الشاعر محمد احمد مفلح

(القصيدة التي ألقيتها في مظاهرة اليوم بمحافظة صعدة)

امهش على روس الاعدا بالمنايا مهوش
واجرش بهم للدرك الاسفل وسوء المآب

كوش الجحافل وعزرائيل قبلك يكوش
يفتح عليهم جحيم الموت من كل باب

بالآر بي جي وبالبي ام والكاتيوش
واذا ابعدوا بالمسيّر صب سوط العذاب

يهوش من حق بركان اليماني يهوش
نهاية الشر حلّت باكتمال النصاب

خامس سنه والمنافق ف الهزايم يدوش
ما جاب من جيش يغزينا تبخّر وذاب

جاب البلاكي وجاب الجنجود والبلوش
ولا نفع خادم اسرائيل ما جا وجاب

مهبول يبغى يقاتل شعبنا بالقروش
جرّب جميع الطوايف في لقانا وخاب

بالله خابت جميع الاسلحه والجيوش
وانشد عن الفرع والوادي يجيك الجواب

نصرٌ من الله لانصاره قشوش القشوش
حتى امتلت بالغنايم الاوديه والشعاب

شاصات شد الوكاله والهمر والشكوش
جينا بها قبل ما يقبض ترامب الحساب

بين القراطيس ما حتى وصلها خدوش
مخازن الاسلحه ما لذ منها وطاب

الأسرى بالآلاف يا حيا بكل الطروش
مجهود عامين في يومين واصبح سراب

عبر المسيرة نقلناها بلا ايا رتوش
والمالكي ما قد استوعب لكبر المصاب

كم هنجموا ف البداية واخرتها فشوش
والكبر ما يوم يرفع صاحبه في جناب

تبقى الثعالب ثعالب والوحوش الوحوش
والعز عز المواقف في الظروف الصعاب

اما اليمن دونها للخصم نعث المشوش
ما يصبح الصبح غير وهو يقم التراب

وحماتها كمن احمر عين راسه يشوش
والكل تحت امر ابو جبريل شيبه وشاب

يا سيدي والطواير ما تهز الرموش
جندك معك وين ما اتوجهت سقنا الركاب

واللي تريده نجيبه والمنايا عطوش
ملعون من هو تراجع لا زهمته وغاب

مجد اليمن يا ابن ناقص بالقلم والنقوش
ولا انت مذكور في سنه ولا في كتاب

اسأل عن الترك في غزو اليمن والحبوش
عسى تدلك مقابرهم طريق الصواب

ما عندنا للعدا غير الفنا والنعوش
نمشي على الارض والهامات فوق السحاب

لا بد نسقط مماليك الردى والعروش
لو بانقاتل قوى امريكا ليوم الحساب

يا عيشة الذله روحي وارحلي نعنبوش
ندعس على الشوك ما احنا داهلين الرغاب

ما دام عاد البنادق بالمعابر تنوش
حرام ما نوقف الا ف المقام المهاب
#بقلم_الشاعر_محمد_أحمد_مفلح #امريكا_تقتل_الشعب_اليمني #اليمن_مقبرة_الغزاة #أنفروا_خفافا_وثقالا #ثبات_وانتصار #نصر_من_الله_وفتح_قريب
🔸لمتابعتنا على التيلجرام
🔰 https://t.me/joinchat/AAAAADwjYtLdOZZL04uGDA