BMC STENOGRAPHER कागदपत्र वेळापत्रक...

आज मंत्रालयात गेलेल्या मुलींच्या टीमची प्रतिक्रिया

आज आमची विद्यार्थ्यांची टीम मंत्रालयात संबंधित अधिकाऱ्यांना भेटण्यासाठी गेली होती. सर्वप्रथम आम्हाला जोशी मॅडम यांना भेटण्यास सांगण्यात आले. त्यांच्यासमोर आम्ही आमची संपूर्ण बाजू मांडली. आम्ही कोण आहोत, अनेक वर्षे स्टेनोग्राफीचे शिक्षण घेतले आहे, त्यासाठी केलेला संघर्ष आणि आमची सध्याची परिस्थिती याबाबत सविस्तर माहिती दिली.

आम्ही ६–७ वर्षे स्टेनोग्राफीचे शिक्षण घेतल्याचे सांगितल्यावर त्यांनी असे मत व्यक्त केले की, स्टेनोग्राफी शिकण्यासाठी इतकी वर्षे लागत नाहीत. हा एक साईड कोर्स असून, तो पदवी शिक्षणासोबत (Graduation) करता आला असता. त्यावर आम्ही पूर्णवेळ (Full Time) हा कोर्स केल्याचे सांगितले. त्यावर त्यांनी, "ती तुमची चूक आहे. हा पार्ट-टाईम करण्यासारखा कोर्स आहे," असे स्पष्ट सांगितले.

तसेच त्यांनी सांगितले की, "आम्ही ३०–४० संस्था चालकांशी चर्चा केली असून त्यांनीही हा साईड कोर्स असल्याचे सांगितले आहे. त्यामुळे यासोबत इतर शिक्षण किंवा कौशल्य आत्मसात करायला हवे होते."

पुढे त्यांनी सांगितले की, राज्य शासनाकडून सुमारे ४० हजार नवीन पदांची भरती केली जाणार आहे. त्यामुळे त्या भरतीचा अभ्यास करण्याचा सल्ला त्यांनी दिला. "आमच्याकडे आमदार, खासदार यांचीही निवेदने येतात. मात्र हा निर्णय केवळ व्ही. राधा मॅडम यांचा नसून विविध विभागांनी एकत्रितपणे घेतलेला आहे. त्यामुळे या स्किलची आता गरज उरलेली नाही," असेही त्यांनी स्पष्ट केले.

आम्ही किमान एक संधी द्यावी, अशी विनंती केली असता त्यांनी सांगितले, "एक संधी म्हणजे सरकारी कर्मचारी साधारण ३० वर्षे सेवेत असतो. जर त्या पदावर प्रत्यक्षात कामच नसेल, तर सरकारने ३० वर्षे त्याचा खर्च का करावा? ज्या कौशल्यांची गरज आहे, त्याचाच अभ्यास करा."

यानंतर आम्ही व्ही. राधा मॅडम यांची भेट घेतली. त्यांनीही जवळपास हाच मुद्दा मांडला. त्यांनी उदाहरण देत सांगितले की, "पूर्वी मेणबत्ती होती, आता लाईट आली आहे. तंत्रज्ञान बदलले आहे. मी स्वतः ३० वर्षांच्या सेवेत एकही दिवस डिक्टेशन दिलेले नाही किंवा घेतलेले नाही. आता मोबाईलवर रेकॉर्डिंगची सुविधा उपलब्ध आहे. त्यामुळे पारंपरिक स्टेनोग्राफीची गरज पूर्वीइतकी राहिलेली नाही."

तसेच त्यांनी स्पष्ट केले की, "आम्ही सर्वच विभागांमधील पदे बंद केलेली नाहीत. ज्या विभागांमध्ये स्टेनोग्राफरची प्रत्यक्ष गरज आहे, तेथे पदसंख्या वाढवली आहे. उदाहरणार्थ, न्यायालयांमध्ये (Court) स्टेनोग्राफरची आवश्यकता असल्यामुळे पूर्वीपेक्षा अधिक जागा उपलब्ध करून दिल्या आहेत."

शेवटी त्यांनी सांगितले की, "पदाचे नाव किंवा भरतीचा पॅटर्न बदलू शकतो. भरती होईल, पण स्टेनोग्राफी स्किल टेस्ट घेतली जाणार नाही, कारण सध्याच्या परिस्थितीत त्या कौशल्याची आवश्यकता राहिलेली नाही."

धन्यवाद 🤝🤝🤝