت الأيام بي لُطف ربنا عز وجل، والحمدلله خرّجونا قبل البلد وضعها يسوء!

أيام المستشفى دي علَّمتني يعني شنو بيت
يعني شنو سرير، يعني شنو باب يتقفل عليك وتاخد راحتك
عرفتا يعني شنو نعمة "حمَّام نضيف"
ويعني شنو مخدَّة
عرفتا يعني شنو شبشب أو سفنجة
يعني شنو جلباب أو بيجامة

لما رجعنا البيت، ما قدرت أتمَالَك نفسي من البكا
كل شبر في البيت كان بالنسبة لَي نِعمة، كل رُكن في البيت نعمة
وفكرة استشعار النِّعم بعد فقدها ماف زول بقدر يوصفها ليك إلا لمَّا تضوقها

زي كل الناس مويتنا قاطعة من يوم بدت الحرب، لمن قبيل الفجر قاعدة في السرير عادي منتظرة الفجر يأذِّن
سِمِعتَ صوت الموية بتكُب من الماسورة
فجأة
لقيت حيلي كلو برد
ودموعي عشرة عشرة
ده شنو ده ده
دي موية؟!
دي موية!
بجد!!
وحالة كده ما تقدر تفهما أو تعبّر عنها
بتلقى روحك بس بتبكِي!

أخو صحبتي كان مع الأولاد المحبوسين في مكتبة جامعة الخرطوم من يوم السبت،
الاسكرين ده من حالتها♥️
كلما تتصل ليو وما يرد وهي تقلق، يرجع يقول ليها كنتَ بصَلِّي! -للهِ درُّه تبارك الرحمن-

في أوقات البلاء والشِدَّة
-ح تتذكر كل النعم اللي ما كنتَ قايل إنها نعمة
-‏(البيت، الأمان، الموية، الكهربا، الرصيد، لُقيَا الأصحاب، لمة الأهل ..إلخ)
-‏ ح تعرف قدر شنو كنتَ مُقصّر في شُكر النِّعم وقدر شنو ربنا كان مُنعِم عليك لكن نحنا ما بنعاين للعندنا دايمًا بنزعل على المافيش!
-‏في وقت البلاء والشدة، ح تعاين للناس اللي ربنا توَفَّاهم وتشوف برضو قدر شنو انتَ لسه الحمدلله فيك باقي نَفَس طالع ونازل تقدر تقول بيو الحمدلله يا رب وتستغفر بيو من كل ذنوبك ومعاصيك وتقصيرك!
-‏وقت البلاء والشدة، ح تعاين لي حالك عامِل كيف، بتصلّي زي ما النبي صلى الله عليه وسلم كان إذا حَزَبهُ أمرٌ فَزِعَ إلى الصلاة، ح تسبح وتتذكر تسبيحة يونس عليه السلام في ظلمات البحر وربَّنا قال "فلولا أنه كانَ من المُسَبِّحينَ۝لَلَبِثَ في بَطنِهِ إِلى يَومِ يُبعَثونَ"
ولا ح نقعد طالعين نازلين في التايم لاين نوجع في قلوبنا ونملاها خوف؟؟

نحنا في شدة وكُربة وحرب وموت ما معروف ننجو منها ولا يكون أجلنا فيها وأيامنا في الدنيا دي تنتهي!!

نحاول نحمد ربنا على النعم الكانت عندنا ولسه عندنا، ونسأله ما يفجعنا في أهلنا ولا أحبابنا
نزيد من صلاتنا وتسبيحنا واستغفارنا
كُربة وشِدَّة؟ أيوا
لكن كمان نتذكر إنو دي أيام مباركة ولسه رمضان بي خيرو
ادعوا الله، اتجرّدو من كل الأسباب وتوَكّلوا عليه حق التوكّل
واتذكروا
"قُل لن يصيبنا إلا ما كتب اللهُ لنا هوَ مولانا وعلى اللهِ فليتوَكَّلِ المؤمنون"

واتذكروا برضو مقولة شيخنا سلمان العودة -فَكَّ اللهُ أسرهُ-

"لكي لا تُصابَ بالجنون والاكتئاب من هذه الأحداث الغريبة والمُتصاعِدة
حافِظ على أورادِك وصلواتِك ومُناجاتِك وثِقَتَك بِربِّك"

ربنا يأمّننا في بيوتنا، وما يفجعنا في أهلنا ولا أحبابنا
ربنا يرزقنا شُكر النِّعَم، ويرفع عننا البلاء ويُزيل الشدة عاجِلًا غيرَ آجل، بي بركة رمضان والعشر الأواخر، آمين آمين آمين♥️

#صفية_مصطفى

"الاجتهاد في آخر ليلة من رمضان وحكمتان غائبتان عَنّا" 🥺💕

بسم الله أما بعد يا جماعة:
الليلة الداخلة علينا دي قد تكون آخر ليالي رمضان!

