«Ունենք անկատար իղձեր: Ամէն օր Արարատը մեզ է նայում, Արաքս գետն իր կարկաչունով ձայն է տալիս մեզ, կանչում է լալագին, Արցախը իր սքանչելի բնութեամբ եւ եկեղեցիներով ու բերդերով մեզ է կանչում: Հաւատում ենք, որ մենք պիտի կարողանանք մի օր վերադարձնել մեր Արցախն իր ամբողջութեամբ: Այս է ուխտը իւրաքանչիւր հայի, որ պիտի ունենայ եւ ամէն օր կատարելու վճռակամութեամբ շարունակի իր կեանքը: Յիշենք անմահանուն բանաստեղծի խօսքը.-«Ով հայ ժողովուրդ, քո միակ փրկութիւնը քո հաւաքական ուժի մէջ է»»:
Ս. եւ Անմահ Պատարագի աւարտին, Հայոց Ցեղասպանութեան մէկ ու կէս միլիոն զոհերի յիշատակը յաւերժացնող յուշարձանի մօտ կատարւեց Բարեխօսական աղօթք, որից յետոյ օրւայ առիթով խօսքը ընթերցւեց Թեմական խորհրդի ատենադպիր Հայրիկ Աղանեանի միջոցով, որտեղ ընդգծւած էր.-«Այսօր մենք այստեղ ենք ոչ միայն սգալու, այլ նաեւ վկայելու: Վկայելու, որ արդարութիւնը դեռ պահանջ ունի: Վկայելու, որ մենք չենք մոռացել: Մենք այստեղ ենք, որպէսզի նաեւ յիշենք մեր Հայրենական Արցախն ու նրա տեղահան եղած ժողովրդին, որը զերծ չմնաց ցեղասպանութիւնից ու բռնագաղթումից: Այսօր աշխարհի բազմաթիւ երկրներ եւ կազմակերպութիւններ ճանաչել են հայոց ցեղասպանութիւնը՝ որպէս մարդկութեան դէմ կատարւած յանցագործութիւն: Սակայն ճանաչումը վերջնակէտ չէ: Այն ճանապարհի մի մասն է՝ դէպի արդարութիւն եւ պատմական ճշմարտութեան լիարժէք հաստատում: Մեր պարտքն է յիշել: Մեր պարտքն է խօսել: Մեր պարտքն է պահանջել: Որովհետեւ մոռացութիւնը նոր յանցագործութիւնների հող է ստեղծում: Որովհետեւ լռութիւնն արդարացնում է անարդարութիւնը: Որովհետեւ ճշմարտութիւնը պէտք է հնչի՝ որքան էլ տարիներ անցնեն»:

Խօսքին յաջորդեց պաշտօնական եւ ժողովրդական ծաղկեմատոյցը եւ խնկարկումն՝ ի յիշատակ մէկուկէս միլիոն Սրբադասւած Նահատակների եւ «Սարդարապատ» քայլերգով աւարտւեց ժողովրդական հաւաքը:

Ծաղիկների մատուցման ու խնկարկման արարողութեան ընթացքին իրենց յարգանքի տուրքը մատուցեցին՝ Հոգշ. Տ. Առաքել Աբղ. Գատեհճեանը եւ Քահանայից դասը, Իսլ. խորհրդարանում Թեհրանի եւ հիւսիսային իրանահայութեան պատգամաւոր դկտր. Արա Շահվերդեանը, Իրանում ՀՀ արտակարգ եւ լիազօր դեսպան Գրիգոր Յակոբեանը եւ դեսպանութեան դիւանագիտական անձնակազմը, ՀՅԴ Բիւրոյի անդամ Սեւան Դանիէլեանը, Մեծի Տանն Կիլիկիոյ Ազգային Կենտրոնական վարչութեան Քաղաքական Ժողովի անդամ Յովսէփ Աւետեանը, Թեմիս Պատգամաւորական ժողովի, Թեմական խորհրդի, Կրօնական խորհրդի, Հաշւեքննիչ մարմնի ներկայացուցիչները, Իրանի Հայ Կաթողիկէ եկեղեցու առաջնորդ արհիապատիւ Տ. Սարգիս եպս. Դաւթեանը, Իրանի Հայ Աւետարանական եկեղեցու համայնքապետ վերապատւելի դկտր. Միշէլ Աղամալեանը, «Ալիք» հաստատութեան ներկայացուցիչ Գառօ Յովհաննիսեանը, «Ալիք» օրաթերթի, Հայ Դատի յանձնախմբի եւ Հայոց Ցեղասպանութեան 111-ամեակի ոգեկոչման յանձնախմբի ներկայացուցիչները, Համահայկական խաղերի համաշխարհային կոմիտէում Իրանի ներկայացուցիչ Հենրիկ Խալոյեանը, Թեմիս Ազգային մարմինների, Եկեղեցական խորհուրդների, միութիւնների եւ դպրոցների ներկայացուցիչները, հայոց դպրցների աշակերտ-ուհիները եւ մեծ թւով ժողովուրդ:

Յիշատակի արարողութեան ընթացքում ուշագրաւ էին հայկական դպրոցների տեսչական եւ ուսուցչական կազմերի նաեւ ծնողական խորհորդների համագործակցութեամբ օրւայ առիթով կազմակերպւած աշակերտական նկարչութեան ցուցահանդէսը նաեւ կրթական խորհրդի եւ միութիւնների սկաուտական բաժանմունքների հետ կատարւած համադրութիւնները՝ աշակերտութեան եւ սկաուտների մասնակցութեան առումով: Ակնյայտ է, որ նման ծրագրերում կարեւոր է եւ ոգեւորիչ երիտասարդ սերնդի ներկայութիւնը, որոնք շարունակողը պէտք է լինեն հայոց ցեղասպանութեան արդար պահանջատիրութեան:

