Nima kitob oʻqiyapsiz deb soʻrashadi mendan. Sukut saqlayman. Hayot kitobini deb qoʻyaman ichimda. 💭

Inson miyasi yangilikka oʻch boʻladi. Hayotingizdagi yangiliklar, yangi hislar, yangi odamlar, yangi muhit kitob beradigan dofaminni qoplab ketadi ekan. Necha oydirki qoʻlimga tuzuk-quruq kitob ololmayman. Hozirda kitobdan emas, atrofimdagilardan oʻrganishim kerak boʻlgan narsalar koʻpligi uchundir deb oʻzimni ovutaman. 💡

Ijtimoiy tarmoqlar orqali tashqariga moʻralayman: hammada hayot qaynamoqda. Kimdir nimadirga erishgan, kimdirga qayerlargadir sayohatda, kimdirlar nimalarnidir harakatida. Oʻzim bilan taqqoslayman: menchi? Men kuniga million marta oʻzim bilan oʻzim olishaman, nafsim, vijdonim qarshisida hisob beraman, hisobga tutaman, yangi oilani oʻrganaman, ularning koʻngliga qarayman, xizmatini qilaman (qoʻldan kelgancha), ba’zida oqsayman, ba’zida maqtovdan osmonga uchaman, ming marta oʻzgaradigan kayfiyatim bilan kurashaman, ba’zan oʻzimdan qoniqmay yigʻlayman, ba’zida oynaga jim qarab oʻzimdan faxrlanaman, Alloh bergan taqdirdan mamnun boʻlaman.💖

Hayotingda shunday palla boʻladiki, sen jim oʻsasan. Sukut saqlab koʻp narsaga javob olasan, berasan.📝

Xullas, mendan nima bilan mashgʻulsiz desangiz, hayotga endi boshqa darchadan boqyapman, oʻrganyapman. ✨