“Bugungi kunda taʼlim tizimida amalga oshirilayotgan islohotlar inson omilining rolini yanada kuchaytirishni talab etmoqda.

Shu nuqtayi nazardan, psixologlarning kasbiy mahorati, ularning zamonaviy yondashuvlar asosida ishlay olishi va amaliyotda samarali instrumentlardan foydalanishi alohida ahamiyat kasb etadi.

Taʼlimni rivojlantirish respublika ilmiy-metodik markazi hamda Kasbiy taʼlim agentligi hamkorligida tashkil etilgan mazkur seminar aynan shu ehtiyojdan kelib chiqqan holda yoʻlga qoʻyildi.

Eng muhimi, bugungi ishtirokingiz faqat shaxsiy rivojlanish bilan cheklanib qolmaydi. Sizlar kelgusida oʻz hududlaringizda shunday seminarlarni tashkil etish orqali bilim va tajribani keng tarqatuvchi asosiy drayverlarga aylanasiz. Bu esa tizimli oʻzgarishlarni taʼminlovchi kuchli mexanizm hisoblanadi.

Seminar mashgʻulotlari tajribali trenerlar va sohaning yetuk mutaxassislari tomonidan olib borilishi sizlar uchun nazariy bilimlarni amaliyot bilan uygʻunlashtirish imkoniyatini yaratadi, – dedi Anvarjon Maxmudov.

“Bugungi kunda kasbiy ta’lim tizimida o‘quvchi-yoshlarni nafaqat bilim va ko‘nikmalar bilan qurollantirish, balki ularning ruhiy barqarorligi, o‘ziga ishonchi va ichki salohiyatini to‘g‘ri yo‘naltirish ham dolzarb vazifalardan biridir.

Davlatimiz rahbari tomonidan yoshlarni kasbga yoʻnaltirish borasida amalga oshirilayotgan tashabbuslarning markazida ham aynan psixologlar turadi.

Chunki Sizlarning mahoratingiz yoshlarning qobiliyatlarini aniqlash hamda koʻnikmalarini shakllantirishda muhim omil boʻlib xizmat qiladi.

Shuningdek, bugungi tadbirga hududlardan saralab olingan eng yaxshi psixologlar jalb etilgan.

Ishonamizki, ushbu seminar davomida olingan tavsiya va yondashuvlar kasbiy ta’lim tashkilotlarida psixologik xizmat sifatini yanada oshirishga, o‘quvchi-yoshlar bilan ishlash samaradorligini kuchaytirishga munosib hissa qo‘shadi”, – dedi Avzalxon Abdullaxonov.