Bank-moliya xizmatlari fakulteti tyutori H.Jo‘lanov hamda A.S.Pushkin nomidagi Samarqand viloyat axborot-kutubxona markazi hamkorligida “Kitobsevar millat” shiori ostida o‘tkazilgan VI Respublika “Kitobxonlik haftaligi” doirasida “Birinchi qadam” nomli uchrashuv tashkil etildi.

Mazkur uchrashuvda La Esmeralda, Shampoor, Laghan loyihalari asoschisi Azim Bayonxonov, SDM international school xususiy maktablar asoschisi Azamat Axmedov, Samarqand viloyat yoshlar kelajagimiz jamg'armasi bosh mutaxassisi Sanjar Salohiddinov, Ako Shams Consulting MChJ direktori Akobir Shamsiyevlar o‘z ma’ruzalari bilan qatnashdilar.

Tadbir davomida mehmonlar talabalarga tadbirkorlik, ilm-fan hamda turli startap loyihalarni rivojlantirish bo‘yicha o‘z tajribalari, takliflari va amaliy maslahatlarini ulashdilar.

🌟🌟🌟🌟🌟🌟🌟🌟🌟

Samarqand iqtisodiyot va servis instituti real iqtisodiyot kafedrasi hamda iqtisodiyot fakulteti tyutorlari tashabbusi bilan birinchi bosqich talabalari ishtirokida “Yoshlar ongini asrash – kelajakni himoya qilish: giyohvandlikka qarshi kurashning dolzarb masalalari” mavzusida davra suhbati tashkil etildi. Tadbir yoshlar ongida sog‘lom turmush tarzini shakllantirish, zararli odatlardan uzoq bo‘lish hamda giyohvandlikning jamiyat taraqqiyotiga salbiy ta’siri haqida tushunchalarni mustahkamlash maqsadida o‘tkazildi.

Davra suhbatida kafedra professor-o‘qituvchilari tomonidan giyohvandlikning ijtimoiy va iqtisodiy oqibatlari, uning inson salomatligi, oilaviy muhit hamda mehnat unumdorligiga salbiy ta’siri haqida batafsil ma’lumotlar berildi. Shuningdek, ushbu illatning oldini olishda ta’lim muassasalari, oila va jamiyatning o‘rni muhim ekani alohida ta’kidlandi.

Tadbir davomida talabalar o‘z fikr-mulohazalarini bildirishdi hamda savol-javoblar orqali mavzu yanada chuqurroq yoritildi. Interaktiv muhokamalar yoshlarning masalaga ongli yondashuvini shakllantirishga xizmat qildi.

Davra suhbatining yakunida talabalarda giyohvandlikka qarshi murosasiz munosabatni shakllantirish va sog‘lom turmush tarziga amal qilish zarurligi bo‘yicha muhim xulosalar qilindi.

🌟🌟🌟🌟🌟🌟🌟🌟🌟

Iqtisodiyot fakulteti tyutorlari tashabbusi bilan talabalarning bo‘sh vaqtini mazmunli tashkil etish, ularning tarixiy tafakkuri va madaniy dunyoqarashini boyitish maqsadida O‘zbekiston madaniyati tarixi davlat muzeyiga ekskursiya uyushtirildi.

Mazkur ekskursiya davomida talabalar muzeyda saqlanayotgan noyob tarixiy eksponatlar, milliy madaniyatimiz va san’atimizga oid bebaho meros namunalari bilan yaqindan tanishdilar. Shuningdek, ularga yurtimizning boy madaniy tarixi, ajdodlarimiz tomonidan yaratilgan ma’naviy va moddiy boyliklar, ularning bugungi avlod tarbiyasidagi o‘rni haqida batafsil ma’lumotlar berildi.

🌟🌟🌟🌟🌟🌟🌟🌟🌟

Samarqand iqtisodiyot va servis instituti servis fakultetida talaba-yoshlarning turizm sohasiga bo‘lgan qiziqishini oshirish hamda ularning kasbiy bilim va ko‘nikmalarini mustahkamlash maqsadida “O‘zbekistonning turizm salohiyati” mavzusida davra suhbati tashkil etildi.

Mazkur tadbirda fakultet professor-o‘qituvchilari, tyutorlar hamda talabalar faol ishtirok etib, mamlakatimizning boy tarixiy-madaniy merosi, noyob tabiiy resurslari va zamonaviy turizm infratuzilmasi haqida atroflicha fikr almashdilar. Xususan, O‘zbekiston hududida joylashgan ko‘plab tarixiy obidalar, ziyoratgohlar, shuningdek, ekologik va gastronomik turizm yo‘nalishlarining jadal rivojlanayotgani alohida ta’kidlandi.

