Xotin-qizlar balansini shakllantirish bo‘yicha tajriba-sinov ishlari davom etmoqda

Termiz tumani hokimligida xotin-qizlar balansini shakllantirish bo‘yicha tajriba-sinov ishlarini samarali tashkil etish masalalariga bag‘ishlangan yig‘ilish o‘tkazildi.

Unda O‘zbekiston Respublikasi Oila va xotin-qizlar qo‘mitasi vakillari, Respublika ishchi guruhi a’zolari Sherzod Annaqulov va Ulug‘bek Yusupov, tuman Oila va xotin-qizlar bo‘limi boshlig‘i Ma’rifat Rasulova hamda mahallalarda faoliyat yuritayotgan xotin-qizlar faollari ishtirok etdi.

Yig‘ilishda xotin-qizlar balansini shakllantirish jarayonini sifatli tashkil etish, ma’lumotlarni aniq va to‘liq yig‘ish hamda amaliyotni belgilangan tartibda yuritish yuzasidan tegishli vazifalar belgilandi.

Deputat nazoratida: hududdagi ichki yo‘llarda amalga oshirilgan asfaltlashtirish ishlari o‘rganildi

Xalq deputatlari Termiz tuman Kengashi deputati K. Abdullayeva o‘zi saylangan 3-Nurafshon saylov okrugi hududida amalga oshirilgan ichki yo‘llarni asfaltlashtirish ishlari bilan joyiga chiqib tanishdi.

O‘rganish davomida yotqizilgan asfalt qoplamasining sifati, bajarilgan ishlar holati va yo‘llarning foydalanishga tayyorligi ko‘zdan kechirildi. Shuningdek, hudud aholisi bilan ochiq muloqot o‘tkazilib, fuqarolarning mavjud muammolari, taklif va mulohazalari tinglandi.

Fuqarolar tomonidan hududda olib borilayotgan bunyodkorlik va obodonlashtirish ishlari ijobiy baholanib, yo‘l infratuzilmasini yanada yaxshilash yuzasidan o‘z fikr va takliflari bildirildi.

Bildirilgan murojaatlar va takliflar yuzasidan tegishli mas'ul tashkilotlar bilan hamkorlikda amaliy choralar ko‘rish belgilandi. Hududda olib borilayotgan bunyodkorlik ishlari hamda fuqarolar murojaatlari deputat nazoratida bo‘lib, bu boradagi ishlar izchil davom ettirilmoqda.

Yoshlarni tadbirkorlikka jalb etishda usta-dehqonlar tajribasidan foydalaniladi

Respublika ishchi guruhining Termiz tumanida yoshlar masalalaridagi o‘rganishlarining navbatdagi manzil — Qahramon mahallasida yashovchi usta-dehqon Boboyor Xolboyev xonadoni bo‘ldi.

Xonadonda ko‘p yillik tajribasi asosida shaxsiy tomorqada issiqxona tashkil etilib, mahsulotlar yetishtirish, ko‘chatchilik hamda gulchilik yo‘nalishlarini samarali yo‘lga qo‘ygan. Uning bu boradagi tajribasi xonadonda qo‘shimcha daromad manbai yaratish bilan birga, yoshlar uchun ham amaliy o‘rnak bo‘lib xizmat qilmoqda.

Usta-dehqonning ish tajribasini yoshlarga o‘rgatish, ularni ushbu yo‘nalishlarga keng jalb etish imkoniyatlari muhokama qilindi.

Mutasaddilarga Boboyor Xolboyevning boy tajribasidan samarali foydalangan holda mahalladagi yoshlarni ko‘chatchilik, issiqxonachilik va gulchilikka o‘qitish, ularning bandligini ta’minlash bo‘yicha aniq vazifalar belgilab berildi.