- Samarqandda jamoat transportida to‘lov tizimi to‘liq elektron shaklga o‘tgach, qaysi to‘lov usuli eng qulay va foydali bo‘ladi?

Yo‘lovchilar uchun shahar jamoat transportida quyidagi to‘lov usullari mavjud bo‘ladi:

📌Bir martalik avtobus QR-chiptasi – uni Multipay, Paynet va Oson infokiosklari orqali naqd pul evaziga 3000 so‘m narxda xarid qilish mumkin bo‘ladi. Chipta faqat bir kun davomida amal qiladi. To‘lov faqat avtobus salonining old eshigida joylashgan validator orqali amalga oshiriladi. Avtobusga old eshikdan kirishda chiptani validatorning pastki qismida joylashgan skanerga tutish va ekranda yashil “belgi” (✅) paydo bo‘lguncha kutish kerak — bu yo‘l haqi muvaffaqiyatli to‘langanini anglatadi. Сhipta safar tugaguncha saqlab qo‘yilishi lozim.

Afzalliklari: deyarli yo‘q.

Kamchiliklari: chipta narxi (3000 so‘m), ishlayotgan infokiosknini topish zarurati.

📌ATTO transport kartasi – uni istalgan UzPost pochta bo‘limlarida xarid qilish mumkin.

Afzalliklari: yo‘l haqi 2000 so‘m, turli tariflarni tanlash imkoniyati (SMS xabarnoma funksiyasi mavjud bo‘lsa), transfer uchun kompensatsiya tizimi mavjud.

Kamchiliklari: bir kartadan bir nechta yo‘lovchi uchun to‘lov qilish imkoni yo‘q.

📌Bank kartalari (HUMO, Uzcard, UnionPay, Visa, MasterCard).

Afzalliklari: yo‘l haqi 2000 so‘m, bitta karta bilan bir nechta yo‘lovchi uchun to‘lov qilish mumkin.

Kamchiliklari: kompensatsiya tizimi mavjud emas.

📌Mobil to‘lov tizimlari (Uzum Bank, Payme, ATTO) – smartfon yordamida.

Afzalliklari: jismoniy bank yoki transport kartasini sotib olish va olib yurish shart emas. ATTO mobil ilovasi orqali yaratilgan virtual ATTO kartasi yordamida transport kartasining barcha imkoniyatlari saqlanib qoladi: tariflarni xarid qilish, kompensatsiya tizimi mavjud.

Kamchiliklari: bir nechta yo‘lovchi uchun to‘lov qilish imkoniyati yo‘q.

Aholi murojaatlari — transport boshqarmasi uchun ustuvor.

Viloyat transport boshqarmasiga kelib tushayotgan barcha murojaatlar e’tiborsiz qolmaydi.

Yangi avtobus yo‘nalishini tasdiqlashdan avval viloyat transport boshqarmasi boshlig‘i Ravshan Tojiyev hamda mas’ul xodimlar birinchi navbatda aholi tomonidan bildirilgan takliflarni atroflicha o‘rganadilar.

Shundan so‘ng boshqarma boshlig‘i mas’ul mutaxassislar bilan birgalikda avtobusda butun yo‘nalish bo‘ylab harakatlanib, uning maqsadga muvofiqligi va aholiga qulayligini joyida baholab chiqadi.

Bunday yondashuv aholining haqiqiy ehtiyojlarini inobatga olish hamda jamoat transporti xizmatini yanada yaxshilash imkonini beradi.

MILLIY TASHUVCHILAR DIQQATIGA!

Rossiya Federatsiyasi hududida xalqaro yuk tashuvchi haydovchilar uchun yangi talablar joriy etildi. 2025-yil 1-yanvardan boshlab haydovchilarning mamlakat hududida bo‘lish muddati — kirgan-chiqqan safarlar sonidan qat’i nazar 90 kundan oshmasligi qat’iy belgilandi.

Shu munosabat bilan ayrim milliy avtotashuvchi korxonalar haydovchilariga nisbatan Rossiyaga kirishda deportatsiya yoki kirishni taqiqlash holatlari qayd etilmoqda.

Shunday holatlarga duch kelgan transport tashkilotlaridan quyidagi ma’lumotlarni taqdim etish so‘raladi:

- Rossiya tomonidan taqiq qo‘yilgan yoki deport qilingan haydovchilarning pasport nusxasi;

- Bayonnoma (protokol) nusxasi.

📨 Ushbu hujjatlarni @Transportmarkazi ga yuborish so‘raladi.

#Munosabat

Ijtimoiy tarmoqlarda 74-sonli “Sartepa maskani-Avtovokzal” shahar avtobus yo‘nalishida harakatlanuvchi, davlat raqami 30/943 LBA bo‘lgan avtobus haydovchisi tomonidan yo‘lkira haqini bank kartasi orqali bir yo‘lovchi bir necha yo‘lovchi uchun to‘lashga ruxsat bermaganligi va qo‘polligi yuzasidan murojaat tarqaldi. Shuningdek, keyingi vaqtlarda aynan yuqoridagi kabi holatlar bo‘yicha yo‘lovchilar tomonidan e’tirozlar bo‘lmoqda.

Mazkur holat yuzasidan quyidagilarni ma’lum qilamiz:

Murojaatda ko‘rsatilgan holat qayta takrorlanmasligi hamda jamoat transportida xizmat sifatini yaxshilash maqsadida 74-sonli “Sartepa maskani-Avtovokzal” shahar avtobus yo‘nalishida xizmat ko‘rsatuvchi “Marokand Trans 777” MChJda haydovchilar o‘rtasida tushuntirish ishlari olib borildi. Unda haydovchilarga yo‘lovchilar bilan muloqotga kirish jarayonida samimiy bo‘lish, ehtiroslarga berilmaslik, qo‘pollik qilmaslik yuzasidan ogohlantirish berildi.

Batafsil samarqand.mintrans.uz saytida