Tadbirlar “Yagona Vatan, yagona xalq bo‘lib, yangi hayot va kelajak yaratamiz!” degan ezgu bosh g‘oya ostida ko‘tarinki kayfiyatda tashkil etildi.

Xususan, Samarqand tumanidagi 5-son umumiy o‘rta ta’lim maktabida o‘tkazilgan bayram tadbirida tuman hokimi S.Usmanov ishtirok etib, o‘quvchilar, ustoz va murabbiylar hamda ota-onalarni yangi o‘quv yili boshlanishi bilan samimiy tabrikladi.

Tuman rahbari o‘z tabrigida yosh avlodga sifatli ta’lim va munosib tarbiya berishdek sharafli va mas’uliyatli vazifani ado etayotgan ustozlarga minnatdorlik bildirib, ularning faoliyatida muvaffaqiyatlar tiladi. O‘quvchilarga esa yangi bilimlarni egallash, izlanish va kelajakda Vatanimiz ravnaqiga munosib hissa qo‘shish yo‘lida ulkan zafarlar tilandi.

Bayramona ruhda o‘tgan tadbirlarda maktablarning 1-sinf o‘quvchilariga Prezident sovg‘alari — maktab sumkasi, o‘quv qurollari hamda darsliklar to‘plami tantanali ravishda topshirildi.

O‘qituvchilarga ta’lim sifatini oshirishga alohida e’tibor qaratish, darslarni samarali tashkil etish hamda o‘quvchilarning bilimini yanada mustahkamlash zarurligi tushuntirildi.