مثل الابنها يموت وچماله مله
مابطل نوحي اعليك ليل الله كله

يحيي العظم ياريت ويكلك اگعد
ويودي ملج الموت ياخذني وترد

مُساجله بين اياد عبدالله وابراهيم الكوفي

ابراهيم ايكول:

العُمر خلص ليل وجه الصبح وين؟
الذله ثلث اوكات عشناها يحسين،

اياد يرد عليه :
وجه الصبح موجود بس احنا عميان؟
شابعَنا ضيم فلان وانكله ابو فلان،

لهفه.. الك .بالدلال.. كلش. چبيره
لهفة المجلي اسنين عن العشيره

ابتسِم حد اصواب بس چبدي معيوب
موگد فحَم بحشاي واسنوني. حالوب

شبّهتك( بتبليط) واستنكف. الجير
گال بصفَر كل عام وجهي ابيض يصير

گلوله. هسه .ابخير. والمحنه عدت
والعفته وكت الضيج عافيته ردت

يتصابح ويـه الضيم گـلبي ويماسيه.
بس على شوف هواي يتمريح ادريه.
.
.

ياگـلـبـي رد وياي حلوه الكرامه
الوجع ساعه ودوم تبقه الندامه

رفجت دغش وياي وأنه اعله نيتي
ماگدرو.. يضموه... غالبني.. صيتي

زفوهه سکته ابليل وچماله عجه
والحادي نص اردان والناگه عرجه

ارد امشي للعباس وبـجي بضريحـه
ليش انه ولفي ايدير عينه منصيحه
ابو غزاله الاسدي

خذ ولفك من اتزور وبجي البچي هناك
لـو مـنهـه وتخـربـون لـو يـرجــع ويـاك
اياد عبد الله الاسدي،

كنجم سهيل ردتك عليه تسهيل
بوصالك مو لهو للغير تسهل
ردت منك رسالة الفجر تسهيل
امر وتزيح ضيجة خلگ بيه

يگول عدنان البدران
،،،،،،،،،،،،،،،،،،،،،،،
آني ادري مزنة صيف وتعدي وتروح
بس بللتني اگبال چم دوني مفضوح

ويجاريه ابو امير العنبكي
،،،،،،،،،،،،،،،،،،،،،،،
حسبالي يجلي الغيم وتصحّي دنياي
واعصر هدوم العوز شبعن شبع ماي

شحجيلك عله العوز دنيه وكضت دين
دشداشه عد خياط صارلها سنتين

الخذك مامشلوع گلبه ويتانيك
حصت ورث ونطوك للماتعب بيك

موش اعل روحي انخاك عدي ابده منهاا
ربي اطي لمي الحيل واحذه من ابنهاا

مساجله مؤثره جدا ...

ألشاعر ألكبير حبيب قاسم ألكعبي (أبو احمد) كتب دارمي سنة (1984) يگول :

أضغب وأهوبز بيد وأمسح دمع بيد
مثل ألطفل لو ضــاع ديناره بالعيد

حبيب قاسم أستقبل ألرّد سنة (2004) بدارمي من شاعر شاب أسمه حسن ألسهيلاوي يگول :

باجر يبو أحمد عيد وألخبر شايع
طفلك لگة ألدينار لو بعده ضايع

فاجابه حبيب قاسم بعد مرور سنة وگاله :

مو مشكلة ألدينار هم يلگي بساع
صارن ألف دينار بس ألطفل ضـاع

وفي سنة (2017) كان ألرّد من حيدر الديواني
يگول :

أبشر يبو أحمد گوم طفلك لگيناه
صاير چبـير وجــاااب ديناره وياه

سيــرت اشــوفه وگــام عــني وتــبره
فيـضت بيــته وگـال گوم ابـچي بـره

بشار الاسمر

فـــــز فزت الــــملدوغ گلبي ويناغيك
ادموعي حيل اعزاز بس طـاحن عليك

محمد رومي