ព្រឹកនេះ ខ្ញុំ និងអភិបាលស្រុក ចុះពិនិត្យមណ្ឌលប្រឡងសញ្ញាបត្រមធ្យមសិក្សាទុតិយភូមិ នៅសាលាបឋមសិក្សាគីរីសុវណ្ណវង្ស និងអនុវិទ្យាល័យគីរីសុវណ្ណវង្ស ក្នុងឃុំស្រែថ្មី ស្រុករលាប្អៀរ ព្រមទាំងពិនិត្យលើសោភ័ណភាព អនាម័យទីធ្លា សុវត្ថិភាពចំណីអាហារ បណ្ណាល័យ សួនបន្លែ សួនច្បារ ស្រះត្រី តារាងបាល់ និងសួនច្បារមុខសាលារៀន ពិសេសបន្ទប់ទឹកត្រូវតែស្អាតជានិច្ច។

សូមកោតសរសើរលោកនាយកសាលាបឋមសិក្សាគីរីសុវណ្ណវង្ស លោកនាយកអនុវិទ្យាល័យគីរីសុវណ្ណវង្ស ដែលតែងខិតខំកៀរគរធនធានយកមកអភិវឌ្ឍហេដ្ឋារចនាសម្ព័ន្ធសាលារៀន យកចិត្តទុកដាក់លើកកម្ពស់គុណភាពអប់រំ ពង្រឹងវិន័យ អប់រំសីលធម៌ សុជីវធម៌ បំណិនជីវិតដល់សិស្សានុសិស្ស បានល្អជាប់ជាប្រចាំ។

(៦ សីហា ២០២៦)

ចូលរួមកិច្ចប្រជុំវិសាមញ្ញលើកទី៨ អាណត្តិទី៤ របស់ក្រុមប្រឹក្សាខេត្តកំពង់ឆ្នាំង ក្រោមអធិបតីភាពឯកឧត្តម សុីវ រុន ប្រធានក្រុមប្រឹក្សាខេត្ត ដើម្បីពិនិត្យ និងអនុម័តការងារសំខាន់ៗមួយចំនួន។

(៧ សីហា ២០២៦)

ខ្ញុំបានចូលរួមជាមួយឯកឧត្ដម ប៊ូ ជុំសេរី អនុរដ្ឋលេខាធិការក្រសួងអប់រំ យុវជន និងកីឡា និងជាប្រធានគណៈមេប្រយោគទូទាំងប្រទេសប្រចាំខេត្តកំពង់ឆ្នាំង និងឯកឧត្ដម អ៊ូ វិសាល ប្រធានដឹកនាំការងារសង្កេតការណ៍ អង្គភាពប្រឆាំងអំពើពុករលួយប្រចាំខេត្តកំពង់ឆ្នាំង ដឹកនាំកិច្ចប្រជុំពិភាក្សាត្រៀមរៀបចំដំណើរការប្រឡង​សញ្ញាបត្រមធ្យមសិក្សាទុតិយភូមិ សម័យប្រឡង ១០ សីហា ២០២៦។

ខេត្តកំពង់ឆ្នាំង មានបេក្ខជនប្រឡងសរុបចំនួន ៥ ០៥៣នាក់ ស្រី ២ ៩៧០នាក់ ចែកចេញជា ៨ មណ្ឌលប្រឡង ស្មើនឹង ២០៣បន្ទប់។

ថ្ងៃទី៧ សីហា ២០២៦