#Ustoz_va_murabbiylar_kuni

💐 USTOZGA EHTIROM — KELAJAKKA EHTIROM

Aziz ustoz va murabbiylar!

Sizlarni 1-oktabr — O‘qituvchi va murabbiylar kuni bilan chin qalbdan muborakbod etamiz!

Ustozlik — bilim berish bilan cheklanmaydigan ulug‘ mas’uliyat. Siz o‘quvchining iste’dodini kashf etasiz, uning imkoniyatlariga ishonasiz, izlanishga undaysiz va eng muhimi — kelajakda o‘z o‘rnini topishiga yo‘l ko‘rsatasiz.

Bugun Agentlik tizimidagi o‘quvchilarimizning xalqaro olimpiadalarda qo‘lga kiritayotgan medallari, nufuzli universitetlarga qabul qilinayotgani, ilm-fan, ijod, sport va zamonaviy texnologiyalar yo‘nalishlarida erishayotgan har bir yutug‘i ortida ustozlarning katta mehnati, sabri va fidoyiligi bor.

Mamlakatimizda pedagoglarning nufuzi va maqomini yuksaltirish, ularning mehnatini munosib qadrlash va yangi imkoniyatlar yaratishga qaratilayotgan e’tibor ustozlar zimmasiga yanada katta ishonch va mas’uliyat yuklamoqda. Zero, ta’limga kiritilgan eng katta sarmoya — bu, avvalo, ustozga bildirilgan ishonchdir.

Qadrli ustozlar!

Har bir shogirdingizning yutug‘ida siz bergan bilim, har bir dadil qadamida siz bildirgan ishonch, har bir katta marrasida esa sizning mehnatingiz mujassam.

Sizlarga mustahkam sog‘lik, oilaviy farovonlik, sharafli faoliyatingizda ulkan muvaffaqiyatlar va shogirdlaringiz yutuqlaridan doimo faxrlanib yurish baxtini tilaymiz.

Bizni kuzating

💻web 🌐Telegram ▶️YouTube 🌐Instagram 🌐Facebook ⚙️Portal ✨Direktor

#Ustozimga_rahmat
#Ustoz_va_murabbiylar_kuni

USTOZGA EHTIROM — SHE’RIY KOMPOZITSIYA

🖌 Ustoz — nafaqat bilim beruvchi, balki o‘quvchining iste’dodini yuzaga chiqaradigan, unga ishonch berib, maqsadlari sari yo‘l ko‘rsatadigan inson.

1-oktabr — O‘qituvchi va murabbiylar kuni arafasida Agentlik tizimidagi Abdulla Oripov nomidagi ijod maktabining 11-sinf o‘quvchilari ustozlariga bag‘ishlangan she’riy kompozitsiya tayyorladilar.

Ustoz bergan bilim, ishonch va hayotiy saboqlari shogirdlari qalbida va ularning kelgusi yutuqlarida o‘z aksini topadi. Aziz ustozlar, mehnatingiz uchun rahmat!

Bizni kuzating

💻web 🌐Telegram ▶️YouTube 🌐Instagram 🌐Facebook ⚙️Portal ✨Direktor

Hurmatli ustoz va murabbiylar!

Sizlarni 1-oktabr — O‘qituvchi va murabbiylar kuni bilan chin qalbimdan tabriklayman. Har birimizning hayotimizda qobiliyatimizni ilg‘agan, bizga ishongan va to‘g‘ri yo‘l ko‘rsatgan muallimning alohida o‘rni bor. Bugun siz ham farzandlarimizga ana shunday mehr va mas’uliyat bilan saboq berib, ularni katta maqsadlar sari ruhlantiryapsiz.

Prezidentimiz tashabbusi bilan ta’lim sohasida amalga oshirilayotgan islohotlarda pedagoglarning jamiyatdagi mavqeyini yuksaltirish, mehnatini munosib qadrlash va kasbiy rivojlanishi uchun sharoit yaratishga alohida e’tibor qaratilmoqda. Bu jarayonda sizning tajribangiz, taklif va tashabbuslaringiz biz uchun muhim. Har bir tarbiyachi va o‘qituvchining o‘z ishidan mamnun bo‘lib, bilim va mahoratini bolalar kamoliga bag‘ishlashi uchun imkoniyatlarni kengaytirish — ustuvor vazifamiz.

Aziz pedagoglar!

Barchangizga mustahkam sog‘lik, oilaviy baxt va xotirjamlik, sharafli faoliyatingizda muvaffaqiyatlar tilayman. Doimo yaqinlaringiz, shogirdlaringiz va el-yurtimiz ardog‘ida bo‘ling.

