Surxondaryo viloyati hokimi Ulug‘bek Qosimov raisligida O‘zbekiston Respublikasi Prezidentining 2026-yil 23-sentabrdagi PF-206-son Farmoni ijrosiga bag‘ishlangan videoselektor yig‘ilishi o‘tkazildi. Unda tuman va shahar hokimlari, tegishli tashkilotlar rahbarlari hamda mas’ul mutaxassislar ishtirok etdi.

Yig‘ilishda kuzgi ko‘chat ekish mavsumiga tayyorgarlik, hududlarni ko‘kalamzorlashtirish, ekologik barqarorlikni ta’minlash va obodonlashtirish ishlarini samarali tashkil etish masalalari ko‘rib chiqildi.

Viloyat Ekologiya va iqlim o‘zgarishi bosh boshqarmasi boshlig‘i Bahodir Urunov “Yashil makon” umummilliy loyihasi doirasida amalga oshirilayotgan ishlar hamda belgilangan rejalar yuzasidan axborot berdi.

Ma’lumotlarga ko‘ra, viloyatda kuzgi mavsum davomida 11 million 187 ming tup ko‘chat ekish rejalashtirilgan. Shuningdek, 723 ta mahallada ko‘kalamzorlashtirish ishlarini tashkil etish, 30 ta mikroo‘rmon, 30 ta soyali sayr ko‘chasi va 30 ta jamoatchilik bog‘ini barpo etish ko‘zda tutilgan.

Bundan tashqari, 30 ta kompostlash va mulchalash maydonchasini tashkil etish, 90 ta shox-shabba maydalash uskunasini xarid qilish, “Yashil lot” hamda “Mahallani yashillashtirish” tashabbuslarini amalga oshirish, ekologik banner va elektron tablolardan 75 ta o‘rnatish bo‘yicha indikatorlar belgilangan.

Yig‘ilishda mazkur ko‘rsatkichlar ijrosini ta’minlash, har bir mahallada tegishli ishlarni tizimli tashkil etish, ko‘chatlarni sifatli ekish va parvarishlash, yangi yashil hududlarni barpo etish masalalariga alohida e’tibor qaratildi. Hududlarda “3–30–300” tamoyilini joriy etish, aholi uchun qulay va ekologik sog‘lom muhit yaratish vazifalari ham muhokama qilindi.

Shuningdek, “Toza hudud” davlat muassasasi tomonidan xarid qilingan daraxt shox-shabbalarini maydalash uskunasi viloyat hokimi va mutasaddi tashkilotlarga amaliy tarzda namoyish etildi. Uskuna organik chiqindilar hajmini kamaytirish, ularni tashish va qayta ishlash jarayonlarini yengillashtirishga xizmat qiladi. Kelgusida muassasaning 7 ta tuman filialini ham shunday texnikalar bilan ta’minlash rejalashtirilgan.

Yig‘ilish yakunida tuman va shahar hokimlari hamda mas’ullarga belgilangan indikatorlar ijrosini o‘z vaqtida ta’minlash, mahallalarda ko‘kalamzorlashtirish va obodonlashtirish ishlarini jadallashtirish yuzasidan tegishli topshiriqlar berildi.

Asosiy maqsad — Surxondaryoda yashil hududlarni kengaytirish, ekologik barqarorlikni mustahkamlash va aholi uchun yanada toza hamda obod muhit yaratish.

Surxondaryo viloyati Ekologiya va iqlim o'zgarishi bosh boshqarmasi matbuot xizmati

Kanalga ulanish: https://t.me/surxoneko