Կրօնական արարողութեան պատարագիչն էր Արժ․ Տ․ Արիստակէս քհնյ. Շահմիրեանը: Քահանայ Հայրն իր քարոզի ընթացքում անդրադառնալով հանգուցեալ Իմամ Խոմէյնիի անհատականութեանը ընդգծեց, որ Նա իր բացառիկ քաջութեամբ ընդվզեց բռնատիրութեան եւ անարդարութեան դէմ, ինչը վկայում էր նրա խոր ու անկեղծ հաւատի մասին, որի շնորհիւ նա կարողացաւ շահել ժողովրդի սէրն ու վստահութիւնը։ Այս յեղափոխութիւնը եւ Իմամ Խոմէյնիի հաւատքով հիմնադրած պետութիւնը անշուշտ իրենից յետոյ պետք է վստահւէր նոյն հոգին ունեցող յաջորդին, որ արժանաւորապէս ընտրւեց էմամ Խամէնէին եւ նոյն հաւատքով երկար տարիներ աշխատելուց ու առաջնորդելուց յետոյ երկնային վարձատւութիւնն ստացաւ իր նահատակութեամբ։ Զոյգ առաջնորդների խոր հաւատքի եւ նւիրւածութեան շնորհիւ յեղափոխութեան արմատներն ընդարձակեցին եւ աւելի ամրացան:

Արարողութեանը ներկայ էին՝ Թեմական խորհրդի ներկայացուցիչները, հանգուցեալ Իմամ Խոմէյնիի մահւան 37-րդ տարելիցի կենտրոնական շտաբի կրօնական փոքրամասնութիւններին յանձնախմբի պատասխանատու Մոհամմադ Ռեզա Մովահեդին եւ նրան ընկերակցող պատասխանատուները, Իրան-Իրաք Պարտադրեալ Պատերազմի Հայ Նահատակների եւ Անձնուրացների Արժէքների Պահպանման յանձնախմբի ներկայացուցիչները, նահատակների ծնողները եւ ընտանիքները, անձնուրացներ եւ հաւատացեալ ժողովուրդ:

Յաւարտ կրօնական արարողութեան, ազգային առաջնորդարանի դահլիճում կազմակերպւել էր հանդիպում, որի ընթացքում Թեմական խորհրդի անունից խօսք ընթերցեց Հայրիկ Աղանեանը, որտեղ անդրադարձ էր կատարւել Իմամ Խոմէյնիի վճռորոշ դերակատարութեանը Իրանի Իսլ. Յեղափոխութեան յաղթանակի եւ երկրի հասարակական-քաղաքական նոր փուլ անցնելու գործընթացում եւ ընդգծւած էր, որ նրա առաջնորդած շարժումը հիմնւած էր՝ անկախութեան ամրապնդման, ազգային արժանապատւութեան պաշտպանութեան եւ երկրի մշակութային ու կրօնական ինքնութեան պահպանման սկզբունքներին: Պատգամում նաեւ առանձնայատուկ ուշադրութիւն էր դարձւել կրօնական փոքրամասնութիւնների, այդ թւում՝ իրանահայ համայնքի իրաւունքների նկատմամբ Իմամ Խոմէյնիի դրական վերաբերմունքին եւ նրանց իրաւունքների պաշտպանութեան շեշտադրմանը: Նշւել էր, որ իրանահայերը, որպէս երկրի հինաւուրց եւ արմատաւորւած համայնքներից մէկը, մշտապէս մասնակցել է Իրանի հասարակական եւ ազգային կեանքին, իսկ Սրբազան Պաշտպանութեան տարիներին նահատակւած հայորդիները վկայում են համայնքի նւիրւածութիւնը Իրանին: Միաժամանակ շեշտադրւել էին ազգային միասնութեան, խաղաղ համակեցութեան, փոխադարձ յարգանքի եւ երկրի անվտանգութեան պահպանման արժէքները:

Հանդիպման աւարտին հանգուցեալ Իմամ Խոմէյնիի մահւան 37-րդ տարելիցի կենտրոնական շտաբի կրօնական փոքրամասնութիւններին յանձնախմբի պատասխանատու Մոհամմադ Ռեզա Մովահեդը շնորհակալութիւն եւ իր գնահատանքը յայտնեց յիշատակի միջոցառման կազմակերպման համար: Նա կարեւորութեամբ անդրադարձաւ Իրանի ժողովրդի միասնականութեանը եւ յոյս յայտնեց, որ տարբեր կրօնների միջեւ միասնութիւնն ու համերաշխութիւնը կը շարունակւեն ամրապնդւել:

Ազգային Առաջնորդարանի Հանրային կապ

@tehranprelacy