“Poytaxtning SMMchi qizlari” mavzusidagi mahorat darsi bo‘lib o‘tdi

“Toshkent yoshlarni sevadi” oyligi doirasida 1 000 nafar qizlar 24 modulli SMM kursida bepul o‘qitilmoqda. Mazkur mahorat darslari Toshkent shahar hokimligi va Yoshlar ishlar agentligining Toshkent shahar boshqarmasi tashabbusi bilan tashkil etildi.

Bugun poytaxtimizda joylashgan “Zakovat arena”da SMM kurslari tinglovchi qizlari bilan ochiq davra suhbati o‘tkazildi. Unda kurs tinglovchilariga jamiyatda turli yo‘nalishlarda faol xizmat olib borayotgan spikerlar, xususan, Toshkent shahar hokimining o‘rinbosari Durdona Rahimova, Raqamli texnologiyalar vazirining maslahatchisi Kamola Sobirova, jamoatchilik faoli, bloger Aqidaxonim Mohirova, jurnalist-bloger Mahliyo To‘raboyeva va boshqalar SMM sohasidagi ko‘nikma va tajribalari bilan o‘rtoqlashdi.

Suhbat mobaynida tinglovchilar o‘zlarini qiziqtirgan savollariga bevosita spikerlardan javob oldi va yana ko‘plab qizlar SMM kurslarida o‘qishga qiziqish bildirdi.

Ma’lumot uchun, o‘quv kursi mobaynida tinglovchilarga internet va ijtimoiy tarmoqlarda o‘z sahifalarini yaratib, bir oyda o‘rtacha 3 mln so‘mgacha daromad olishlari mumkin bo‘lgan bir qator yo‘nalishlar bo‘yicha ta’lim beriladi.

🔍 Bizni ijtimoiy tarmoqlarda kuzatib boring:
✈️ Telegram | 📷 Instagram |💬Facebook | 📺 You Tube