ថ្ងៃទី១ ខែវិច្ឆិកា ឆ្នាំ២០២៦ ឯកឧត្តម ឌី វិជ្ជា និងលោកជំទាវ ហ៊ុន ម៉ាណា បានអញ្ជើញប្រគល់អំណោយផ្ទះទេវតា១ខ្នងជូនលោកយាយ ហង់ ថៃ អាយុ៧៨ឆ្នាំ រស់នៅភូមិដូនម៉ៅ ឃុំចោងម៉ោង ស្រុកទឹកផុស។ លោកយាយជាស្រ្តីមេម៉ាយ រស់នៅជាមួយកូនស្រីម្នាក់មានអាយុ៤៦ឆ្នាំ ដែលជាស្ត្រីមេម៉ាយដែរ ដោយមានកូនក្នុងបន្ទុកគ្រួសារចំនួន៤នាក់ មានជីវភាពលំបាក។

ឯកឧត្តម និងលោកជំទាវ បាននាំនូវប្រសាសន៍ផ្តាំផ្ញើសាកសួរសុខទុក្ខពីសំណាក់សម្តេចតេជោ និងសម្តេចកិត្តិព្រឹទ្ធបណ្ឌិត, សម្តេចធិបតី និងលោកជំទាវបណ្ឌិត ចំពោះលោកយាយលោកតា ដែលទទួលអំណោយផ្ទះនាពេលនេះ ដែលជានិច្ចកាលលោកទាំង៤ តែងតែគិតគូរពីសុខទុក្ខប្រជាពលរដ្ឋគ្រប់ទីកន្លែង និងគ្រប់ពេលវេលា។ បន្ថែមលើអំណោយផ្ទះ ឯកឧត្តម និងលោកជំទាវ ក៏បានផ្តល់នូវប្រព័ន្ធភ្លើងសូឡានៅមុខផ្ទះ និងក្នុងផ្ទះ និងអណ្ដូងទឹកស្អាតនៅមុខផ្ទះផងដែរ។ ឯកឧត្តម និងលោកជំទាវក៏បាននាំយកនូវអំណោយសម្តេចតេជោ និងសម្តេចកិត្តិព្រឹទ្ធបណ្ឌិត ព្រមទាំងឃីតមានជាសម្ភារៈប្រើប្រាស់ សំលៀកបំពាក់ និងថវិកា ចែកជូនលោកយាយ លោកតាដែលបានចូលរួមនាឱកាសនោះ,ព្រមទាំងនាំយកនូវកាតាបដែលមានសម្ភារៈសិក្សាជាច្រើនមុខ និងសំលៀកបំពាក់ចែកដល់សិស្សានុសិស្សនៅភូមិនេះចំនួន១២១កាតាបផងដែរ។