2018-yilda boshlangan internet bahsiga yaqinda yo‘liqib qoldim. Videoda bir so‘z talaffuz qilinadi, odamlar buni 2 xil eshitadi: LORL (Lauerl) yoki YENNIY (Yanny).

Tadqiqotga ko‘ra, 47 % odam ushbu so‘zning avvalgi harfi «Y», qolgan 53 % i esa «L» ekanini aytgan.

Olimlar buni quloq va ovoz chastotasiga bog‘liq ekanini, bu so‘z past chastotali tovushni yaxshi eshitadiganlarga LORL, yuqori chastotani yaxshi ilg‘aydiganlarga YENNIY bo‘lib eshitilishini ta’kidlaganlar. Yosh o‘tgan sari yuqori chastotali ovoz quloq uchun «notanish» bo‘lib boradi. Demak siz videodagi ovozni YENNIY yoki shunga yaqin «Y» bilan boshlangan so‘z sifatida eshitgan bo‘lsangiz, qulog‘ingiz a’lo...

Bularning hammasi o‘z yo‘liga. Muhimi - bu holatdan hayotiy xulosalar chiqarishimiz. Masalan:

1. Eshitgan hamma narsangizga ishonavermang!
2. Odamzot bildirgan har qanday fikr xato bo‘lishi mumkin!
3. Siqilmang! Odamlar boshqacha eshitayotgandir!
4. Ixtilofga faqat so‘zlovchi emas, tinglovchi ham sababchi bo‘ladi!

@Shamsuddin_Sadruddin

Javohirdan tibbiyot masalalarida maslahat olib turaman. Sohalari shu. Bugun yozibdilar:

«Sizni bitta-ikkita doktor so'rashingiz ortidan qarang nima ishlar bo'lib ketti aka )
Ko'pchilikka ma'qul kelib, ijobiy fikr bildirishdi.

Bolalar shifokori bo'limini ham qo'shib qo'ydik. Sekin to'ldirib boramiz.

Sizda ham tajribadan o'tgan doktorlar bo'lsa, bersangiz qo'shib qo'yamiz».

@Shamsuddin_Sadruddin

Assalomu alaykum.

Sir emaski, kundalik hayotimizda salomatligimizda biror muammo bo‘lib qolsa doim yaxshi mutaxassis izlashga tushamiz. Ayniqsa, mavzu yaxshi ayol mutaxassislarga kelganda topishimiz mushkul kechadi. Shu sababdan ushbu (yangilanib, to‘ldirib boriladigan) shifokorlar ro‘yxati bir oz bo‘lsa-da og‘iringizni yengil qiladi degan umiddamiz. Shifokorlarning har birlari alohida o‘rganib tartiblanmagan, balki ularning tajribalariga, xalq orasida tanilganligi, umumiy ma’lumot va tibbiyot talabalari orasidagi tavsiya asosida yig‘ilgan, xolos. Kam bo‘lsa-da ko‘p o‘rinda ko‘rasiz degan umiddamiz. O‘zi manfaatli qilsin!

Ro‘yxatni ko‘rish uchun: https://docs.google.com/spreadsheets/d/1JSFMQptxu1OOSOC0LEXuiITIEDKIgZDvxNTrk-Ep8IQ/edit?gid=2110403061#gid=2110403061

https://t.me/OdamOlam

Ba’zida ayol shifokorlarni topishga qiynalib qoladi kishi. Barcha musulmon erkak onasi, opasi, singlisi, ayoli yo qizining salomatligi bilan aynan ayol shifokor shug‘ullanishini istaydi. Ushbu havolada tibbiyotning turli sohalarida faoliyat yurituvchi ayol shifokorlar bilan bir qatorda erkak shifokorlarning ham ismi-sharifi, telefon raqamlari va ish joylari ko‘rsatilgan. Ro‘yxat yanada kengaytiriladi. Bunga o‘z hissangizni qo‘shishingiz mumkin. Sinalgan yaxshi ayol yo erkak shifokorlar bilsangiz, @OlamOdambot ga yozing! Xayrli ishga hissangizni qo‘shing! Yaqinlaringizga ham xabarni jo‘natishni unutmang!

Alloh ofiyat bersin!

