Senga nega kerak mening qayg‘uyim,
Aytgin, ne topasan ko‘z yoshlarimdan?
Hursandmisan g‘amga qorishsa kuyim,
Baxtlimisan mayus qarashlarimdan?

To‘kilsammi, sinsam qayerga qochsam,
Tokay dardlarimdan huzur topasan?
Orzu — shamolga darcham ochsam,
Umid eshigini qattiq yopasan.

Nahot qoida shu — yozilmas qonun,
Kimningdir qayg‘usi kimgadir sevinch.
Bas shunday bo‘lsa, men shodliging uchun
Indamay ketaman — uzilar ilinj.

Ko‘nglim sinib ketdi, rostin aytganda,
Chegaralab bo‘lmaydi mutlaqo gumon.
Bir kun xatoying anglab yetganingda,
Meni topolmaysan — afsus, hech qachon.

Izlashda — shamol kabi el. Uning zahmat zaxrini shakar kabi ye, bol sharbatidek ich. Ko'ngilga aytgin, ishtahaga qarab: "Yaxshi qol" desin. Badanga ayt, esonlikka dushman bo'lsin. Chunki dengiz sohiliga uy qurgan kishi turfa to'lqinlarni ko'radi. Sevgi da'vosini qilgan esa baloyu mehnat zahrini yutadi.

Aytmasalar, so‘rama. Chaqirmasalar, borma. Kechroq chaqirsalar, rad et. Chunki sen ular uchun avval boshdanoq zahiradagi odamsan. Bu hayotda bo‘lsang, asosiy guruhda bo‘l. Bo‘lmasa, o‘sha guruhda bo‘lmay qo‘ya qol.

Muqim Mahmud

Sen uzoqdagi yaqinimsan, eng sodiq dushmanim.
Sen nafrat to‘la mehribonim, eng yomon ko‘rgan sevgilim.
Sen menga shifo bergan dardimsan, meni falaj qilgan ilojim.
Sen bilan yolg‘izman men, sensizlikdan charchagan.
Sen o‘zimga ham aytishga botina olmagan sirimsan,
Zerikkan sog‘inchim, o‘limdan qutqargan qotilim…

Abror Muxtor Aliy

Mendagi hayotning ovozi sendagi hayotning qulog'iga yetib bormaydi, lekin o'zimizni yolg'iz his qilmaslik uchun gaplashaylik.

Ba’zan inson to‘g‘ri yo‘lni topish uchun avval o‘zi qayerda adashganini tan olishi kerak.

Senli xayollarni surish ham bir baxt,
Orzu - men hayotdan qochib borar joy.
Shunday ma'vo bo'lsa: dengiz, tog', daraxt,
Bir kulba, bir stol, ikki finjon choy.

Ko'zlarim ko'zingdan quvonchlar ichsa,
Shudringday bug'lansa xatolarimiz.
Diydor sharobidan sarmast ilgichda
Ustma-ust ilinsa paltolarimiz...

Soatlar bo'lmasa o'sha makonda,
Adashiblar ketsa hisoblarimiz.
Bir umrga baxtdan masrur javonda.
Yonma-yon terilsa kitoblarimiz...

Sitorabonu