جكاره بنار دلالي ورثها
وأسأل دنيتي وينه ورثها
اخذهه الروح ترثيلك ورثها
ساعه انت التنوح وساعه هيه

ذَكَرْتِك بالوْجوه اللّي رِدْت يِمْها أنساك
وبَدَت بيك السوالف وإنتَ تُنهيها
وأدير العين عنك والگلب يِنْدار
وأدير الگلب وألگه شفافي تحچيها
تمر سوالفك نايٍ بحيايه الشوگ
وتعرضلي الكرامه وما أحاجيها
المبادئ والقيم ما تشمل اللّي يشتاگ
الهجر ربّ المذلّه القيم شَعليها
أنه صَفّيت روحي من المضه بليّاك
وإنتَ وياي نيّتَك ما مصفّيها
ضيّعت العرف گطره ابحر نسيان
وأنه لمسة جفوفك محتفظ بيها
شجرة ذكريات اشتلها بَلْكي تعيش
ولو طبعك خريف وما تسوّيها
يل مكشّف عشرتي گبال ياهو الجان
وأنه حروف اسمك ما مراويها
مغشوش الهوى الما أشم عطرك بيه
النسمة أخلاف وجهك گوّه أعدّيها