Davra suhbati davomida turizm sohasini rivojlantirishda innovatsion yondashuvlar, raqamli marketing vositalaridan samarali foydalanish, xizmat ko‘rsatish sifatini oshirish hamda xorijiy turistlar oqimini ko‘paytirish masalalari keng muhokama qilindi. Talabalar tomonidan berilgan savollarga mutaxassislar tomonidan batafsil va asosli javoblar berildi.

Tadbir yakunida ishtirokchilar O‘zbekistonning turizm salohiyatini yanada keng targ‘ib qilish, yoshlar o‘rtasida turizm madaniyatini rivojlantirish hamda sohada malakali kadrlar tayyorlash muhim ahamiyat kasb etishini alohida qayd etdilar.

🌟🌟🌟🌟🌟🌟🌟🌟🌟

Turizm kafedrasi katta o‘qituvchisi Sh.Abdurasulov tomonidan sirtqi ta’lim fakultetining “Mehmonxona xo‘jaligini tashkil etish va boshqarish” ta’lim yo‘nalishi 3-bosqich talabalari uchun Imom Buxoriy majmuasi hududida amaliy mashg‘ulot darslari tashkil etildi.

Mazkur amaliy dars jarayonida talabalar nafaqat nazariy bilimlarini mustahkamlash, balki turizm sohasida muhim ahamiyat kasb etuvchi ziyorat turizmi, mehmonlarga xizmat ko‘rsatish madaniyati hamda ekskursiya jarayonlarini tashkil etish bo‘yicha bevosita amaliy ko‘nikmalarga ega bo‘ldilar. Shuningdek, majmuaning tarixiy va madaniy ahamiyati, ziyoratchilar bilan ishlash etikasi hamda mehmonxona xo‘jaligi faoliyatida muhim bo‘lgan servis standartlari haqida batafsil tushunchalar berildi.

🌟🌟🌟🌟🌟🌟🌟🌟🌟

Samarqand iqtisodiyot va servis instituti psixologi D.To‘xtamisheva hamda buxgalteriya hisobi va menejment fakulteti tyutori Sh.Abduraxmonova hamkorligida talabalar ishtirokida “Hayot go‘zal – yashamoq totli”, “Hayot qadri” mavzularida aksiya, shuningdek, “Quyosh va bulut” hamda “Ranglar mening hayotimda” mavzularida psixologik trening va metodik mashg‘ulotlar o‘tkazildi.

Mazkur mashg‘ulotlar davomida ijobiy sifatlarning inson hayotidagi o‘rni alohida ta’kidlandi. Ijobiy sifatlar insonni yashashga, maqsadlariga erishishga va shaxsiy rivojlanishga undasa, salbiy sifatlar aksincha, turli to‘siq va muammolarni yuzaga keltirishi qayd etildi.

O‘tkazilgan mashqlar orqali talabalar o‘z hayotidagi ijobiy jihatlarni chuqurroq anglashni boshladilar, salbiy fikrlarni tan olib, ularni boshqarishga intildilar. Shu bilan birga, ular o‘z his-tuyg‘ularini erkin ifoda etish imkoniyatiga ega bo‘ldilar. Mashg‘ulotlar stressni kamaytirish, kayfiyatni ko‘tarish hamda diqqatni muhim jihatlarga jamlashga xizmat qildi.

🌟🌟🌟🌟🌟🌟🌟🌟🌟

Servis fakulteti talabalari uchun sanitariya va gigiyena fanidan amaliy dars bo‘lib o‘tdi. O‘quv mashg‘ulotlari “Makon Mall” MCHJning ovqatlanish va savdo shahobchalarida o‘tkazildi.

Dars davomida talabalar ovqatlanish korxonalarida sanitariya-gigiyena qoidalariga rioya etish, oziq-ovqat mahsulotlarini saqlash va qayta ishlash jarayonlari, xodimlarning shaxsiy gigiyenasi hamda ish joyining tozaligini ta’minlash bo‘yicha amaliy bilim va ko‘nikmalarga ega bo‘ldilar. Shuningdek, savdo shahobchalarida mahsulotlarning saqlanish sharoitlari, yaroqlilik muddati va ularning sifat nazorati jarayonlari bilan yaqindan tanishdilar.

Mashg‘ulot jarayonida mutaxassislar tomonidan talabalarga zamonaviy talablar asosida sanitariya me’yorlari tushuntirilib, real ish jarayonida uchraydigan muammolar va ularning yechimlari misollar orqali ko‘rsatib berildi. Talabalar o‘zlarini qiziqtirgan savollarga batafsil javob oldilar hamda nazariy bilimlarini amaliyot bilan mustahkamlash imkoniga ega bo‘ldilar.

🌟🌟🌟🌟🌟🌟🌟🌟🌟