Енді eGov және басқа да мемлекеттік сервиске кіру үшін SMS-код жеткіліксіз

Face ID, ЭЦҚ немесе eGov QR қажет болады. Жасанды интеллект министрлігі бұл өзгерісті Бас прокуратурамен бірлесіп, алаяқтықтың көбейгеніне байланысты енгізіп отыр.

1414 SMS пайдаланатын жүйелер биометриялық немесе басқа қауіпсіз аутентификация түріне көшпесе, желтоқсаннан бастап қызметтен ажыратылады. Face ID технологиясы бұрын вакцинация кезінде жалған ақпараттың алдын алу үшін қолданылған еді.

11 желтоқсанда Қазақстанда ауа райы құбылмалы болады

11 желтоқсанда солтүстік антициклонның ықпалы әлсіреп, Қазақстан аумағына Атлантикалық циклон жылжи бастайды. Соның әсерінен ауа райы құбылмалы болады: жаңбыр мен қар түрінде жауын-шашын түсіп, көктайғақ байқалады. Солтүстік, орталық және шығыс өңірлерде қар жауып, боран соғуы мүмкін. Республика бойынша жел күшейіп, түнгі және таңғы сағаттарда тұман сақталады.

Ауа температурасы да өзгереді: солтүстік, орталық және шығыс аймақтарда түнде ауа температурасы 5–15 градус аязға дейін жоғарылап, күндіз 0–5 градус аяз болады. Ал батыс, оңтүстік және оңтүстік-шығыс өңірлерде түнде 0–5 градус аяз, күндіз 0–8 градус жылы күтіледі.

https://t.me/sn_kz

Жетісу облысында жол-көлік оқиғасынан 4 адам қаза тапты

10 желтоқсанда Алматы–Өскемен тас жолының 462-шақырымында қайғылы оқиға болды. Алдын ала мәліметтер бойынша, боран мен көктайғақ жағдайында KIA көлігінің жүргізушісі қарсы бағытқа шығып, Toyota автокөлігімен соқтығысқан.

Полицияның хабарлауынша, жол-көлік оқиғасы салдарынан төрт адам оқиға орнында көз жұмған. Тағы төрт жолаушы әртүрлі жарақаттармен медициналық мекемеге жеткізілді.

Аталған факті бойынша қылмыстық іс қозғалды.

https://t.me/sn_kz

Өскеменде Beeline байланысына қатысты халық наразылығы күшейді

Өскемендегі Beeline сервис-орталықтарында соңғы күндері ұзын-сонар кезек пен ашулы тұрғындардың шағымдары көбейді. Әлеуметтік желіде тараған видеоларда тұрғындар интернеттің баяулығына, қоңыраудың дұрыс қосылмауына және қосымша сервистердің істен шығуына наразы екені анық байқалады.

Көпшілік «байланыс мүлде нашарлады» деп қатты шағымдануда. Пікірлерде Beeline-ды «ең нашар байланыс» деп сынап, тіпті басқа операторға ауысу керек дегендер көп.

Тұрғындардың айтуынша, ай сайынғы төлем жоғары болғанымен, қызмет сапасы нашарлаған. Janymda қосымшасы істемей, тарифті жаңарту мүмкін болмай отыр, ал call-орталықтан да нәтиже жоқ.

Қала тұрғындары компаниядан жедел түсініктеме мен нақты шара күтуде.

https://t.me/sn_kz

Пойыздағы төтенше жағдай: Алматыда 10 баланы қоса алғанда 52 адам уланды

Алматыда пойыз ішінде орын алған оқыс жағдайдан 52 адам, оның ішінде 10 бала газға уланып қалды. Қалалық қоғамдық денсаулық сақтау басқармасының хабарлауынша, оқиға орнына дереу 13 жедел жәрдем бригадасы жіберілген.

Медициналық тексерістен соң балалардың 10-ы ауруханаға жатқызылды. Олардың екеуі жансақтау бөлімінде, қалғандары профильдік бөлімшелерде ем қабылдап жатыр.

Басқа зардап шеккендерге алғашқы медициналық көмек көрсетіліп, амбулаториялық ем қабылдау үшін үйлеріне жіберілді. Дәрігерлер ауруханадағы науқастардың жағдайын қатаң бақылауда ұстап отыр.

https://t.me/sn_kz

Тоқаев Иран инвесторларын Қазақстанда жаңа өндірістер құруға шақырды

Тоқаев пен Пезешкиан Қазақстан-Иран бизнес форумына қатысып, экономикалық серіктестікті тереңдету бағыттарын талқылады. Форум барысында бірнеше маңызды жайт атап өтілді:
• Қазақстанда бүгінде Иранның 350-ден астам компаниясы табысты жұмыс істеп келеді.
• Қытай мен Еуропа арасындағы жүктердің 85%-ы Қазақстан аумағы арқылы өтеді, бұл еліміздің транзиттік әлеуетін көрсетеді.
• Каспий теңізінің болашағы мен қауіпсіздігі екі ел үшін де стратегиялық маңызға ие.
• Иран – Қазақстанның астық экспорты бойынша негізгі серіктестерінің бірі.

