Ushbu g‘oyatda mazmunli va hayotbaxsh tashabbus nafaqat O‘zbekiston, balki butun islom olami va insoniyatning umumiy kelajagi nuqtayi nazaridan ulkan tarixiy ahamiyatga egadir.

Mazkur forum bugungi tahlikali dunyoda tinchlik, muloqot va o‘zaro hamjihatlikni mustahkamlashga qaratilgan nihoyatda kuchli va daxldor bir da’vatdir. Turli ziddiyatlar chuqurlashib, nafrat so‘zlari hamda islomofobiya xavfi kuchayib borayotgan bir davrda, muqaddas dinimiz Islomning haqiqiy, sof va nurli qiyofasini insoniyatga qayta namoyon etish — barchamiz uchun kechiktirib bo‘lmas tarixiy mas’uliyatdir.

Qadimiy Turkistonning ilm-fan va tafakkur markazi bo‘lmish Movarounnahr o‘z bag‘ridan yetishib chiqqan buyuk olim va mutafakkirlari bilan insoniyat sivilizatsiyasi rivojiga beqiyos hissa qo‘shgan. Imom Buxoriy sahih bilimning, Imom Termiziy yuksak hikmat va axloqning, Abu Mansur al-Moturidiy esa teran aql va mo‘tadillikning buyuk timsoliga aylanganlar. Ushbu boy ma’naviy meros bugungi kunda ham butun insoniyat ehtiyoj sezayotgan umumbashariy qadriyatlarni o‘zida to‘liq mujassam etganiga guvoh bo‘lmoqdamiz.

Muhtaram Prezident janoblari, Sizning oqilona rahbarligingizda O‘zbekiston nafaqat o‘zining buyuk kelajagini barpo etmoqda, balki Islom tamaddunining tinchlik, ezgulik va birodarlik g‘oyalarini dunyoga baralla tarannum etuvchi tarixiy missiyaning peshqadami va bayroqdori bo‘lib maydonga chiqmoqda.

Ushbu qutlug‘ tashabbus insoniyatning umumiy kelajagiga salmoqli va bardavom hissalar qo‘shishiga chin dildan ishonaman. Forum butun islom olami uchun xayrli bo‘lishini, muvaffaqiyatli va yorqin natijalar berishini tilab qolaman. Mazkur nufuzli anjumanning tashkil etilishida o‘z hissasini qo‘shgan, zahmat chekkan va uni qo‘llab-quvvatlagan barcha-barchaga samimiy minnatdorchilik bildiraman. Shuningdek, ushbu muhim uchrashuvga yuksak mehmondo‘stlik bilan mezbonlik qilayotgan qardosh O‘zbekiston xalqiga o‘zimning eng samimiy salomlarimni va qalbiy mehr-muhabbatimni yo‘llayman.