@Shamsuddin_Sadruddin

#Jadval_asosida

Madh, hamd va shukr orasidagi farqlar

📹 Video: 👉 bu yerda 👈

📓 Jadval: 👉 bu yerda 👈

📚Tolibi ilm yaqinlaringizga ulashing!

| Youtube | Telegram |

#Mulohaza

«Vaqt o‘tib to‘rtta tildan tashqari qolgan barcha tillar yo‘qlikka yuz tutishi mumkin:
- ingliz;
- xitoy;
- ispan;
- va arab tillari.
Ingliz tili - texnalogiya, xitoy tili - demografiya, ispan tili - adabiyot sharofati bilan yashashda davom etadi. Arab tili esa din va axloq ostida tirik qoladi».
(Kolunbiyalik yozuvchi Gabriel Garsia Markes)

@Bayanul_lisan

#Taqdim
#Tanituv

Bismillah...

Balog‘at fanining eng katta va asosiy qismi bo‘lmish «Ma’oniy ilmi»ga oid yozayotgan risolam nihoyasiga yetdi, alhamdullillah!

Risola avvalgi olimlar manhajida. Ta’rif, qoida, misol va izohlari sodda. Har mavzu so‘nggida 3 tadan kam bo‘lmagan mashqlar bor. Eng muhimi, risola matnidagi jumboqli so‘zlarni hoshiyada sharhlab ketdim. Xotima sifatida «chumoli hikoyasi»dagi 15 ta masalani aytib, ularni qisqa tarzda tahlil qildim.

Kitobcha balog‘at ummonidan bir tomchi (الطل) bo‘lishiga qaramay ahli ilm oshnosiga (المُساني) aylanar degan umidda uni «Oshno etuvchi yomg‘ir» (الطل المُساني) deb nomladim.

Risoladan foyda olsangiz Allohdan, xato ko‘rsangiz yozgan bandasidan deb biling!
_________________________________

📗 Risola nomi: «Ma’oniy ilmida oshno etuvchi yomg‘ir»
(الطل المساني في علم المعاني)

🌍 Tili: arabcha

✍️ Muallifi: Shamsuddin Sadruddin

📄 Risola hajmi: 34 sahifa

📝 Mavzusi: balog‘at

@Bayanul_lisan

Vahmiyat

Vijdonim tubiga cho‘kib boryapman,
To‘xtatdim javobsiz savollarimni.
Niyronim labiga to‘kib boryapman
to‘plagan savobsiz misqollarimni.

Sizlar xo‘b alqagan, u deb qalqigan
zaminni adashdim bahjatim atab.
Zebi sarob emish, asli balqigan
chirkini ko‘rmabman g‘aflatim sabab.

Tuprog‘i mum ekan, lolasi dimo,
Adovat mahv etmish har aroziyni.
G‘ays o‘rniga quyuq kul otib samo
Eslatar bugunga razil moziyni.

Ikki yuz insiylar ko‘zimni ochsam,
Yumsam qarshimdadir aduvvul mubin.
Qayer bor panohgoh o‘zimdan qochsam -
zulmatdan qora, oydanda to‘lin?!

Ketar yo‘lim bumi?! Shu so‘qmoqdanmi?
Nimamdir tushdi... yo yo‘qmidi boshdan?!
Menga kim hamroh?! Yurmoqdamanmi?!
Ruhimning yonishi tezmi qumoshdan?!

Chaman iforimi?! Jahannam isi?!
Saman angorimi?! Zaifmi sasi?!
Qish ayozining qor bayozimi?!
Yo chechak bosganning qoldirgan izi?

Qushlar sayrayotir - kirdimi saboh?!
Tushlar yayrayotir - tunmidir nogoh?!
Bu ne arosat?! Bu ne uqubat?!
Vahmmi?! Fahmmi?! Yaqiyn?! Ishtiboh?!

Cho‘kib bormoqdaman vijdon tubiga,
To‘xtatsam to‘xtamas javobsiz savol.
To‘ksam to‘ktirmas U niyron labiga
Misqolsiz savobim etmasdan zavol...

✍️ Shamsuddin Sadruddin (27.04.2025)

_____________________

She’rda ishlatgan har bir so‘zimni sharhlashni xohlardim. Lekin bu hech bir shoir qilmagan ish ekan. Shunga qaramay she’rim uchun ikki izoh qoldiraman:
Birinchisi, ko‘pincha she’rdagi «men» aytuvchining ayni shaxsi bo‘lmaydi. «Men» deb shoirlar hamturlari bo‘lmish odamzotni nazarda tutadilar.
Ikkinchisi, «niyron» - olov, gunohlarga ishora. Ma’siyat savobni olovdek yeb bitiradi. Gunoh qilayotgan mo‘min do‘zax boshigacha hamma savoblarini to‘kib boradi. Qalbidan huzur qochadi. Vahm olamiga kirib qoladi. Lekin Rahim Zot tavfiqi bilan so‘nggi damlarda najot topadi. Rahmon gunoh qilgan bandasini kechirishni istaydi. Baski, u banda ham buni istasin. Alloh bandasi arzimas deb o‘ylagan ishlarga qiymat beradi.

