Пресс-тур давомида иштирокчиларга шаҳарда атроф-муҳитни муҳофаза қилиш, атмосфера ҳавоси ва сув ресурсларидан оқилона фойдаланиш, экологик барқарорликни таъминлаш борасида амалга оширилаётган ишлар ҳақида маълумот берилди.

Тадбирда ҳаво ифлосланишининг асосий омилларини камайтириш, чиқиндиларни белгиланган тартибда бошқариш, яшил ҳудудларни кенгайтириш ҳамда экологик талабларга риоя этилишини таъминлаш масалаларига алоҳида эътибор қаратилди. Шунингдек, корхона ва ташкилотларда экологик меъёрларга амал қилиш, атмосфера ҳавосига чиқарилаётган зарарли моддалар миқдорини назорат қилиш бўйича олиб борилаётган ишлар ҳақида сўз юритилди.

Сув ресурсларини муҳофаза қилиш йўналишида эса сув ҳавзалари ва оқова тизимларига турли чиқиндилар тушишининг олдини олиш, сувдан самарали ва тежамкор фойдаланиш, санитария-экологик талабларни таъминлаш муҳим вазифалардан экани таъкидланди.

Пресс-тур давомида журналист ва блогерлар экологик ҳолатни яхшилашга қаратилган амалий ишлар билан яқиндан танишиб, мутахассисларга ўзларини қизиқтирган саволлар билан мурожаат қилдилар.

Пресс-тур давомида Давлатобод маҳалласида аҳоли учун яратилаётган шароитлар, ҳудудни ободонлаштириш, кўп қаватли уй-жойлар инфратузилмасини яхшилаш ҳамда аҳолининг кундалик муаммоларини манзилли ҳал этиш борасида амалга оширилаётган ишлар билан яқиндан танишилди.

Бугунги кунда Давлатобод маҳалласида 4 240 нафар аҳоли, 1 320 та хонадон ва 1 360 та оила истиқомат қилади. Маҳалла ҳудудида жами 46 та кўп қаватли уй мавжуд бўлиб, уларнинг техник ва ташқи ҳолатини яхшилаш, аҳоли учун қулай яшаш муҳитини яратишга алоҳида эътибор қаратилмоқда.

Хусусан, 2026-йил давомида 7 та икки қаватли ҳамда 3 та тўрт қаватли уйда таъмирлаш ишлари амалга оширилди. Шунингдек, яна 1 та тўрт қаватли уйнинг том қисми тўлиқ алмаштирилди. Мазкур ишлар кўп қаватли уйларда яшовчи фуқароларнинг мурожаат ва эҳтиёжларини ўрганиш асосида босқичма-босқич амалга оширилмоқда.

Маҳаллада болалар ва ёшларнинг бўш вақтини мазмунли ташкил этиш, спорт билан шуғулланиши учун шароитларни яхшилашга ҳам эътибор қаратилмоқда. Шу мақсадда 2 та болалар майдончаси таъмирланиб, фойдаланишга топширилди. Шунингдек, 1 та спорт майдончаси янгидан қурилиб, аҳоли ихтиёрига берилди.

Ҳудудни ободонлаштириш ва санитария ҳолатини яхшилаш борасида ҳам тизимли ишлар олиб борилди. Жумладан, 1,2 километр узунликдаги ариқлар ҳамда 0,60 гектар майдон тозаланди. Амалга оширилган ободонлаштириш ишлари давомида ҳудуддан 16 тонна маиший чиқинди олиб чиқилди.