الريكورد الفوق عبارة عن كلِمة
عملها مولانا أنس في رمضان الفات عن فضل آخر ليلة..
وكانت دقائق عظيمة عديل
فالناس ما تغيّب الشمس قبل ما تسمعها 🙌

واذكرونا في دعائكم 💕

#نوازل
من لم يستطع أن يجد مالاً نقداً(كاش) ولم يستطع التحويل لدفع زكاة الفطر بسبب توقف التطبيقات، فهذا تكون زكاة الفطر في ذمته ديناً متى ما وجد سددها... وتكون زكاة له.
والله المستعان
د.آدم إبراهيم الشين

"‏دُنيا يُباع فيها يوسفُ ويُكذّبُ فيها نوحُ ويُرمى للنّارِ إبراهيم ويُتّهمُ بالسّحر موسى ويُقدّمُ مهراً لبغيّ رأسُ يحيى ويُرجَمُ فيها بالحجارة ﷺ
أتنتظرُ منها بعد ذلكَ أن تربتَ على كتفكَ أنت ؟!
هذا الكوكبُ عاق ومن رحمته أنّه جعله دار زراعة لا دار حصاد !
فازرع فيها ما يسرك غداً"

__اللهُمَّ إني اسألُكَ قلبًا، لا تُعطِّلهُ الأحزانُ عنِ السَّعِي🥀

حول معنى وصية جبريل : ي محمد عشت ماشئت فإنك ميّت ! ☝🏼

"ما من أيام أعظم عند الله ولا أحب إليه العمل فيهن من هذه الأيام العشر فأكثروا فيهن من التهليل والتكبير والتحميد "

هو بس الواحد يستوعب يعني شنو "ما مِن أيامٍ العمَلُ الصالحُ فيها أحَبُّ إلى الله من هذه الأيام"! 🙌💕

📌الشرطة السودانية تطلق منصة البلاغ الإلكتروني

- بلاغات المفقودين
- بلاغات التعدي على النفس ( قتل، أذى جسيم، إعتداء جنسي، خطف ).
- بلاغات التعدي على المال ( سرقة، نهب، إتلاف ).
- بلاغ مركبة مفقودة
- بلاغ العثور على مركبة مجهولة

إبداع والله، أن تأتي متأخراً خير من ألّا تأتي

أي مبادرة زي دي من أي مؤسسة حكومية يفترض تلقى الإشادة والدعم والمساندة
نتمنى منهم تجويد الخدمة وتطويرها والمحافظة على إستمراريتها حتى بعد زوال الظرف الطارئ

- رابط التطبيق:
#الشرطة

https://sudanpolice.net/?fbclid=IwAR1X6C30idaneEPchmvP-Ya0pEvPbGcvZcrXCgJ0G9WgTOTx8KpYliFgLqY

_منقول

__ شفت خبر البت البتسوق ركشة في شندي في صُحبة أبوها الكفيف، انا كان سبق علقت على حالات زي دي، ودي فرصة اعيد النظر في القضية دي خصوصًا وإنو الآن بقيت شايفاها من زاوية أوسع، القضية هي:"عمل النساء في اشغال لا تليق بالمرأة" زي الأعمال الشاقة جسديًا.

في البداية أي زول من حقه يشتغل أي شغل، وعمل المرأة بتحده الضوابط الشرعية ودا وجه الممانعة لا غير، ماف شغل عيب أو غلط طالما هو في حدود المباح، والمضطر بيشتغل حتى الأطفال و المعاقين حركيًا وذهنيًا.

السؤال هو ما سؤال حقها تشتغل أو لا؟ السؤال هو لية اضطرت تشتغل شغل زي دي لا يليق بالمرأة؟ شنو هي درجة العوز الوصلت ليها عشان تخرج لهكذا عمل.

وجه الممانعة عندي هو تصدير النماذج دي باعتبارها دلالة على قوة المرأة، أو استقلاليتها، مع أنو الدفعها للعمل هو الحوجة ولو لقت من يكفيها ربما تخلت عن الشغل.

هي قوية بالفعل لأنها قدرت على العمل دا، لكن دا ما بيخرجو من دائرة عمل المضطر والمحتاج حوجة قاهرة، وبتجي الخطابات النسوية تقوليك:"المرأة زي الرجل لأنها قدرت تشتغل الأشغال الشاقة" الرجال ذات نفسهم لو لقوا طريقة ما عايزين يشتغلوا الشغلانيات دي عشان تجوا أنتو تبقوها ميدان للمنافسة😀
ياخ ماذا حل بالإنسان عشان بقا يتبارى في البؤس؟

ما علينا...

أول المشاعر البتنتابني لما أشوف صور زي دي هي إني بزعل على حالها، وبتمنى حقيقة لو أنها ما اتخت في الموقف دا، لو كان ليها أب أو أخ أو عم أو غيرو يكفيها حر الشمس والشغل الجسدي المرهق، لأنو الأشغال دي شاقة حتى للرجال فما بالك بجسد المرأة الأضعف من جسد الرجل؟

المشاعر العايز الخطاب العالمي لقضايا المرأة يخليك تحسها تجاه الصور الزي التحت دي هي:"الفخر" و "يا سلام نساء بلادي قادرات"، مع إنو الإحساس الحقيقي هو الزعل على حالنا و سؤال انفسنا :"ليه وصل مجتمعنا درجة من الفقر وانعدام المرؤات العامة حتى خرج الأطفال والنساء وذوي الاحتياجات الخاصة و كبار السن لطلب الرزق بالصورة دي؟"

إذا مجتمع ما قادر يكفي ضعافه؛ فأي خير فيه؟

ملاحظة:
في ناس حتفهم من كلامي دا إني بقول لا هي ما تشتغل الشغلانية دي وأحسن تقعد في بيتها، فياعزيزي إذا أنت فهمت كدة علق ليك برأيك الألمعي دا خليني أوديك حتة تعجبك فيها ناس كتار زيك.

