Bu shunday onki, kun boʻyi darslardan va hayot tashvishlaridan toliqqan ruhingga orom beradi, yuragingni yana goʻzal umidlarga toʻldirib, hayotning go‘zalligini yana bir bor his etishga undaydi. Ana shunday lahzalar uchun yashaging keladi ba’zan. Sen, U, kundaliging, xotirang, koʻzyoshlaring va Shopen yoki Motsart yoki Bethoven.

Alloh ustozni salomat qilsin!

Abu Dovud Sijistoniy rahimahullohdan: “Sizdan keyin kimlar bilan hamsuhbat boʻlaylik, birga oʻtiraylik?” deya soʻrashdi. U zot: “Kitoblar bilan” deb javob berdi.

Men kitoblarni yaxshi koʻraman. Ba’zan qalbimni mahzunlik, gʻam egallab olsa, hali oʻqilmagan bir dunyo kitoblarim borligini eslab, ovunaman, ularni tomosha qilaman, ba’zan suratga olaman, oʻqilgan kitoblarimni varoqlab belgilab qoʻygan joylarimni qayta oʻqiyman va soʻng yana qalbimda umid uchqunlaganini his qilaman.

Oʻzimni yolgʻiz qilganimda ham ular doim men bilan edi. Shuning uchun yolgʻizlikdan choʻchimayman. Axir mening kitoblarim bor. Kitoblari bor inson yolgʻiz emas.

Kun boʻyi tobim qochib, yotoqdan qoʻzgʻalolmay qoldim. Hozir esa oʻzimni sal yaxshi his qilganimdan darrov kelib qolgan kitobimni oldim. Endi esa biroz dunyodan, muammolardan, tashvishlardan uzoqlashamiz.

Xayrli mutolaalar! 🤍