🟦🟦🟦🟦🟦🟦🟦

“O‘ZBEK TILI MEN UCHUN…” — TIL BAYRAMIGA BAG‘ISHLANGAN CHALLENGE

🇺🇿 21-oktyabr — O‘zbek tili bayrami kuni munosabati bilan bugun
🇺🇿 Chilonzor tumanidagi 168-sonli umumiy o‘rta ta’lim maktabida o‘quvchilar ishtirokida “O‘zbek tili men uchun…” nomli challenge tashkil etildi.

🇺🇿Mazkur tadbir
🇺🇿O‘zbekiston davlat jahon tillari universiteti
🇬🇧Ingliz tili 3-fakultet Ingliz tili amaliy fanlar №3 kafedrasi o‘qituvchilari hamda
🇺🇿Yoshlar ittifoqi kengashi hamkorligida o‘tkazildi.

✅Challenge davomida o‘quvchilar o‘zbek tilining hayotimizdagi o‘rni, uning betakror jozibasi, milliy qadriyatlarimiz va ona tilimizga bo‘lgan mehr-muhabbatlarini o‘z fikrlari orqali ifoda etdilar.

✅ Ona tili — millat ruhi, milliy o‘zligimiz va ma’naviy boyligimiz timsolidir! Uni asrash, qadrlash va kelajak avlodga sof holda yetkazish barchamizning muqaddas burchimizdir.

✅Ona tilimizga bo‘lgan muhabbatimiz qalbimizda, ehtiromimiz esa har bir so‘zimizda namoyon bo‘lsin!

🌐Bizni ijtimoiy tarmoqlarda kuzating:
✅Telegram 🌐Instagram

🟦🟦🟦

21-OKTABR — O‘ZBEK TILI BAYRAMI MUBORAK!

Qadrli yurtdoshlar! Hurmatli ustozlar! Aziz talabalar!

Barchangizni milliy o‘zligimiz, ma’naviyatimiz va g‘ururimiz timsoli bo‘lgan o‘zbek tiliga davlat tili maqomi berilganining 37 yilligi — 21-oktabr O‘zbek tili bayrami kuni bilan chin qalbimdan samimiy tabriklayman!

Ona tili — millatning ruhi, xalqning tarixiy xotirasi, avlodlarni bir-biriga bog‘lovchi bebaho ma’naviy merosdir. Tilimizda xalqimizning ko‘p asrlik tarixi, boy madaniyati, ezgu qadriyatlari va betakror tafakkuri mujassam. Uni asrab-avaylash, boyitish va kelajak avlodlarga munosib yetkazish har birimizning sharafli burchimizdir.

Bugungi globallashuv davrida o‘zbek tilining xalqaro miqyosdagi nufuzini oshirish, uni ilm-fan, ta’lim, zamonaviy texnologiyalar va raqamli makonda keng targ‘ib etish alohida ahamiyat kasb etmoqda. Ona tilimizning dunyoning nufuzli ta’lim va ilmiy muassasalarida o‘rganilayotgani, xorijiy mamlakatlarda unga bo‘lgan qiziqish ortib borayotgani barchamizga faxr va g‘urur bag‘ishlaydi.

O‘zbekiston davlat jahon tillari universiteti jamoasi uchun ham ona tilimizni e’zozlash, uning boy imkoniyatlarini namoyon etish va xalqaro miqyosda targ‘ib qilish muhim vazifalardan biridir. Xorijiy tillarni chuqur o‘rgatish bilan bir qatorda, o‘zbek tilining nufuzini yuksaltirish, xalqimizning boy ma’naviy merosi va milliy qadriyatlarini dunyoga tanitish borasidagi sa’y-harakatlarimiz izchil davom etadi. Zero, boshqa tillarni o‘rganish va o‘rgatish bilan birga, o‘z ona tilimizga hurmatni mustahkamlash ham yuksak ma’naviyat va milliy o‘zlikning muhim mezonidir.

Aziz yurtdoshlar! Tilga ehtirom — millatga ehtiromdir. Ona tilimizning sofligini saqlash, uni to‘g‘ri va ravon qo‘llash, yosh avlod qalbida tilga muhabbat va milliy g‘urur tuyg‘ularini shakllantirish barchamizdan mas’uliyat talab etadi.

O‘zbek tilining dovrug‘i yanada yuksalsin, nufuzi xalqaro miqyosda tobora ortib borsin! Ona tilimiz qalblarimizga g‘urur, xalqimizga birlik, yurtimizga taraqqiyot baxsh etsin!

O‘zbek tili bayrami barchangizga muborak bo‘lsin!

Hurmat bilan,
O‘zbekiston davlat jahon tillari universiteti rektori
Tuxtasinov Ilxomjon Madaminovich

🌐 Biz ijtimoiy tarmoqlarda:
Telegram | Instagram | Facebook | Sayt