“Turk dunyosi yosh tarixchilarining 5-yozgi o‘qishlari” doirasida 19–20-iyun kunlari Fanlar akademiyasi Tarix instituti yosh olimlari uchun G‘oziyantep va Istanbul shaharlaridagi tarixiy o‘rinlarni kezish va o‘rganish ishlari uyushtirildi.
🔸“Amir Temur izidan” loyihasi doirasida G‘oziyantep va Istanbul shaharlaridagi tarixiy o‘rinlarni o‘rganish va kezish ishlari tashkil qilindi. Xususan, G‘oziyantepdagi Ayntob va Rum qo‘rg‘onlarining mudofaa tizimi va joylashuv xususiyatlari o‘rganildi. Shuningdek, Istanbul shahridagi Ayyub Sulton ziyoratgohida buyuk olim Ali Qushchi hamda temuriy shahzoda Badiuzzamon qabrlari ziyorat qilindi. Ziyorat davomida ishtirokchilarga Ali Qushchining ilmiy faoliyati, uning Samarqand ilmiy muhiti va temuriylar davri ilm-fani taraqqiyotidagi o‘rni, shuningdek, Badiuzzamon hayoti va faoliyatiga oid ma’lumotlarni o‘z ichiga olgan maxsus ilmiy ko‘rsatuv olindi.
🔸G‘oziyantep shahridagi 25-dekabr muzeyi ham o‘rganildi. Muzeyda Turkiya xalqining milliy ozodlik uchun olib borgan kurashi, G‘oziyantep aholisining bosqinchilarga qarshi ko‘rsatgan matonati hamda mustaqillik yo‘lida kechgan tarixiy jarayonlar turli ko‘rgazmalar orqali yoritilgan. Kuzatuv davomida muzey ko‘rgazmalari bilan yaqindan tanishilib, mazkur davrga oid tarixiy ma’lumotlar o‘rganildi.
🔸G‘oziyantepdagi Zeugma mozaikalar muzeyi ham ko‘zdan kechirildi. Bu yerda qadimiy Zeugma shahri madaniy qatlamlariga oid noyob mozaika namunalari, qadimiy turmush tarzi, tasviriy san’at va antik davr shaharlari madaniyati bilan bog‘liq ashyolar o‘rganildi.
🔸Safar davomida Istanbul shahrida joylashgan “Turk tarixi kurumi” kitob do‘koniga ham tashrif buyurildi. Bu yerda turkiy dunyo, Markaziy Osiyo tarixi hamda zamonaviy tarixshunoslikka oid ilmiy nashrlar bilan tanishildi va sotib olindi.
🔸Shu bilan “Turk dunyosi yosh tarixchilarining 5-yozgi o‘qishlari” dasturi o‘z nihoyasiga yetdi. Dastur davomida yosh olimlar ilmiy gurunglar, ma’ruzalar, tarixiy o‘rinlar va yodgorliklarga uyushtirilgan safarlarda faol qatnashib, o‘zaro tajriba almashdilar. Yakunda barcha qatnashchilar vatanga qaytib keldilar.

✈️ https://t.me/tarixchivijdoni