Kasb bayramingiz muborak bo‘lsin!

Hurmat bilan, 
E’zoza Karimova, 
Maktabgacha va maktab ta’limi vaziri

✉️ Telegram 📱 Instagram 🗳 Facebook

#Ustoz_va_murabbiylar_kuni

💐 HAR BIR YUTUQ ORTIDA USTOZ BOR

Aziz ustozlar, qadrli murabbiylar!
Sizlarni 1-oktabr — O‘qituvchi va murabbiylar kuni bilan chin qalbimdan tabriklayman!

Faoliyatim davomida bir haqiqatga ko‘p bor amin bo‘ldim: o‘quvchining katta yutug‘i hech qachon o‘z-o‘zidan kelmaydi. Uning ortida albatta ustozning mehnati, sabri, ishonchi va tinimsiz izlanishi turadi.

O‘quvchimiz xalqaro olimpiadada medal olganida, nufuzli universitet talabasi bo‘lganida, yangi g‘oya yoki kashfiyoti bilan e’tirof etilganida biz uning muvaffaqiyatidan quvonamiz. Ammo ana shu natijagacha bo‘lgan uzoq yo‘lda unga bilim bergan, xatosini to‘g‘rilagan, ba’zan ruhlantirgan, ba’zan esa shunchaki “Sen buni uddalaysan!” deb ishongan ustoz bor.

Shuning uchun men uchun ta’limdagi eng katta kuch — bu o‘z kasbini sevadigan, shogirdining kelajagiga befarq bo‘lmagan ustozdir.

Bugun Agentlik tizimida ana shunday fidoyi pedagoglar bilan bir safda mehnat qilayotganimdan faxrlanaman. O‘quvchilarimiz erishayotgan har bir natijada sizlarning munosib hissangiz bor.

Qadrli ustozlar!

Sizlarga shogirdlaringizning yutuqlaridan quvonib, mehnatingiz samarasini ko‘rib yashash baxti nasib etsin. Oilangizga xotirjamlik, o‘zingizga mustahkam sog‘lik, faoliyatingizga esa yangi kuch va muvaffaqiyatlar tilayman.

Siz bergan bilim bir kun kelib natijaga, siz bildirgan ishonch esa katta orzularga aylanadi.

✅Rasmiy sahifalar

#Ustozimga_rahmat
#Ustoz_va_murabbiylar_kuni

💐 BA’ZAN ENG KATTA SOVG‘A — SAMIMIY BIR SO‘Z…

1-oktabr — O‘qituvchi va murabbiylar kuni arafasida Agentlik tizimidagi Urganch shahar 1-son ixtisoslashtirilgan maktab-internati o‘quvchilari ustozlari va maktab xodimlariga samimiy tilaklari hamda minnatdorliklarini izhor etdilar.

Zero, ustozga aytilgan birgina “Rahmat!” so‘zi ortida uning bergan bilimi, ko‘rsatgan mehri, sabri va shogirdi kelajagi uchun qilgan mehnatiga bo‘lgan katta ehtirom mujassam.

Maktab — nafaqat bilim beriladigan, balki mehrni qadrlash, yaxshilikni ko‘ra bilish va minnatdor bo‘lish kabi insoniy fazilatlar shakllanadigan maskan.

Bizni kuzating

💻web 🌐Telegram ▶️YouTube 🌐Instagram 🌐Facebook ⚙️Portal ✨Direktor

SAT — 1500, IELTS — 8.0: YANA BIR YUQORI NATIJA!

🎓 Agentlik tizimidagi Toshkent shahridagi Prezident maktabi o‘quvchisi Asilbek Ashrapov Digital SAT imtihonidan 1500 ball to‘pladi.

Avvalroq Asilbek xalqaro IELTS imtihonidan 8.0 ball qayd etgan edi. O‘quvchimiz nafaqat akademik yo‘nalishda, balki xalqaro tanlov va dasturlarda ham munosib natijalarga erishib kelmoqda.

Asilbek — Abu-Dabida o‘tkazilgan “Zayed Sustainability Prize” xalqaro tanlovi g‘olibi, TeenEagle xalqaro ingliz tili musobaqasi bronza medali sohibi hamda “Lumiere Individual Research” dasturining 100 foizlik grant sohibi.

Bizni kuzating

💻web 🌐Telegram ▶️YouTube 🌐Instagram 🌐Facebook ⚙️Portal ✨Direktor