Ազգային Առաջնորդարանի Հանրային Կապ

@tehranprelacy

111-ամեակի ոգեկոչման միջոցառմանը ներկայ էին համայնքի քաղաքական, հոգեւոր, ազգային իշխանութեան, մարմինների ու միութիւնների ներկայացուցիչներ եւ մեծ թւով հայրենակիցներ:

Միջոցառմանը ազգագրական երգերով հանդէս եկաւ Հ.Մ.Ա.Կ.-ի եւ Հայ Համալսարանականների Ընդհանուր միութեան համատեղ «Արարատ» եւ «Տաւիղ» երգչախումբը՝ դիրիժոր Արփի Սիմրոջեան (Նազարեան), դաշնամուրի կատարող՝ Արեգ Մարգարեան: Միջոցառմանը պատկերասփռւեց փաստագրական տեսաֆիլմեր: Օրւայ եզրափակիչ խօսքով Թեհրանի հայոց թեմի առաջնորդ Տ. Սեպուհ արք. Սարգսեանի անունից արտայայտւեց Տ. Առաքել Աբեղայ Գատեհճեանը:

Թեմիս Առաջնորդի Օգնական' Հոգշ. Տ. Առաքել Աբղ. Գատեհճեանի գնահատանքի խօսքն ուղղւած' աշակերտութեան, սկաուտներին, պատանիներին եւ երիտասարդութեան

@tehranprelacy

Ծրագրին Հ. Մ. «Սարդարապատ» միութեան վարչութեան նախագահ Մուշեղ Ծատուրեանը ներկայացնելով օրւայ բանախօսի ազգային, հասարակական ու գաղափարական անցած ուղին հրաւիրեց Ճրտ. Վիգէն Բաղումեանին: Բանախօսի ելոյթը երեք հիմնական գլուխների էր բաժանւում՝ Հայոց Ցեղասպանութեան միջազգային ճանաչման առումով անցած ուղին, Հայաստանի ներկայ իշխանութիւնների ապազգային քաղաքականութիւնը եւ տարածաշրջանի ու Իրանի իրավիճակը: Նա համապարփակ գծերով անդրադարձաւ Հայոց Ցեղասպանութեան միջազգային ճանաչման առումով տասնամեակներ Հայ Դատի գրասենեակների կատարւած աշխատանքներին, Հայաստանի ներկայի իշխանութեան ներքաղաքական եւ արտաքին մակարդակով ապազգային քաղաքականութեանը եւ հայ ժողովրդի համազգային արժէքների ոտնահարմանն ու անտեսմանը, ինչպէս Արցախի հայկական լինելու ուրացում, «Արարատ» բիբլիական սարի անտեսում, Հայաստանեայց Առաքելական եկեղեցու դէմ արշաւ, որը նոյնիսկ Խորհրդային Սովետական տարիներին աննախադէպ է եղել, հայ ժողովրդի պատմութեան խեղաթիւրում, Հայաստանի բանակի թուլացում, անհանդուրժողականութեան տարածում, Բաքւում հայ ռազմագերիների անտեսում եւ Սփիւռքի նախարարութեան վերացմամբ, որի նպատակը միասնական հարցերի կարգաւորումն էր խափանել Հայաստան-Սփիւռք մէկ մարմին հանդիսացող գոյակցութիւնը եւ ոչնչացնել Սփիւռք-Հայաստան կապերը:

Բանախօսը կարեւորութեամբ անդրադարձաւ Հայաստանում շուտով կայացող խորհրդարանական ընտրութիւններին ընդգծելով ժողովրդի ճիշտ ընտրութիւնը, որով հնարաւոր լինի վերականգնել Հայաստանի եւ հայ ժողովրդի ոտնահարւած իրաւունքները: Բանախօսը անդրադառնալով տարածաշրջանի ներկայ պայմանների կարեւորեց հզօր Իրանի դերը Հայաստանի համար: Ապա ներկաներին առիթ տրւեց հարցումների:

Միջոցառմանը ներկայ էին Իրանի Իսլամական խորհրդարանում Թեհրանի եւ հիւսիսային իրանահայութեան պատգամաւոր Արա Շահվերդեանը, «ԱԼԻՔ» հաստատութեան ներկայացուցիչ Ալեքս Կարապետեանը, Թ. Հ. Թ. Թեմական խորհրդի ատենապետ Վարուժ Յովհաննիսեանը, ՊԺ-ի քաղաքամասի պատգամաւորներ, Հայոց Ցեղասպանութեան Կենտրոնական յանձնախմբի ատենապետ Մհեր Անդրէասեանը, ազգային մարմինների ու միութիւնների ներկայացուցիչներ եւ ներկաներ:

Եզրափակիչ խօսքով յանուն Թեհրանի հայոց թեմի առաջնորդ Տ. Սեպուհ արք. Սարգսեանի հանդէս եկաւ Սրբազան Հօր օգնական Տ. Առաքել աբեղայ Գատեհճեանը: Հայր Սուրբը ընդգծեց. «Մարդը գոյատեւում է թթւածնով, իսկ ազգերը եւ երկրները պատմական յիշողութեամբ, որը անցեալը, ներկան եւ ապագան իրար կապող կամուրջն է»: Հայր Սուրբը կարեւորեց Հայոց Ցեղասպանութեան ճանաչման, մեր իրաւունքների արդար եւ ամբողջական վերադարձի առումով պահանջատիրութեան շարունակութեանը եւ նշեց, որ չի կարելի ուրանալ Հայոց Ցեղասպանութիւնը, Արցախը եւ պատմական Հայաստանը: