أشياء بسيطة

بتعرفوا شو ؟

اليوم لأول مرة بحياتي بتأمل الأذان ، لأول مرة حرفيًا بعيش معه بكل مشاعري وقلبي وكل تركيزي التام ، لأول مرة بشعر بمعانيه وهَيبته ورونقه الخاص، ما ضل شي بجسمي إلا تحرّك .. طيب أنا كل يوم بسمع الأذان! وأكتر من مرة !!

فتحت اليوتيوب وبلّشت أسمع أكتر من أذان لأكتر من شيخ من بلدان مختلفة ومقامات متنوعة وطُرق متعددة ! لكن الشّعور ضل نفسه ويمكن زاد! هيبة ضمّتني بكل معنى الكلمة، متل يلي رحل لحظات من عالمه، سافر لأبعاد المعنى والكلمة والفهم.

يلّي خلاني صافن لحظات طويلة فكرة ليش اليوم بس انتبهت لعَظَمة الأذان مع إنه فعلًا في كتير مواقف كان الأذان يخلّيني أدمع أو أعيش معه بس مش متل اليوم! اليوم شي روحاني ربّاني، رحلة سماوية مختلفة

بتعرفوا ؟
بخاف أحيانًا يكون هاد نوع من حرمان، نوع من وضعنا بإطار مخيف إسمه الاعتياد، والاعتياد بقتُل المعنى وبحرم الروح من لذّتها، وبصنع فجوة بينك وبين الأثر من كل عمل، نحنا قادرين نخرج بألف معنى من كل عبادة وعمل وتطوع ونافلة وسنّة ، قادرين نربط من المعنى الواحد مئة معنى مختلف، قادرين نعيش مع كل حركة وسكون عشرات المشاعر! بس يا إمّا نحنا ضربنا الكسل وأسَرنا الاعتياد ، يا إنّه حرمان!

تأمّل (الوضوء) بتعرف إنه بكل حركة هي عملية تهذيب وتدريب ومحاسبة ذات ،
(الصّلاة) هي إعادة ضبط وربط وإتّزان، القِبلة ضبط البوصلة، والقيام اتّكاء، والوقوف احتضان، والركوع استقامة، والسجود احتواء، والتّسليم بداية اختبار الأثر.

أذكار صباحك، بتصنع جزء من يومك إن غرقت شوي بالمعنى، وأذكار المساء بتشيل عن ظهرك ثقل يومك لمّا ترددها بانتباه، قراءة المُلك بتعطيك سكينة قبل النوم، وصلاة الفجر هدية صِدق الطّلب! كل مكان إله ذِكر ، وكل مكان قادر تجدد رابط المحبّة مع ربّك، حتّى دخول الخلاء في استعاذة والتجاء، إنت فاهم كميّة الأذكار يلي بتساهم ببناء ذاتك إن أعطيتها انتباه!

لا تظلم الفاتحة لإنها عادة، ولا الرَّد بالحمد لإنه متعارف عليه ، ولا الصّلاة على النّبي دون استشعار شيء من هيبته ، ولا تقرأ وِردَك وقلبك منشغل، ولا تصلّي بالجسد وروحك بمكان بعيد! كتير منّا بحاجة بناء ألف شيء انهدم فيه من هالدنيا القاسية،كل حدا فينا بمتلك ما يكفيه من ثقوب وكتمان

ركّز معي أرجوك ..

خلينا نطبّق هالشي مع بعض ،أعطي لكل عمل من يومك زيادة دقائق ، يعني لو عندك 10 مهمات باليوم أعطي لكل مهمة زيادة 5 دقائق هي( 50) دقيقة ، اعتبرها ساعة
زيادة ساعة كل يوم موزّعة على عدة اعمال رح تخليك تشعر بفارق الانتباه وفارق الجودة وفارق الإنجاز ، ومع الزّمن رح تلاحظ إنّك أفضل .

باليوم ساعة ، بالشهر 30 ، بالسنة 360 ساعة ، بما يُعادل 15 يوم

الانتباه .. التركيز التام .. محاولة إيجاد المعنى .. اضافة قليل من الوقت لكثير من الإنجاز على المدى الطويل.. هو فارق عظيم .. عظييييم !
الله يرضيكم

• كُتِب سنة 2018، الحمد لله

❤19👍12👏1

8.35K viewsLoz 💙💭, 19:11