Turli soha vakillarini bir maqsad yo‘lida birlashtirgan mazkur tadbirda o‘zbek tilining jamiyat hayotidagi o‘rni, uning xalqimiz ma’naviy merosi va milliy madaniyatini ifodalashdagi ahamiyati alohida ta’kidlandi. Shuningdek, davlat tilini asrab-avaylash, uning nufuzini oshirish va kundalik faoliyatda undan to‘g‘ri foydalanish har bir fuqaroning mas’uliyatli vazifasi ekani qayd etildi.

Ta’kidlash joizki, mudofaa tizimida Vatanga sadoqat, yurt tinchligi va xavfsizligini ta’minlash ustuvor vazifa sanalsa, temir yo‘l tizimida mamlakat transport infratuzilmasini rivojlantirish hamda xalq farovonligiga xizmat qilish muhim ahamiyat kasb etadi. Ushbu sohalar vakillarini birlashtirgan mushtarak qadriyat esa ona tilimizga bo‘lgan hurmat, milliy birlik va yurt ravnaqiga daxldorlik tuyg‘usidir.

Tadbirdan ko‘zlangan maqsad — ona tiliga bo‘lgan hurmatni oshirish, milliy qadriyatlarni asrab-avaylash, yoshlar o‘rtasida o‘zbek tilining nufuzi va ahamiyatini keng targ‘ib etishdan iborat bo‘ldi.

Tadbir davomida o‘zbek tilining boy tarixi, milliy o‘zlikni anglashdagi o‘rni hamda uni kelajak avlodga sof holda yetkazishning ahamiyati haqida fikrlar bildirildi.

Tadbirda maktab o‘quvchilari hamda “Vatan tayanchi” harakati a’zolari ishtirok etdi. Unda ona tilimizning milliy o‘zligimizni ifodalashdagi o‘rni, ma’naviy merosimizni asrab-avaylash va yosh avlod qalbida ona tiliga hurmat tuyg‘usini mustahkamlash masalalariga alohida e’tibor qaratildi.

Bayram dasturi davomida o‘quvchilar tomonidan o‘zbek tilining go‘zalligi va jozibasini tarannum etuvchi she’rlar, kuy-qo‘shiqlar hamda badiiy chiqishlar namoyish etildi. Ishtirokchilarning chiqishlari orqali ona tilimizga bo‘lgan ehtirom, milliy qadriyatlarimizga sadoqat va Vatanga muhabbat tuyg‘ulari ifoda etildi.

Shuningdek, tadbir doirasida buyuk o‘zbek shoiri va mutafakkiri Alisher Navoiy haykali poyiga gullar qo‘yildi. Ushbu ehtirom ramziy marosimi orqali ulug‘ mutafakkirning boy adabiy merosiga, o‘zbek tili ravnaqiga qo‘shgan beqiyos hissasiga hurmat bajo keltirildi.