Қос тарап өндіріс, логистика және ауыл шаруашылығы салаларында жаңа бірлескен жобаларды бастауға дайын екендерін білдірді.

https://t.me/sn_kz

12 желтоқсан: еліміздегі ауа райының жалпы көрінісі

12 желтоқсанда Қазақстанның көп бөлігінде солтүстік-батыс циклонының әсерінен ауа райы құбылмалы болады: қар, кей жерлерде жаңбыр, тұман, көктайғақ және желдің күшеюі күтіледі. Солтүстік, шығыс және таулы аймақтарда боран болуы мүмкін. Батыс пен оңтүстіктің жекелеген өңірлерінде жауын-шашын аралас түсуі ықтимал. Ал шығыс пен оңтүстік-шығыста антициклонның әсерінен күн ашық, бірақ аяз күшейеді. Оңтүстікте ауа райы салыстырмалы түрде жұмсақ, ал солтүстік және шығыс өңірлерде қатты суық сақталады.

https://t.me/sn_kz

Қазақстанда зейнетақы жинақтарын пайдалануға қатысты жаңа шектеу енгізілді

Енді бұл қаражатты реконструктивті және қалпына келтіру бағытындағы (пластикалық) операцияларға жұмсауға тыйым салынды.

Мұндай шешім стоматология мен офтальмология қызметтеріне қаражат алу тоқтатылғаннан кейін өтініштердің күрт артуына байланысты қабылданды. «Отбасы банкінің» мәліметінше, бұрын бұл мақсатта айына орта есеппен 16 өтініш қаралса, қыркүйекте олардың саны 123-ке, қазанда 1 844-ке, ал қарашада 3 878-ге дейін көбейген.

https://t.me/sn_kz

Алматыда нәресте саудасымен айналысқан қылмыстық топ ұсталды

Ішкі істер министрлігі адам саудасына байланысты бірқатар ауыр қылмыстарды әшкереледі. Тергеу барысында барлығы 39 заңбұзушылық анықталып, оның алтауы кәмелетке толмағандарға қатысты болғаны белгілі болды.

Алматы қаласында жаңа туған сәбилерді заңсыз сату ісімен айналысқан қылмыстық топ ұсталды. Олар әлеуметтік жағдайы қиын жас аналарды қаржылай сыйақы ұсынып, баласын бөгде адамдарға беруге мәжбүрлеген.

Сондай-ақ Ақмола облысында еркін жыныстық қатынасты насихаттаған діни сипаттағы топтың әрекеті әшкереленді. Тінту жұмыстары кезінде діни әдебиеттер, түрлі атрибуттар мен ритуалдық заттар тәркіленді.

https://t.me/sn_kz

Қазақстан «Бейбітшілік қозғалысы» бастамасын ұсынды: Тоқаев не айтты?

Мемлекет басшысы Қасым-Жомарт Тоқаев Ашхабадта өткен форумда сөйлеп, бірқатар маңызды ұстанымдарды атап өтті. Қазақстан Палестинаның егемен мемлекет ретінде құрылуын қолдайтынын, Ауғанстанға гуманитарлық көмекті тоқтатпау қажет екенін жеткізді.

Сондай-ақ ШЫҰ-ның Еуразиядағы қауіпсіздік пен сенімді нығайтудағы рөліне тоқталып, Ресейдің Аралды құтқару қоры жұмысына байқаушы ретінде қатысуы маңызды екенін айтты. Президент Қазақстанның Ибраһим келісімдеріне қосылуы аймақтағы тұрақтылықты арттыруға бағытталған қадам екенін де атап өтті.

https://t.me/sn_kz

Астана тұрғыны ер адамды мұз астынан құтқарып қалды

Астанадағы Есіл өзенінде мұз астына түсіп кеткен адамды қала тұрғыны Азамат Айткен құтқарып қалды.

10 желтоқсанда Марал көпірі маңында серуендеп жүрген ол көмек сұраған дауысты естіп, суға батып бара жатқан 62 жастағы ер адамды дереу шығарып алған.

Ерлігі үшін Азамат алғыс хатпен марапатталды.

https://t.me/sn_kz

Астанада екі жаңа көпір салынады: әкім кептелісті азайтудың жолдарын айтты

Астана қаласының әкімі Жеңіс Қасымбек жолдағы кептеліс көбіне Есіл мен Нұра аудандарында, әсіресе көпірлерге бағытталған учаскелерде байқалатынын айтты. Осы мәселені шешу үшін қалада екі жаңа көпір салу жоспарланып отыр.

Әкімнің сөзінше, кептелісті азайту мақсатында әкімдік пен мемлекеттік мекеме қызметкерлерінің жұмыс уақыты 7:30–8:00 аралығына ауыстырылған. Бұл шешім өз нәтижесін берген.

Сонымен қатар, жақын уақытта LRT желісінің іске қосылуы да қала көшелеріндегі көлік қозғалысын жеңілдетуге ықпал етеді.

https://t.me/sn_kz