😋شلون ادرس بطريقة صحيحة وبدون تسخيت؟

🟤نبلش ندرس بالبداية ربع ساعة ونأخذ ريست وبعدها نرجع نكمل نص ساعة وهم ناخذ ريست ونرجع نكمل ساعة وناخذ ريست لحدما نكدر ندرس أوقات طويلة يعنِي نبلش تدريجياً بالدراسة ، تمام؟ تمام..

🟤تصلي ركعتين بنية التوفيق بالدراسة
وسرعة الفهم ، الجانب الديني جداً مُهم ..

🟤نروح لمكان دراستنا سواء مكتبة او على الجرباية ، نحاول نشغل موسيقى او نحط فد نص يحفزنا على المكتبة حتى كُل ماتباوعله يزيد واهسك ، والاهم يكون يمك كلاص مي راح يساعدك هواي بتركيز ..

🟤نفتح مُحاضرات اليوتيوب ونبلش بأول مُحاضرة ، نحاول نفهم كُل حرف يكوله الاستاذ والمُلاحظات والشغلات لمهمة نكتبها بالعامية حتى ما ننساها ، واهمشي يمك ورقة وقلم حتى إذا حسيت نفسك دتنسى تكتب بلورقة الموضوع إلى أن تحفظه، واهم شغلة بعد ماتكمل محاضرة اليوتيوب تراجع المادة ، لأن التكرار مُهمم فوك متتخيلون وراح يساعدك حتى تترسخ المادة بدماغك..

🟤وبعدين وره ما فهمنا الموضوع وكملناه ،
نروح نقره وزارياته حتى نتطلع ؏ الاسئلة
الوزارية ونأخذ عنهنّ فكرة..

🟤نسوي مُلخصات للموضوع الي قريناه ، هلشي مو ضروري تسوي إذا ماعندك وقت بس يعنِي إذا سويته حَيفيدك هواي وخاصة الخرائط الذهنية ..

🟤 الاسئلة الي نسيتها او الي شكد ما تراجعها تنساها تكتبها بقصاصات وتعلكها يمك ؏ المكتبة وكل يوم ترجع تقراها ، حتى ما تنساها وتحفظها مثل اسمك ..

وبالنهاية لا تنسى تقره هذا الدعاء
بعد ما تكمل المادة :
" اللهم إني استودعتك ما قرأت و ما حفظت و ما درست و ما تعلمت فردة لي عند حاجتي إليه انك على كل شي قدير "

نصائح اذا فقدتوا الواهس بنص الدراسة🩵 .
شلون اسوي واهس لنفسي💘
𓇿 . 𓇿 . 𓇿 . 𓇿 . 𓇿
1 - ضع جدولا
2 - أكتب أهدافك
3 - قسم عملك
4 - حفز جدول
5 - استرح و انطلق من جديد
6 - تغيير أماكن الدراسة
7 - الحفاظ على روح إيجابية
8 - إجراء امتحانات تجريبية
9 - لا تسهر ابد
10 - لا تستسلم
𓇿 . 𓇿 . 𓇿 . 𓇿 . 𓇿
وبس 🩵