@Shamsuddin_Sadruddin

Shu paytgacha sahifani tark etmaganlarga tashakkur!)

Men bo‘lmasa-chi?!

Mening «men» deganim men bo‘lmasa-chi?!
Qo‘shib «Teng!» deganim teng bo‘lmasa-chi?!
Sening «sen» deganing eshitgach sakrab,
Jo‘shib «Keng!» deganim keng bo‘lmasa-chi?!

Topganim har neni illo qiysam-u,
Olqishlar ostida sipo iysam-u,
Tillo yeb, tillodan sarpo kiysam-u,
Lekin qo‘l solishga yeng bo‘lmasa-chi?!

Balki menikidir eng xolis toqat,
Shirin so‘z qilibman bo‘lguncha to qat,
Eng va eng kuchlisi o‘zimman, faqat,
Mening «eng», deganim eng bo‘lmasa-chi?!

✍️ Shamsuddin Sadruddin (27.04.2025)

@Vahm_olami

Bugun rosa bo‘sh bo‘ldim. Ilhom kelganiga bir qancha she’r yozib oldim (bu ilhom degani bekorchilikdan keladimi deyman). Hammasini @Shamsuddin_Sadruddin sahifasiga tashlasam, u ash’or kutubxonasiga o‘xshab qolsa kerak. Shunga alohida sahifa ochib qo‘ya qoldim: «Vahmiyat» - @Vahm_olami. Tadarrus va tadrisdan bo‘sh vaqtlarim xayol surib qolsam, shunday she’rlar yozib @vahm_olami'ga joylab qo‘yaman. Xayolparastlar ulanib olishlari mumkin! )

Ko‘ngil tusi

O‘zing tanit, ey ko‘ngil -
ko‘ngli bo‘shga xavfmisan?
Asling nedir - bemisl
ko‘ngli g‘ashga afvmisan?

Ko‘ngil uchun ta’rifing
aytaqol hech bo‘lmasa!
Ko‘ngil ko‘changda yuz, ming...
buncha odam to‘lmasa!?

Surating ne - zino payt
ko‘ngli to‘qning tinchimi?
Hay’ating ne - nizo payt
ko‘ngli yo‘qning pinjimi?

Ko‘ngil qo‘ygan oshiqda
shakardek vafomisan?
Ko‘ngil uzgan ma’shuqda
zahardek jafomisan?

Nega yarim yo butun
joylashib go‘daklarga,
xira bo‘lganing uchun
kirmaysan malaklarga?

Hamma bilar noming ne -
ko‘ngil yozar tuyg‘umi?
Soqiydagi joming ne -
ko‘ngil buzar qayg‘umi?

Ko‘ngil so‘rgan yaqinning
ichidagi sirmi yo?
Ko‘ngli cho‘kkan miskinning
ko‘nglidagi murmi yo?

Sening turfa tusingdan
ko‘nglim rosti sovidi,
Biroq yaxshi yuzingdan
ko‘nglim tezda ovundi:

Sen - ko‘ngli tor havosi
havomizdan musaffo!
Sen - ko‘ngli bor Havvosi
Odamiga mubtalo!

✍️Shamsuddin Sadruddin (13.05.2025)

@Vahm_olami

Bugun hayit, najot kuni!

Bugun hayit, palov kuni,
Tabrik, salom, qutlov kuni,
Nisobi bor boyning emas
Bir otaning sinov kuni.

Bugun hayit, azho kuni,
Kulgu to‘la taqvo kuni,
Qurbonlikka hayvon emas
Bir o‘g‘ilning fido kuni.

Bugun hayit, ehson kuni,
Qo‘ni-qo‘shni, mehmon kuni,
Sinov kelgan bandalarga
Rahm aylar Rahmon kuni!

Bugun hayit, najot kuni,
Dunyomizning sirot kuni,
Jonin fido etganlarga
Mamot emas, hayot kuni!

Sinov va fido kuningiz muborak bo‘lsin!

✍️Shamsuddin Sadruddin (06.06.2025)

@Vahm_olami

Yoshligimda ko‘p qiziq narsalarni o‘ylardim. Ba’zilarini eslasam, hozir kulgim keladi. Masalan, bu olam faqat men imtihon qilinishim uchun yaratilgandi, nazdimda. Atrofimdagi barcha - odamlar, jonzotlar va narsalar soxta edi. Faqat men haqiqiy edim. Ko‘rgan va eshitganim voqe’a-hodisalar aslida bosh qahramoni men bo‘lgan «film»ning sahnlari edi, go‘yo. Onda-sonda bu xayoldan o‘zimni baxtli, mas’uliyatli va jasur his qilardim (😄).