الناجي من هذه الحرب ليس هو من لم تصبه طلقة أو يُسرق بيته أو سيارته أو يُهتك عرضه من أنجاسها أو يحرق متجره أو مصنعه ..
ولكن الناجي من فهم الرسالة من هذا الابتلاء {حتي يغيروا ما بأنفسهم} ..
الناجي هو من نظر حوله فرأى الدمار وأيقن بأن الأمان ليس في مال يكنزه، ولا منصب يصبو إليه، ولا سكن فاخر يتباهي به .. ولكن الناجي من بادر بالتوبة وسارع إليها وراجع مسلكه وأسلوب حياته وأعاد النظر في إيمانياته وقربه وتقربه من الله ،، الناجي الحقيقي هو من إذا رفع يديه إلى السماء وقال يا رب أجابه الله لبيك عبدي ..

اللهم أخرجنا من هذه الغمة سالمين واجعل في لطفك بنا آية .. ربي إنك تعلم السر وأخفى وتعلم مافي أنفسنا وما يؤلم قلوبنا .. ربنا فوضنا أمرنا إليك فلا تكلنا إلي أنفسنا طرفة عين واجعل لنا من لدنك ولياً ونصيرا.
🌸💝🌸
#عبوديات_الحرب.

__ كنت بتساءل عن سبب انتشار وسهولة الزيجات في الريف عكس الحضر، والحاجة الفطنت ليها إنو من العوامل الرئيسة بل قد يكون العامل الفارق = أن الأدوار بين الجنسين في الريف مقسمة بصورة واضحة و متمايزة.

رجل الريف عارف دوره تمامًا وموقن بأهميته في الأسرة، وتم تدريبه مسبقًا في فترات حياته كلها على دوره كقائد وكقوام.

وامرأة الريف عارفة وسبق تدريبها في مراحل حياتها المختلفة على دورها المستقبلي كأم.

التمايز والتحديد دا بيسهِّل عملية الاختيار، لأن المرأة أيًا كان الرجل الاختارته هو بلا شك حيقوم بالحد الأدني من واجباته كزوج _ أما انصياعًا للتدريب السابق الذكر أو بسبب الضغط المجتمعي من مجتمع الريف _ والعكس صحيح للرجل مع المرأة.

طبعًا القيام بالواجبات دي لا يعني يقينًا السعادة الزوجية واستقرارها أو حتى استمرارها، لكن بيعني الاقبال عليها، لأن الرجل عارف إنو حاجاته الأولية كرجل حتلبى، والمرأة عارفة كذلك إنو حاجاتها الأولية حتلبى.

حوارات الحضر اليوم حول موضوع الزواج وصلت درجة من التعقيد للحد الماف واحد من الجنسين ضامن إنو احتياجته من الزواج دا حتلبى، حوارات الإنجاب والاحتياج العاطفي والانفاق، دي كلها حاجات غير محسومة في زواجات الحضر، ومرات الحسم فيها بيكون غير عادل للطرفين.

فبقى في نفور عام من فكرة الزواج، لأنو ماف زول ضامن حاجة، بل قد يطرأ لبعض الأفراد إنو الزواج في حد نفسو استثمار بلا عائد مضمون فبيعزفوا عنه كليًا، وبيستبدلوه بمشبعات مفككة من صيغة الزواج الأصلية، إشباع الاحتياج العاطفي بعلاقات غير ملزمة (الارتباط) أو بالاستهلاك، استبدال الأطفال بالحيوانات الأليفة، الأنفاق بعيش الفردانية وأي زول ينفق على نفسه...الخ


دا طبعًا في غياب للتدريب الكافي منذ الصغر على أدوار الأبوة والأمومة، فبيلقى الفرد نفسه في يوم من الأيام في مواجهة كم هائل من المشاعر الما عارف يصرفها تصريفها الصحيح، مشاعر احتياج ورغبة كلها غير مهذبة وغريبة، الحاجات الوحيدة البيدرب عليها إنسان الحضر المعاصر هي إنو يصبح موظف مثالي، أما حياته خارج إطار العمل فهي غير مهمة ومهمشة، أو بتدريب معطوب مصدره المسلسلات وبرامج الترفيه.

ختامًا:
دا ما بيعني إنو الحياة الزوجية في الريف جنة زوجية، أو إنو طريقة توزيع الأداور في الريف عادلة هي كمان، خصوصًا إنو اغلبها قائم على أعراف جاهلية، لكن مرة تانية إحنا بنتكلم عن مسألة الأقبال لا الاستمرار أو الأحقية.