Rostan qiziq-a!

Siz ham shunday xayol surganmisiz?

Shoirlar yolg‘onchiroq bo‘lishadi. She’r o‘qisalar, o‘xshatmalari yolg‘on ko‘rinadi. Lekin o‘zlari bilan gaplashsangiz, so‘zlari chinga o‘xshaydi.

Olimlar tuyg‘usizroq bo‘lishadi. Jiddiy suratlari tufayli odamlar ularda yengil tuyg‘ular yo‘q deb o‘ylaydi. Lekin barchaga ko‘rsatmaydigan hamma kabi his-tuyg‘ulari bo‘ladi.

Men kamtarroqman. Birov ko‘rib meni rosa kamtarin inson deb o‘ylaydi. Lekin aslida o‘zimni zimdan maqtayotgan bo‘laman. ;)

Siz nimaroqsiz?

Men yam-yashil maysalar ustida, suv bo‘yida, tog‘ qarshisida, keng va shinam xonalarda bir bet bo‘lsa ham kitob o‘qiy olmaganman. Uringanman, o‘xshamagan.

Tabiat qo‘ynida xayolga ko‘milish bo‘lakcha. Qahva bilan suhbat maroqli. «Komfort» deb atashadigan sharoitda film ko‘rish maza. Haqiqiy mutolaa uchun esa kichik va rangsiz xona munosib, menimcha.

Haligi rasmlar bor-ku: kitob va qahva; kitob va tabiat; arg‘imchoqda kitob o‘qiyotgan kimdir... - bular shunchaki telegram yoki instagram profilga surat qilib qo‘yish uchun ekan!

Odamlar arg‘imchoq kursida kitob o‘qimasdan, uxlashadi.

@Shamsuddin_Sadruddin

Fizikada g‘alati gap bor: biror jism yo‘qolgandek tuyulsa ham, u aslida yo‘qolmagan bo‘ladi.

Masalan, qog‘oz yonsa, u yo‘q bo‘lib ketgandek ko‘rinadi, ammo u issiqlik energiyasi, karbonat angidrid gaz, suv bug‘i yoki kul ko‘rinishida mavjudligini davom ettiradi. Demak narsalar yo‘qolmaydi, holatini o‘zgartiradi!

Inson ham kichik koinot. Barchamizning tub umumxislatlarimiz bor. Ular o‘zgarishi, shunga qarab biz ularni boshqa nom bilan atashamiz mumkin. Lekin o‘zi yo‘qolmaydi. Otasi bitta biz mavjudotlarda bundan boshqachachasini taxmin qilish ham qiyin.

Aytaylik, barchamizning qonimizda zulmga moyillik bor. U hech qachon hech birimizdan yo‘qolmagan. Shakli o‘zgargan. Nomi o‘zgargan. Ta‘siri o‘zgargan. Salbiyligi o‘zgargan. Ammo o‘zi bor. U «o‘zi bor» bo‘lgani uchun ham ba’zida shariat qoralagan surati - «zulm» degan nomda ko‘rinib turadi.

«Zulm» - uning mohiyatiga yaqinroq boshqa bir xislat ko‘rinishida hammamizda davom etyapti. Juda ayanchli tasavvur-a!

@Shamsuddin_Sadruddin

Aytishlaricha, koinotda ovozlar ham mutlaq yo‘qolmas emish.

Shu o‘rinda mavzudan tashqari tavsiyam: sizga yoqib qolgan gapni kim aytganini bilmasangiz, «aytishlaricha» deb keltirsangiz qulayroq ;)

Yomon xotimaning turi ko‘p. Ularning eng yomoni - hayotda maqsadi qolmasdan o‘lish. Maqsadsiz odam qabrdan tashqarida yurgan mayyitga o‘xshaydi.

Oxir zamonda tiriklar qabrdagilar o‘rnida bo‘lib qolishni istashi aytilgan. Va bu istak dindorlikdan emasl, balo sababli bo‘lishiga alohida urg‘u berilgan: وليس به الدين إلا البلاء.

Qiziq, o‘sha paytda hayot maqsad qo‘yishga ham yaramay qoladimi? Yoki odamlar maqsad topa olmaydigan darajada ojizga aylanadilarmi?

@Shamsuddin_Sadruddin